Olketa Fit for Kasem Kingdom
“Evri samting hia barava showimaot wei bilong God for judgem pipol hem stret, and diswan bae mekem iufala fit for kasem kingdom bilong God.”—2 THESS. 1:5.
1, 2. Wanem nao God markem finis for duim long future, and hu nao bae judgem olketa man?
LONG samting olsem year 50 C.E., aposol Paul hem stap long Athens. Taem Paul lukim staka pipol long there worshipim olketa idol, hem feel nogud tumas so hem givim wanfala barava gudfala witness. Last samting wea hem talem masbi barava kasem tingting bilong olketa heathen man hia. Hem sei: “Distaem [God] hem talem evriwan long evri ples for repent. Bikos hem markem finis day wea hem bae iusim wanfala man wea hem appointim for judgem evriwan long earth long raeteous wei, and hem mekem diswan samting wea iumi savve trustim taem hem mekem hem laef bak moa.”—Acts 17:30, 31.
2 Hem barava important for iumi tingim wei wea God markem finis day for judgem olketa man long future! Long datfala tok wea Paul givim long Athens, hem no talem nem bilong man wea bae judge, bat iumi savve hao Jesus Christ wea resurrect finis nao bae duim datwan. Jesus bae judgem man for laef or for dae.
3. Why nao Jehovah mekem covenant witim Abraham, and hu nao main wan wea bae fulfillim datwan?
3 Datfala Judgment Day bae gohed for 1,000 year. Jehovah givim paoa long Jesus for rul olsem King long Kingdom bilong God, bat hem no Jesus seleva nomoa wea bae rul. Jehovah chusim samfala man from earth tu for rul witim Jesus and for judge long datfala wan thousand year. (Markem witim Luke 22:29, 30.) Klosap 4,000 year go finis, Jehovah mekem covenant witim faithful servant bilong hem Abraham. Diswan nao hem faondeson for datfala Judgment Day. (Readim Genesis 22:17, 18.) Luk olsem datfala covenant hem start long 1943 B.C.E. Long datfala taem, Abraham no minim evri samting wea datfala covenant bae duim for olketa man. Bat long taem bilong iumi, iumi savve hao long datfala covenant, seed bilong Abraham nao hem main wan wea bae fulfillim plan bilong God for judgem olketa man.
4, 5. (a) Hu nao main part bilong seed bilong Abraham, and wanem samting nao hem talem abaotem Kingdom? (b) Datfala hope for kasem Kingdom bilong God hem start long wanem taem?
4 Jesus nao main part bilong seed bilong Abraham. Long 29 C.E., God anointim hem witim holy spirit and hem kamap Messiah, datfala Christ. (Gal. 3:16) For thri and haf year, Jesus gohed for preachim gud nius abaotem Kingdom long olketa Jew. Taem John Baptaesa stap long prison, Jesus talem hao samfala moa savve garem hope for kasem datfala Kingdom. Hem sei: “Start long taem bilong John Baptaesa kam kasem distaem, kingdom bilong heven hem goal wea olketa man trae hard for kasem, and olketa wea gohed for trae hard savve kasem datwan.”—Matt. 11:12.
5 Jesus talem wanfala interesting samting just bifor hem tok abaotem olketa wea bae “kasem” Kingdom bilong heven. Hem sei: “Tru tumas, Long evriwan wea stap bifor kam, kam kasem distaem, no eniwan hem winim John Baptaesa; bat man wea low tumas insaed long kingdom bilong heven nao hem winim hem.” (Matt. 11:11) Why nao hem fit for tok olsem? Hem bikos olketa wea faithful no kasem yet hope for kasem Kingdom bilong God. Olketa kasem datwan taem God givim holy spirit long olketa long Pentecost 33 C.E., and long datfala taem, John Baptaesa hem dae finis.—Acts 2:1-4.
God Talem Hao Seed Bilong Abraham Hem Raeteous
6, 7. (a) Long wanem wei nao seed bilong Abraham bae kamap “olsem olketa star long skae”? (b) Wanem blessing nao Abraham kasem, and wanem semkaen blessing nao seed bilong hem kasem?
6 God talem Abraham hao seed bilong hem bae kamap staka “olsem olketa star long skae” and olsem sandbis long saedsea. (Gen. 13:16; 22:17) Diswan minim long taem bilong Abraham, no eniwan savve haomas man nao bae insaed disfala spiritual seed. Bat gogo, datfala namba hem showaot klia. Olketa wea insaed diswan nao hem Jesus witim 144,000.—Rev. 7:4; 14:1.
7 Bible tok olsem abaotem faith bilong Abraham: “[Abraham] showimaot faith long Jehovah; and God talem hao hem man wea raeteous.” (Gen. 15:5, 6) Hem tru, no eni man hem raeteous evribit. (Jas. 3:2) Nomata olsem, from Abraham showimaot bigfala faith, Jehovah talem hao hem man wea raeteous and hem kolem Abraham fren bilong hem tu. (Isa. 41:8) Jehovah talem hao spiritual seed bilong Abraham and Jesus tu olketa raeteous, and diswan mekem olketa kasem staka blessing moa winim Abraham.
8. Seed bilong Abraham bae kasem olketa wanem kaen blessing?
8 God talem hao olketa anointed Christian olketa raeteous bikos olketa showimaot faith long ransom sakrifaes bilong Jesus. (Rom. 3:24, 28) Long tingting bilong Jehovah, olketa no guilty long sin and Jehovah savve anointim olketa witim holy spirit for kamap olketa spiritual son bilong Hem and olketa brata bilong Jesus Christ. (John 1:12, 13) Olketa insaed long datfala niu covenant and kamap wanfala niu nation, wea hem nao “datfala Israel bilong God.” (Gal. 6:16; Luke 22:20) Datwan hem nambawan privilege for olketa! From God duim olketa samting hia for olketa anointed Christian, diswan mekem olketa no garem hope for stap olowe long earth. Bat olketa willing for lusim datwan mekem olketa savve kasem nambawan privilege for stap witim Jesus long Judgment Day and rul witim hem long heven.—Readim Romans 8:17.
9, 10. (a) Long wanem taem nao God start for anointim olketa Christian witim holy spirit, and wanem nao olketa mas gohed for duim? (b) Wanem nao Jehovah givim for helpem olketa anointed Christian?
9 Long Pentecost 33 C.E., wanfala sekson wea faithful kasem chance for rul witim Jesus long Judgment Day. God anointim samting olsem 120 disaepol bilong Jesus witim holy spirit and olketa kamap olketa firstfala anointed Christian. Bat datwan no minim hem nomoa samting wea olketa needim for kasem laef long heven. Bihaen datwan, olketa mas gohed faithful long Jehovah nomata olketa kasem olketa test from Satan. For kasem datfala crown bilong laef olowe long heven, olketa mas faithful go kasem taem olketa dae.—Rev. 2:10.
10 For helpem olketa anointed Christian gohed faithful, Jehovah givim Word bilong hem and Christian kongregeson for strongim and encouragem olketa. Olsem example, aposol Paul hem sei olsem long olketa anointed Christian long Thessalonica: “Olsem dadi duim long olketa pikinini bilong hem, mifala gohed for encouragem iufala evriwan, and givim comfort and story gud long iufala, mekem iufala gohed for followim wei wea God laekem, wea kolem iufala long kingdom and glory bilong hem.”—1 Thess. 2:11, 12.
11. Jehovah provaedem wanem for “datfala Israel bilong God”?
11 Long olketa year bihaen taem wea Jehovah chusim olketa firstfala anointed Christian, Jehovah tingim hao hem fitim for olketa man raet abaotem ministry bilong Jesus, and tu, wei wea Hem deal witim olketa anointed Christian long first century and kaonsel wea hem givim long olketa. Diswan nao hem Christian Greek Scripture wea Jehovah joinim go long Hebrew Scripture wea stap finis. Long firstaem Hebrew Scripture hem for nation bilong Israel nomoa taem olketa fren gud yet witim God. Christian Greek Scripture hem for “datfala Israel bilong God,” wea hem nao olketa anointed brata bilong Christ and spiritual son bilong God. Nomata olsem, pipol wea no Israelite savve kasem plande gud samting tu taem olketa studyim Hebrew Scripture. And tu, olketa Christian wea God no anointim witim holy spirit kasem plande gudfala samting tu taem olketa studyim Christian Greek Scripture and followim kaonsel insaed long hem.—Readim 2 Timothy 3:15-17.
12. Wanem nao Paul talem moa long olketa anointed Christian?
12 God talem hao olketa Christian long first century olketa raeteous and hem anointim olketa witim holy spirit mekem olketa garem hope for laef long heven. From God anointim olketa, diswan no mekem olketa kamap king ovarem olketa nara anointed Christian wea stap yet long disfala earth. Bat luk olsem samfala Christian long datfala taem forgetim diswan and olketa laek for garem bignem insaed long kongregeson. Dastawe Paul askem olketa: “Waswe, iufala garem finis evri samting wea iufala needim? Waswe, iufala kamap rich nao? Waswe, iufala winim mifala and kamap king finis? Mi laekem tumas for iufala rul distaem olsem king, mekem mifala tu savve rul olsem king witim iufala.” (1 Cor. 4:8) So Paul talem moa long olketa anointed Christian long taem bilong hem: “Mifala no laek for bossim faith bilong iufala, . . . bat mifala laek for waka tugeta witim iufala mekem iufala savve hapi.”—2 Cor. 1:24.
Kasem Full Namba wea God Markem
13. Start long 33 C.E. kam kasem distaem, hao nao God chusim olketa anointed wan?
13 God no chusim evriwan long 144,000 anointed Christian long first century nomoa. Hem gohed for chusim olketa long taem bilong olketa aposol and then long plande handred year bihaen datwan, hem chusim samfala nomoa. Nomata olsem, hem gohed for anointim samfala kam kasem distaem. (Matt. 28:20) Gogo, bihaen Jesus kamap King long 1914, hem chusim plande moa.
14, 15. Long taem bilong iumi, hao nao disfala wei for chusim olketa anointed wan hem gohed?
14 Taem Jesus hem kamap King, firstfala samting wea hem duim nao hem aotem evriwan wea againstim rul bilong God from heven. (Readim Revelation 12:10, 12.) Then hem start for hipimap olketa last wan wea bae rul witim hem long Kingdom bilong hem, mekem datfala namba kasem 144,000. Bihaen 1930, datfala waka for hipimap olketa hia hem gogo for finis, and plande wea herem and acceptim gud nius no garem datfala hope for go long heven. God no anointim olketa witim spirit for kamap olketa son bilong Hem. (Markem witim Romans 8:16.) Bat olketa luksavve olketa nao “nara sheep” wea garem hope for stap olowe long paradaes long earth. (John 10:16) Dastawe bihaen 1935, main goal bilong preaching waka hem for hipimap “wanfala big crowd” wea aposol John hem lukim long vision. Olketa hia nao bae stap laef bihaen long “datfala big trabol.”—Rev. 7:9, 10, 14.
15 Nomata olsem, long olketa year bihaen 1930, samfala kasem hope for go long heven. Why nao olsem? Maet hem bikos samfala wea garem datfala hope firstaem, olketa no stap faithful. (Markem witim Revelation 3:16.) Paul tu hem storyim samfala man wea hem savve long olketa wea lusim truth. (Phil. 3:17-19) Hu nao Jehovah bae chusim for changem olketa hia wea no faithful? Hem tru, datwan hem samting wea Jehovah nao bae disaedem. Bat iumi savve hao hem bae no chusim man wea just baptaes nomoa. Hem bae chusim olketa wea barava faithful olsem olketa disaepol wea Jesus startim Memorial witim olketa.a—Luke 22:28.
16. Iumi hapi for savve long wanem samting abaotem olketa anointed wan, and wanem samting nao iumi savve trustim?
16 Bat hem luk olsem samfala wea Jehovah chusim bihaen 1930 for go long heven, hem no for changem olketa wea no faithful. Jehovah hem promisim hao samfala anointed Christian bae stap witim iumi go kasem taem “Bigfala Babylon” hem finis evribit.b (Rev. 17:5) And iumi savve trustim wei wea Jehovah bae chusim evriwan long 144,000 long taem wea hem markem and hao gogo evriwan hia bae kasem hope bilong olketa for rul long Kingdom. Iumi savve trustim profesi long Bible tu wea showimaot hao datfala big crowd bae gohed for stap faithful. Klosap nao datfala big crowd bae “kamaot from datfala big trabol” wea bae kasem world bilong Satan and bae hapi tumas for stap insaed niu world bilong God.
Gavman Bilong God Long Heven Hem Klosap Redi Nao!
17. Olsem 1 Thessalonians 4:15-17 and Revelation 6:9-11 talem, wanem nao olketa faithful anointed Christian wea dae kasem?
17 Start kam long 33 C.E., plande thousand anointed Christian showimaot strongfala faith and olketa stap faithful go kasem taem olketa dae. Olketa fit for kasem Kingdom and luk olsem olketa kasem hope bilong olketa for rul long heven no longtaem bihaen Christ stap moa.—Readim 1 Thessalonians 4:15-17; Revelation 6:9-11.
18. (a) Olketa anointed Christian wea stap yet long earth sure long wanem samting? (b) Olketa nara sheep garem wanem kaen tingting abaotem olketa anointed Christian brata bilong olketa?
18 Olketa anointed Christian wea stap yet long earth barava sure hao sapos olketa stap faithful, klosap nao bae olketa go long heven. Plande million nara sheep wea tingim faith bilong olketa anointed wan hia, olketa agree witim samting wea aposol Paul talem abaotem olketa anointed brata long Thessalonica. Hem sei: “Mifala tok praod abaotem iufala long olketa kongregeson bilong God, from iufala gohed strong and no givap and garem faith nomata iufala kasem persecution and iufala safa. Evri samting hia barava showimaot wei bilong God for judgem pipol hem stret, and diswan bae mekem iufala fit for kasem kingdom bilong God, wea iufala safa for hem.” (2 Thess. 1:3-5) Iumi no savve wanem taem nao last wan long olketa anointed wan bae dae, bat long datfala taem nao gavman bilong God long heven bae redi nao. Datwan bae mekem bigfala hapi kamap long heven and long earth!
[Olketa Footnote]
a Lukim The Watchtower bilong March 1, 1992, page 20, paragraf 17.
b Lukim “Questions From Readers” insaed The Watchtower bilong May 1, 2007.
Waswe, Iu Savve Explainim?
• Wanem samting nao God talem long Abraham wea join witim Judgment Day?
• Why nao God talem hao Abraham hem man wea raeteous?
• From God talem hao seed bilong Abraham hem raeteous, wanem hope nao olketa garem?
• Evri Christian savve sure long wanem samting?
[Piksa long page 20]
Jesus encouragem olketa wea followim hem for trae hard for kasem Kingdom
[Piksa long page 21]
Long Pentecost 33 C.E., Jehovah start for chusim mek-tu part bilong seed bilong Abraham
[Piksa long page 23]
Olketa nara sheep barava hapi hao olketa anointed Christian stap witim olketa long olketa last day