Jehovah Sei Abraham Hem “Fren Bilong Mi”

1, 2. (a) Hao nao iumi savve olketa man savve fren witim God? (b) Wanem nao bae iumi storyim long disfala study?

START long taem iumi born go kasem taem iumi dae, iumi laekem samwan for lovem iumi. Iumi evriwan laek for fren witim narawan, and iumi laekem samwan for lovem iumi. And hem barava important for Jehovah lovem iumi. Staka pipol tingse hem hard tumas for olketa man fren gud witim God bikos no eniwan savve lukim hem and hem Olmaeti God. Bat iumi savve datwan hem no tru!

² Bible sei samfala man olketa fren witim God. Iumi shud followim example bilong olketa. Why nao olsem? Bikos hem barava important for iumi fren witim God. Distaem bae iumi story abaotem example bilong Abraham. (Readim James 2:23.) Wanem nao helpem Abraham for fren witim God? Abraham fren gud witim God, bikos hem garem faith long God. Bible sei Abraham hem “dadi bilong evriwan wea garem faith.” (Rome 4:11) Taem iumi storyim example bilong hem, ting raonem kwestin hia, ‘Wanem nao mi savve duim for showimaot mi garem faith olsem Abraham and for strongim wei wea mi fren witim Jehovah?’

WANEM NAO HELPEM ABRAHAM FOR FREN WITIM JEHOVAH?

3, 4. (a) Storyim wanem nao barava testim faith bilong Abraham. (b) Why nao Abraham willing for sakrifaesim Isaac?

³ Piksarem long mind bilong iu, Abraham wea hem samting olsem 125 year hem isisi wakabaot go ap long wanfala maunten.^[1] Son bilong hem Isaac, wea 25 year, wakabaot kam bihaen long hem. Isaac karem firewood, and Abraham holem naef and olketa samting wea hem needim for startim fire. Masbi datfala gogo hem wanfala hard samting wea Abraham duim long laef bilong hem. Bat datwan hem no from Abraham hem olo, bikos hem strong yet. Datfala gogo hem hard samting for Abraham bikos Jehovah talem hem for sakrifaesim son bilong hem!—Gen. 22:1-8.

⁴ Samting wea Jehovah talem Abraham for duim barava testim faith bilong hem. Samfala pipol sei samting wea God talem Abraham for duim hem barava nogud. And olketa narawan sei Abraham willing for duim datwan bikos hem no lovem son bilong hem. Pipol talem kaen samting olsem bikos olketa no garem faith and olketa no savve wanem nao faith. (1 Cor. 2:14-16) Bat Abraham obeyim God bikos hem ting raonem wanem God talem and hem bilivim datwan. Hem obey bikos hem garem faith. Hem savve Jehovah bae no askem hem for duim eni samting wea bae spoelem hem for olowe. Abraham savve sapos hem obeyim Jehovah, God bae blessim hem and son bilong hem. Wanem nao helpem hem for garem strongfala faith? First samting, hem savve long Jehovah, and mek-tu samting, hem lukim wei wea Jehovah helpem hem.

5. Hao nao maet Abraham lane abaotem Jehovah, and wanem nao kamaot from datwan?

⁵ Hem savve long Jehovah. Abraham growap long taon wea nem bilong hem Ur. Pipol long there worshipim olketa idol, and dadi bilong hem tu worshipim idol. (Josh. 24:2) So hao nao Abraham lane abaotem Jehovah? Bible sei Shem, wea hem son bilong Noah, hem relative bilong Abraham. Shem hem laef go kasem taem wea Abraham hem samting olsem 150 year. Shem hem man wea garem strongfala faith, and masbi hem story abaotem Jehovah long olketa relative bilong hem. Iumi no barava sure, bat maet hem nao hao Abraham lane abaotem Jehovah. Savve wea Abraham garem abaotem Jehovah helpem hem for lovem Jehovah, and for garem strongfala faith.

6, 7. Wanem nao helpem Abraham for trustim Jehovah bae helpem hem?

⁶ Hem lukim wei wea Jehovah helpem hem. Wanem nao helpem Abraham for trustim Jehovah savve helpem hem? Samfala pipol luksavve wei for man tingting raonem samting savve mekem hem garem feeling abaotem datwan, and datwan mekem hem for duim samting. Samting wea Abraham lanem abaotem God kasem heart bilong hem, and datwan mekem hem for barava respectim “Jehovah wea hem Barava Haefala God, wea wakem heven and earth.” (Gen. 14:22) Bible sei man wea garem respect olsem hem “fraet long God,” and datwan hem barava important sapos iumi laek for fren gud witim God. (Heb. 5:7; Ps. 25:14) Wei for fraet long God nao mekem Abraham for obeyim Jehovah.

⁷ God talem Abraham and Sarah for lusim hom bilong olketa long Ur and muv go long nara kantri. Tufala olo finis and tufala stap nomoa long olketa tent go kasem taem tufala dae. Nomata Abraham savve maet olketa kasem samfala hard taem, hem barava laek for obeyim Jehovah. From Abraham obeyim Jehovah, God blessim and protectim hem. Olsem example, tufala taem Jehovah duim mirakol for protectim Abraham and Sarah. (Gen. 12:10-20; 20:2-7, 10-12, 17, 18) Abraham lukim wei wea Jehovah helpem hem, and datwan strongim faith bilong hem.

8. Wanem nao savve helpem iumi for strongim wei wea iumi fren witim Jehovah?

⁸ Waswe, iumi savve fren gud witim Jehovah? Yes! Olsem Abraham, iumi tu savve lane abaotem Jehovah and lukim wei wea hem helpem iumi. Distaem, savve wea iumi garem abaotem Jehovah hem big winim savve wea Abraham garem. (Dan. 12:4; Rome 11:33) Bible storyim staka samting abaotem “God, wea wakem heven and earth.” Olketa samting wea iumi lanem abaotem Jehovah mekem iumi for lovem hem and helpem iumi for barava respectim hem. From iumi lovem and respectim God, iumi laek for obeyim hem. Taem iumi obeyim hem, iumi lukim wei wea hem protectim and blessim iumi, and datwan strongim faith bilong iumi. Taem iumi worshipim Jehovah long full heart bilong iumi, iumi stap gud, satisfae, and iumi hapi. (Ps. 34:8; Prov. 10:22) Taem iumi gohed for lane abaotem Jehovah and lukim wei wea hem blessim iumi, datwan bae strongim wei wea iumi fren witim hem.

ABRAHAM STRONGIM WEI WEA HEM FREN WITIM GOD

9, 10. (a) Wanem nao iumi mas duim for strongim wei wea iumi fren witim narawan? (b) Wanem nao Abraham duim wea showimaot hem tinghae long wei wea hem fren witim Jehovah?

⁹ Wei for fren gud witim samwan hem wanfala barava spesol samting. (Readim Proverbs 17:17.) Hem no olsem wanfala expensive samting wea iu peim and putim insaed box nomoa. Bat hem olsem wanfala plant wea iu need for watarem and lukaftarem mekem hem grow gud for garem naesfala flaoa. Abraham tinghae long wei wea hem fren witim Jehovah, and hem duim samting for strongim datwan. Wanem nao hem duim?

¹⁰ Abraham gohed for fraet long God and hem gohed for obeyim God. Olsem example, taem hem gogo for Canaan witim famili and olketa wakaman bilong hem, hem evritaem depend long Jehovah taem hem disaedem eni samting. Wanfala year bifor Isaac hem born, taem Abraham hem 99 year, Jehovah talem hem for circumcisem evri man long famili bilong hem. Waswe, Abraham kwestinim Jehovah or lukaotem excuse for no duim samting wea Jehovah talem hem for duim? Nomoa, hem trustim Jehovah, and duim wanem Jehovah talem “long datfala day.”—Gen. 17:10-14, 23.

11. Why nao Abraham wari taem God sei hem bae distroem Sodom and Gomorrah, and hao nao Jehovah helpem hem?

¹¹ From Abraham obeyim Jehovah long evri samting wea hem duim, datwan strongim wei wea hem fren witim God. Hem feel free for story long Jehovah abaotem eni samting, and taem hem no minim samting hem no hol bak for askem Jehovah for helpem hem. Olsem example, taem Jehovah sei hem bae distroem Sodom and Gomorrah, Abraham hem wari. Why nao hem wari? Hem tingim nogud nao olketa gud pipol tu dae witim olketa nogud pipol. Maet hem wari tu abaotem nephew bilong hem Lot and famili bilong hem, wea stap long Sodom. From Abraham trustim Jehovah, wea hem “Judge long full earth,” hem storyim long Jehovah samting wea hem wari abaotem. Jehovah hem patient witim fren bilong hem Abraham, and showimaot long Abraham hem God wea garem mercy. Jehovah talem Abraham, taem hem judgem pipol hem lukaotem gud pipol and hem sevem olketa.—Gen. 18:22-33.

12, 13. (a) Wanem nao Abraham tingim taem Jehovah talem hem for sakrifaesim Isaac? (b) Wanem nao showimaot Abraham trustim Jehovah?

¹² Tru nao, wei wea Abraham savve long Jehovah and hem lukim wei wea Jehovah helpem hem, datwan nao helpem hem for gohed fren gud witim Jehovah. So bihaen, taem Jehovah talem Abraham for sakrifaesim son bilong hem Isaac, Abraham savve Jehovah hem evritaem patient, showimaot mercy, hem protectim olketa fren bilong hem, and hem savve trustim God. Abraham savve Jehovah bae no seknomoa change and kamap God wea raf and duim nogud samting! Wanem nao mekem iumi savve long datwan?

¹³ Bifor Abraham go ap long datfala maunten, hem sei long olketa wakaman bilong hem: “Iufala stap long hia witim donkey bilong iumi, bat mi and son bilong mi bae go long there and baodaon long God and then kam bak long iufala.” (Gen. 22:5) Hao nao Abraham talem datfala toktok? Abraham savve hem bae go for sakrifaesim Isaac, so waswe, hem laea long olketa wakaman bilong hem taem hem sei tufala bae kam bak? Nomoa. Bible sei Abraham savve Jehovah savve mekem Isaac for laef bak. (Readim Hebrew 11:19.) Abraham savve Jehovah mekem hem fit for garem pikinini, nomata hem and Sarah tufala olo finis. (Heb. 11:11, 12, 18) So hem luksavve no eni samting hem hard long Jehovah. Abraham no savve wanem nao bae happen long datfala day. Bat from hem garem faith, hem savve Jehovah fit for mekem son bilong hem for laef bak, mekem evri promis wea God talem for kamap tru. Dastawe Bible sei Abraham hem “dadi bilong evriwan wea garem faith.”

14. Wanem nao samfala samting wea Jehovah talem wea maet hem no isi for iu followim, and hao nao example bilong Abraham savve helpem iu?

¹⁴ Distaem, Jehovah no talem iumi for sakrifaesim eni pikinini bilong iumi, bat hem talem iumi for obeyim olketa law bilong hem. Samfala taem maet iumi no minim why Jehovah talem iumi for duim wanfala samting, or maet hem no isi for iumi obeyim wanem hem talem. Waswe, samfala taem iu feel olsem? Samfala hem no isi for olketa duim preaching waka. Maet olketa man for shame and no isi for story long pipol wea olketa no savve long olketa. Samfala narawan olketa shame for showimaot olketa difren from olketa narawan long waka ples or long skul. (Ex. 23:2; 1 Thess. 2:2) Taem iu kasem assignment for duim wanfala samting wea no isi for iu duim, tingim nambawan example bilong Abraham and faith wea hem showimaot. Taem iumi ting raonem example bilong olketa faithful man and woman bifor, iumi tu laek for olsem olketa and datwan helpem iumi for fren gud witim Jehovah.—Heb. 12:1, 2.

OLKETA WEA FREN WITIM GOD KASEM OLKETA BLESSING

15. Hao nao iumi savve Abraham hem hapi from hem evritaem obeyim Jehovah?

¹⁵ Waswe, Abraham hem hapi from hem evritaem obeyim Jehovah? Bible sei Abraham “dae bihaen hem laef for staka year and hem olo and satisfae.” (Gen. 25:8) Taem Abraham 175 year, hem barava hapi and satisfae long laef bilong hem. Why nao olsem? Bikos long full laef bilong Abraham, wei for fren witim Jehovah nao hem barava important samting long hem. Nomata olsem, taem Bible sei Abraham hem “olo and satisfae” datwan no minim hem no laek for laef bak long future.

16. Wanem nao samfala samting wea Abraham bae hapi long hem taem hem stap long Paradaes?

¹⁶ Bible sei olsem abaotem Abraham: “Hem weitim datfala taon wea garem strongfala faondeson wea God nao planim and buildim.” (Heb. 11:10) Abraham sure wanday hem bae lukim datfala taon, wea hem Kingdom bilong God, taem datfala Kingdom rulim disfala earth. Tingim wei wea Abraham bae hapi tumas for laef long Paradaes earth and for gohed strongim wei wea hem fren witim God. Hem bae hapi for savve example bilong hem helpem pipol bilong God for staka thousand year! Long niu world hem bae faendaot datfala sakrifaes wea God talem hem for duim long Maunt Moriah hem piksarem samting wea barava important. (Heb. 11:19) Hem bae faendaot tu, sorre feeling wea hem garem taem hem redi for sakrifaesim son bilong hem Isaac helpem plande million pipol for luksavve long feeling bilong Jehovah taem hem sendem Son bilong hem, Jesus Christ, for givim ransom sakrifaes for olketa man. (John 3:16) Example bilong Abraham hem helpem iumi evriwan for barava tinghae long datfala ransom, wea showimaot God barava lovem iumi!

17. Wanem nao iu laek for duim, and wanem nao bae iumi storyim long nextfala study?

¹⁷ Iumi evriwan laek for garem strongfala faith olsem Abraham. Olsem Abraham, iumi tu mas savve long Jehovah, and lukim wei wea Jehovah helpem iumi. Taem iumi gohed for lane abaotem Jehovah and obeyim hem, iumi bae lukim wei wea Jehovah blessim and protectim iumi. (Readim Hebrew 6:10-12.) Iumi laek for fren witim Jehovah for olowe! Long nextfala study, bae iumi storyim nara thrifala example bilong olketa wea faithful and wea fren gud witim God.