Waswe, Iu Willing For Comparem Wanem Iu Bilivim Witim Bible?

WASWE, iu Christian? Winim tu billion pipol sei olketa Christian. Diswan minim wanfala long evri thrifala pipol long earth sei olketa Christian. Distaem plande thousand religion stap wea sei olketa Christian, bat wanem olketa bilivim and tingting bilong olketa no semsem. So maet samting wea iu bilivim hem difren from wanem olketa nara Christian bilivim. Waswe, datwan hem gud nomoa? Sapos iu laek for followim wanem Bible talem, hem important for mek sure samting wea iu bilivim hem tru.

Olketa firstfala disaepol bilong Jesus Christ kasem datfala nem “Christian.” (Acts 11:26) Long datfala taem, wanfala grup nomoa olketa Christian. Olketa Christian followim olketa teaching and instruction bilong Jesus Christ. Waswe long religion bilong iu? Waswe, iu tingse religion bilong iu teachim sem samting wea Christ teachim and wea olketa firstfala disaepol bilivim? Hao nao bae iu faendaot? Wanfala wei nomoa stap. Hem nao for comparem wanem religion bilong iu teachim witim olketa teaching bilong Bible.

Tingim diswan: Jesus Christ barava tinghae long olketa Holy Raeting and bilivim datwan nao toktok bilong God. Hem no acceptim olketa wea mekhae long kastom bilong man and go raonem olketa teaching bilong Bible. (Mark 7:9-13) So iumi savve samting wea olketa tru disaepol bilong Jesus bilivim mas kam from Bible. Evri Christian shud ting raonem disfala kwestin: “Waswe, samting wea religion bilong mi teachim hem kam from Bible?” For faendaot, waswe, iu willing for comparem wanem religion bilong iu teachim witim Bible?

Jesus sei iumi mas worshipim God followim samting wea tru, and olketa samting wea tru hem stap insaed long Bible. (John 4:24; 17:17) And aposol Paul sei for iumi sev, iumi mas garem “stretfala savve abaotem olketa tru teaching.” (1 Timothy 2:4) So for iumi kasem laef, samting wea iumi bilivim mas followim olketa tru teaching long Bible!

HAO NAO IUMI SAVVE COMPAREM WANEM IUMI BILIVIM WITIM BIBLE?

Mifala encouragem iu for readim sixfala kwestin long daon and ansa wea kam from Bible. Readim olketa scripture long Bible bilong iu, and ting raonem olketa ansa. Then ting raonem disfala kwestin: “Waswe, samting wea religion bilong mi teachim hem semsem witim samting wea Bible talem?”

Olketa kwestin long daon savve helpem iu for luksavve long samfala important samting. Waswe, iu willing for comparem olketa nara teaching bilong religion bilong iu witim samting wea Bible talem? Olketa Jehovah’s Witness bae hapi for helpem iu for lukluk gud long olketa tru teaching long Bible. Iu savve askem olketa Witness for studyim Bible witim iu, or iu savve go long website bilong mifala, jw.org.

1 KWESTIN: Hu nao God?

ANSA: Jehovah, wea hem Dadi bilong Jesus, hem nao God wea stap for olowe and Creator bilong evri samting.

WANEM BIBLE TALEM:

“Long evritaem wea mifala prea for iufala, mifala thankiu long God wea hem Dadi bilong Lord bilong iumi, Jesus Christ.”—Colossae 1:3.

“Jehovah, wea iu nao God bilong mifala and wea iu garem bigfala paoa, iu nao fit for kasem glory and for evriwan mekhae long iu bikos iu wakem evri samting.”—Revelation 4:11.

Lukim tu Rome 10:13; 1 Timothy 1:17.

2 KWESTIN: Hu nao Jesus Christ?

ANSA: Jesus hem firstborn Son bilong God. God wakem Jesus, so Jesus garem start. Jesus stap anda long God and hem obeyim God and duim wanem Hem laekem.

WANEM BIBLE TALEM:

“Dadi hem winim mi.”—John 14:28.

“[Jesus] hem olsem God wea no eniwan savve lukim. Disfala Son hem firstborn long evri samting wea God wakem.”—Colossae 1:15.

Lukim tu Matthew 26:39; 1 Corinth 15:28.

3 KWESTIN: Wanem nao holy spirit?

ANSA: Holy spirit hem paoa bilong God wea hem iusim for duim wanem Hem laekem. Hem no wanfala man. Pipol savve kasem holy spirit and hem savve strongim olketa.

WANEM BIBLE TALEM:

“Taem Elizabeth herem toktok bilong Mary, pikinini insaed bele bilong hem jamp nao. God givim holy spirit long Elizabeth.”—Luke 1:41.

“Taem iufala kasem holy spirit datwan bae strongim iufala.”—Acts 1:8.

Lukim tu Genesis 1:2; Acts 2:1-4; 10:38.

4 KWESTIN: Wanem nao Kingdom bilong God?

ANSA: Kingdom bilong God hem wanfala gavman long heven. Jesus hem King long Kingdom bilong God. Klosap nao datfala Kingdom bae duim wanem God laekem long full earth.

WANEM BIBLE TALEM:

“Mek-seven angel blowim trumpet bilong hem and olketa voice long skae singaot big olsem: ‘Kingdom bilong God bilong iumi and Christ bilong hem, hem rul ovarem olketa man, and bae hem rul olsem king for olowe.’”—Revelation 11:15.

Lukim tu Daniel 2:44; Matthew 6:9, 10.

5 KWESTIN: Waswe, gudfala pipol bae go long heven?

ANSA: Nomoa. God chusim samfala pipol nomoa for go long heven. Bible kolem olketa faithful wan hia wanfala “smol sekson.” Olketa bae kamap olketa king witim Jesus for rulim olketa man.

WANEM BIBLE TALEM:

“Iufala smol sekson bilong olketa sheepsheep, iufala no fraet, bikos Dadi bilong iufala hem hapi for givim Kingdom long iufala.”—Luke 12:32.

“Bae olketa . . . kamap olketa priest bilong God and bilong Christ, and bae olketa kamap olketa king and rul witim hem.”—Revelation 20:6.

Lukim tu Revelation 14:1, 3.

6 KWESTIN: Wanem nao plan bilong God for disfala earth and olketa man?

ANSA: Taem Kingdom bilong God hem rul, earth bae kamap paradaes and pipol wea faithful bae garem perfect health, stap long peace, and laef olowe.

WANEM BIBLE TALEM:

“God bae givim earth long olketa wea hambol, and olketa bae hapi fogud bikos evriwan bae garem peace.”—Psalm 37:10, 11.

“Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.” —Revelation 21:3, 4.

Lukim tu Psalm 37:29; 2 Peter 3:13.