Hu Nao Kosim Olketa Nogud Samting?

Sapos God no kosim olketa nogud samting, hu nao kosim bigfala hangre, wei for poor tumas, killkill nogud long war, olketa nogud sik, and natural disaster? Bible storyim thrifala main samting wea kosim olketa nogud samting for happen:

1. Pipol Tingim Seleva, Greedy, and Heitim Narawan. “Taem pipol i bosim olketa narafala pipol, so olketa safa.” (Eklesiastes 8:9) Pipol spoelem olketa narawan bikos olketa no perfect, tingim seleva, and raf tumas.

2. Nogud Samting wea Seknomoa Happen. Olketa man kasem nogud samting bikos “samting wea seknomoa happen savve kasem evriwan.” (Ecclesiastes 9:11, NW) Diswan minim pipol kasem nogud samting bikos long accident, stap long rong ples long rong taem, no careful, or olketa mekem mistek.

3. Nogud Ruler Bilong World. Bible talem stret hu nao bihaenem olketa nogud samting wea mekem iumi safa. Hem sei: “Full world hem stap long paoa bilong Satan.” (1 John 5:19) Firstaem Satan hem gudfala angel bilong God bat gogo hem “no gohed followim samting wea tru.” (John 8:44) Olketa nara angel joinim Satan for againstim God and duim samting wea olketa seleva laekem, so olketa kamap olketa demon. (Jenesis 6:1-5) Start long datfala taem, olketa hia nao bihaenem evri nogud samting wea happen long world. Diswan kamap worse long taem bilong iumi. Distaem, Devil barava kros and “laea long evriwan long earth,” wea diswan mekem pipol “kasem barava nogud samting.” (Revelation 12:9, 12) Tru nao, Satan hem barava raf ruler. Hem enjoyim tumas for lukim olketa man safa. Satan nao kosim olketa nogud samting for kasem pipol, ino God.

TINGIM DISWAN: Samwan wea barava wicked nomoa bae mekem innocent pipol for safa. Bat God no olsem bikos Bible sei: “God hem love.” (1 John 4:8) From hem garem love, “hard tumas for trufala God duim olketa nogud samting, and for Olmaeti God duim samting wea no stret!”—Job 34:10, NW.

Bat maet iu ting olsem, ‘Hao long nao bae Olmaeti God letem Satan for gohed rul?’ Olsem iumi storyim finis, God heitim olketa nogud samting wea happen, and hem feel nogud tumas taem hem lukim iumi safa. Bible sei tu: “Putim evri wari bilong iufala long hand bilong hem bikos hem tingim iufala.” (1 Peter 5:7) God lovem iumi and garem bigfala paoa for finisim olketa samting wea no followim justice wea mekem iumi olketa man safa.a Nextfala article bae storyim diswan.