Wanem Nao Iu Savve Duim for Enjoyim Wei for Studyim Bible and Kasem Gud Samting?

Joshua readim Law; wall bilong Jericho foldaon and haos bilong Rahab nomoa stap; Joshua apim hand bilong hem taem hem prea

JOSHUA feisim olketa samting wea hard tumas taem hem leadim nation bilong Israel go long Promis Land. Nomata olsem, Jehovah sei bae hem win and hem encouragem hem olsem: ‘Yu mas stanap strong olowe, an yu mas no fraet. Yu mas obeim evri Lo blong mi. An long de an naet yu mas tingting gudfala falom olketa toktok ya, mekem yu save duim evrisamting wea Lo hemi talem. Sapos yu duim olsem, olketa waka blong yu bae hemi save gohed gudfala.’—Josua 1:7, 8.

Long olketa last day, iumi tu feisim olketa hard taem. (2 Tim. 3:1) Olsem Joshua, iumi savve win sapos iumi followim advaes wea Jehovah givim long hem. Iumi savve readim Bible evritaem and followim olketa Bible principle taem test kamap.

Bat, staka long iumi maet faendem hem no isi for studyim Bible bikos hem no wei bilong iumi for study. Wei for studyim Bible hem barava important, so readim datfala box, “Traem Olketa Idea Hia” for lukim samfala gud idea for helpem iumi enjoyim wei for study and kasem gud samting from datwan.

Man wea raetem wanfala psalm sei hem laekem Jehovah for helpem hem savve gud long olketa komand bilong hem bikos hem “hapi tumas” long olketa. (Sams 119:35) Iu savve barava enjoyim wei for studyim toktok bilong God. Long sem wei wea man kasem gold taem hem waka hard for dig deep long graon, iu tu bae faendem olketa naes point wea savve helpem iu sapos iu duim deep study.

Nomata iu no leadim eni nation olsem Joshua, iu tu mas deal witim olketa hard samting. So olsem Joshua, iu mas study and followim samting wea olketa raetem for helpem iu. Taem iu duim datwan, iu tu bae kamap wise and iu bae win.

TRAEM OLKETA IDEA HIA

Prea bifor iu study. Olketa raetem tingting bilong God insaed Bible for mekem iu kasem gud samting. So taem iu readim Bible, askem God for helpem iu minim gud, gohed tingim, and followim wanem iu lanem.—Esra 7:10.
Askem iuseleva olketa kwestin. Taem iu readim Bible or olketa Bible pablikeson tingim olketa kwestin hia: ‘Wanem nao diswan teachim mi abaotem Jehovah? Hao nao diswan join witim message bilong Bible? Hao nao mi savve iusim diswan for helpem narawan?’
Ting raonem wanem iu studyim. Taem iu read, stop lelebet and tingim: ‘Waswe, samting wea mi readim mekem mi feel hao? Why nao datwan mekem mi feel olsem? Hao nao datwan join witim samting wea happen long mi bifor, distaem, or maet long future? Hao nao mi savve followim olketa Bible principle and kaonsel wea mi readim?’ (Job 23:5; Sams 49:3) Then trae for explainim why Jehovah laekem pipol bilong hem for no duim samfala samting or wanem bae kamap sapos olketa no duim wanem hem laekem.—Diutronomi 32:28, 29.
Piksarem samting wea iu readim. Duim diswan taem iu readim wanfala story. Olsem example, tingim taem wea olketa brata bilong Joseph salem hem go long olketa Ishmaelite. (Jenesis 37:18-28) Sapos iu long there, wanem nao iu lukim, herem, and smelem? Tingim hao nao sapos iu wanfala long olketa. Wanem nao feeling and tingting bilong olketa? Taem iu ting raonem bae hem mekem iu garem klia piksa abaotem datfala story and bae iu barava minim gud.
Iusim olketa study tul. Diswan bae helpem iu duim gud research. Savve gud hao for iusim olketa tul wea stap long languis bilong iu long Internet or wea olketa printim. No hol bak for askem narawan for helpem iu lane hao for iusim gud olketa tul hia. Olsem example, datfala Research Index for Olketa Jehovah’s Witness or datfala Watch Tower Publications Index, savve helpem iu faendem information abaotem olketa difren topic and staka scripture long Bible. Iusim olketa appendix wea stap long New World Translation of the Holy Scriptures sapos hem stap long languis wea iu minim. Diswan garem information abaotem ples, taem wea samting happen, olketa measurement and olketa nara samting tu.
Tingim moa olketa main point. Duim diswan bihaen iu study mekem iu no forgetim samting wea iu lanem. Best wei for duim datwan hem for storyim wanem iu lanem witim narawan. Waswe, iu savve iusim long ministry? Sapos iu duim olsem, bae iu no forgetim olketa main point and iu savve iusim wanem iu lanem for helpem olketa narawan.