LESON 11
Hao for Kasem Gud Samting From Bible Reading
Hao, enitaem iu laek for startim wanfala big project bat iu tingse hem hard tumas? For mekem hem isi for iu, maet hem gud for iu divaedem lo olketa smol part. Iu savve duim sem samting tu taem iu laek for readim Bible. Maet iu laek for savve: ‘Hao nao for mi startim disfala big project?’ Lo disfala leson, iumi bae storyim samfala samting wea iu savve duim wea bae helpem iu for enjoyim Bible reading and for hapi for studyim Bible.
1. Why nao iumi shud readim Bible evriday?
Man wea evritaem readim Bible, wea minim “law blo Jehovah” bae hapi and kasem gud samting. (Readim Psalm 1:1-3, NW.) For startim Bible reading blo iu, trae read for tu-thri minute nomoa each day. Taem iu gohed for duim olsem evriday, bae iu barava enjoyim Bible reading blo iu.
2. Wat nao bae helpem iu for kasem gud samting taem iu readim Bible?
For kasem gud samting taem iumi readim Bible, iumi need for stop lelebet and ting abaotem samting wea iumi readim. Iumi shud readim Bible and “tingting gud followim.” (Josua 1:8) Taem iu readim Bible, tingim olketa kwestin hia: ‘Wat nao mi lanem abaotem Jehovah God from diswan? Hao nao mi savve followim diswan lo laef blo mi? Hao nao mi savve iusim olketa scripture hia for helpem olketa narawan?’
3. Wat nao iu savve duim for garem taem for readim Bible?
Hao, hem hard for iu faendem taem for readim Bible? Hem problem wea iumi evriwan garem. Trae for “iusim gud taem” blo iu. (Ephesus 5:16) Iu savve duim diswan taem iu markem taem evriday for readim Bible. Samfala pipol markem taem for readim Bible lo early morning. Olketa narawan markem lunch hour blo olketa for readim Bible. Bat samfala readim Bible lo evening bifor olketa sleep. Wat taem nao hem gud for iu?
DIG GO MOA
Lanem samting wea iu savve duim for mekem Bible reading blo iu interesting, and hao for prepare gud mekem iu kasem gud samting taem iu studyim Bible.
Olsem iumi savve lane for kaikaim olketa difren kaikai, iumi savve lane tu for enjoyim Bible reading
4. Lane for enjoyim Bible reading
Maet hem no isi taem iumi start for readim Bible. Bat iumi savve lane for enjoyim Bible reading, olsem iumi lane for enjoyim wanfala kaikai wea iumi no traem bifor. Readim 1 Peter 2:2, then discussim tugeta disfala kwestin:
Sapos iu readim Bible evriday, iu tingse bae iu enjoyim and laek for gohed readim?
Pleim VIDEO for lukim samting wea samfala duim for enjoyim Bible reading. Then discussim tugeta olketa kwestin hia.
Olsem iumi lukim lo video, wat nao olketa challenge wea olketa young wan winim?
Wat nao helpem olketa for gohed readim Bible evriday?
Wat nao olketa duim for mekem Bible reading blo olketa interesting?
Olketa idea for helpem iu:
Chusim Bible transleison wea gud. Traem New World Translation sapos hem stap lo languis blo iu.
Start witim olketa Bible buk wea interesting lo iu. For samfala idea, lukim chart “Readim Bible evriday.”
Tickim olketa chapter wea iu readim finis. Iusim chart “Keepim Record lo Bible Reading blo Iu” lo buk hia.
Iusim JW Library® app. Iu savve iusim app hia lo phone or tablet blo iu for readim or lisin lo Bible reading lo eni ples.
Iusim olketa appendix lo Tul for Studyim Bible. Olketa appendix hia garem olketa map and olketa chart wea savve mekem reading blo iu interesting tumas.
5. Preparem Bible study blo Iu
Readim Sams 119:34, then discussim tugeta disfala kwestin:
Why nao hem gud for prea firstaem bifor iu readim Bible and for prepare for study?
Wat nao iu savve duim for kasem gud samting from each study? Taem iu redyim wanfala leson lo disfala buk, trae for followim olketa idea hia:
Readim olketa paragraf lo start blo each leson bifor Dig Go Moa sekson.
Readim olketa scripture and trae for minim hao nao hem join witim subject.
Haelaetim olketa main word or toktok wea hem ansa for each kwestin. Diswan bae helpem iu taem iu discussim tugeta datfala leson witim Witness wea study witim iu.
Maet iu laek savve
Olketa Jehovah’s Witness iusim olketa difren Bible transleison. Bat, mifala iusim New World Translation of the Holy Scriptures bikos hem stret, klia, and iusim nem blo God.—Lukim disfala article lo jw.org “Waswe, Bible Bilong Olketa Jehovah’s Witness Hem Difren?”
SAMFALA SAVVE TALEM: “For studyim Bible hem hard waka tumas. Mi busy tumas and mi taed.”
Hao nao tingting blo iu?
MAIN POINT
For kasem gud samting from Bible, markem taem for readim, prea lo Jehovah for helpem iu minim samting wea iu readim, and preparem each study.
Review
Wat nao bae helpem iu for kasem gud samting from Bible?
Wat taem nao iu savve markem for readim and studyim Bible?
Why nao hem gud for preparem each study?
FAENDAOT MOA
Lukim samfala idea wea maet helpem iu for kasem gud samting from Bible reading.
Lanem thrifala wei for readim Bible.
“Hao Nao Bible Savve Helpem Mi?—Part 1: Savve Gud lo Bible blo Iu” (Article lo jw.org)
Lukim wat iu savve duim for enjoyim Bible reading.
“Hao Nao Bible Savve Helpem Mi?—Part 2: Hao for Enjoyim Bible Reading” (Article lo jw.org)
Tekem samfala idea from olketa wea readim Bible for staka year finis.