Hu Nao Nem Bilong God?

Taem iu laek for savve long samwan, first samting iu askem hem nao nem bilong hem. Sapos iu askem God hu nao nem bilong hem, iu tingse bae hem ansarem iu olsem?

“Mi nao [Jehovah], an hem nao nem blong mi!”—Aesaea 42:8.

Waswe, iu herem disfala nem bifor? Sapos nomoa, maet hem bikos staka Bible transleison no iusim tumas nem bilong God or aotem tu datfala nem. Staka taem olketa changem witim datfala title “LORD.” Bat nem bilong God stap klosap 7,000 taem insaed olketa firstfala Bible wea olketa raetem long Hebrew languis. Olketa iusim fofala Hebrew leta for raetem datfala nem, wea long English languis olketa leta hia hem YHWH or JHVH, and olketa transleitim nem hia long Jehovah.

Nem bilong God long Hebrew languis insaed Dead Sea Scrolls — Dead Sea Psalms Scroll First century C.E., HEBREW

Nem bilong God long English languis insaed Tyndale’s translation — Tyndale’s translation 1530, ENGLISH

Nem bilong God long Spanish languis insaed Reina-Valera version — Reina-Valera version 1602, SPANISH

Nem bilong God long Chinese languis insaed Union Version — *Union Version* 1919, CHINESE

Nem bilong God stap insaed olketa Hebrew raeting and hem stap tu long staka nara languis Bible

NEM BILONG GOD BARAVA IMPORTANT

God seleva nem bilong hem important long hem. No eniwan givim nem bilong God bat hemseleva nao chusim nem bilong hem. Jehovah sei: “Nem blong mi nao [Jehovah] an bae evri pipol mas kolem mi long disfala nem olowe nao.” (Eksodas 3:15) Insaed Bible, nem bilong God stap staka taem winim olketa nara title bilong hem olsem Olmaeti, Dadi, Lord, or God, and tu, olketa narafala nem olsem Abraham, Moses, David, or Jesus. Diswan showimaot Jehovah laekem pipol for savve long nem bilong hem. Bible sei: “Lod [Jehovah], hemi gud tumas sapos olketa save dat yu nao yu God hu hemi hae tumas, an yu nao yu King ovarem evri pipol long wol.”—Sams 83:18.

Nem bilong God important long Jesus. Long datfala Our Father or Lord’s Prea, Jesus teachim olketa disaepol for prea olsem long God: “Mifala laekem nem bilong iu for holy.” (Matthew 6:9) Jesus tu prea long God olsem: “Dadi, mekhae long nem bilong iu.” (John 12:28) Main samting long laef bilong Jesus hem for mekhae long nem bilong God dastawe hem prea olsem: “Mi talemaot nem bilong iu long olketa and bae mi gohed for duim olsem.”—John 17:26.

Nem bilong God important long pipol bilong hem. Pipol bilong God bifor luksavve for garem nem bilong God hem protectim and sevem olketa tu. Bible sei: “Nem blong [Jehovah] hemi olsem wanfala sefples, olketa stretfala pipol save go haed long hem.” (Provebs 18:10) “Evriwan hu i prea kam long nem blong mi [Jehovah] fo mi helpem olketa, bae mi sevem olketa.” (Joel 2:32) Bible showimaot pipol wea garem nem bilong God bae difren from olketa nara pipol. Bible sei: “Evri nara pipol bae duim samting wea showimaot olketa garem nem bilong god bilong olketa, bat iumi bae duim samting wea showimaot iumi garem nem bilong God bilong iumi Jehovah for olowe.”—Micah 4:5, NW; Acts 15:14.

MINING BILONG NEM HIA SHOWIMAOT WANEM?

God nomoa fit for garem datfala nem. Staka savveman sei mining bilong datfala nem Jehovah nao, “Hem Savve Duim Eni Samting.” Taem Jehovah God story long Moses abaotem hemseleva, wanem hem talem showimaot mining bilong nem bilong hem. Hem sei: “Mi Bae Duim Eni Samting wea Mi Laek for Duim.” (Exodus 3:14, NW) So mining bilong nem bilong God showimaot hem garem paoa for creatim evri samting, and hem garem paoa tu for duim eni samting and hem savve iusim eni samting or eniwan for mekem plan bilong hem kamap tru. Olketa title wea God garem showimaot position and paoa bilong hem, bat nem bilong hem, Jehovah, hem showimaot evri samting abaotem hem and evri samting wea hem savve duim.

God tingim iumi. Mining bilong nem bilong God showimaot hem gohed lovem creation bilong hem. And tu, from God talem hu nao nem bilong hem, datwan showimaot hem laekem iumi for savve long hem. Hem talem hu nao nem bilong hem longtaem kam finis. Tru nao, God no laekem iumi for ting long hem olsem God wea farawe and no interest long iumi, bat hem laekem iumi for savve hem really stap and iumi savve fren witim hem.—Sams 73:28.

Man wea iusim nem hia hem fren gud witim God. Tingim diswan, sapos iu laek fren witim samwan bae iu talem hem for iusim nem bilong iu. Hao nao bae iu feel sapos hem no laek for iusim nem bilong iu taem hem story long iu? Gogo, bae iu tingse hem no really laek for fren witim iu. God tu hem olsem. Jehovah talem iumi nem bilong hem, and hem encouragem iumi for iusim datfala nem. Taem iumi duim olsem, iumi showimaot long Jehovah iumi laek for fren witim hem. Iu savve, hem luksavve tu long “olketa hu i tinghevi long [“nem,” NW]” bilong hem!—Malakae 3:16.

First samting wea bae helpem iumi for savve long God, hem for savve long nem bilong hem. Bat iumi mas duim moa samting tu. Iumi mas savve hu nao hem and olketa wei bilong hem.

HU NAO NEM BILONG GOD? Nem bilong God hem Jehovah. Nem hia fitim God nomoa bikos hem garem paoa for mekem plan bilong hem kamap tru

HU NAO WAKEM GOD?

Staka pipol nao garem datfala kwestin. Maet iu tu wanfala. Maet pipol askem kwestin hia bikos olketa garem tingting olsem: Sapos samwan wakem universe and evri samting insaed, hu nao wakem God?

Olketa scientist sei evri samting long universe hem garem start. Diswan hem fitim wanem firstfala verse long Bible talem wea sei: “Long firstaem, God wakem skae and earth.”—Genesis 1:1, NW.

Hem no mek sense for sei universe hem wakem hemseleva. For wanfala samting hem stap, samwan nao mas wakem. Sapos nomoa, disfala full universe, and iumi olketa man tu, bae no stap distaem. Sapos samwan no wakem wanfala samting, then datfala samting bae no stap tu. So wanfala creator mas stap! Hem wanfala spirit wea garem bigfala paoa and nem bilong hem Jehovah.—John 4:24.

Bible sei olsem abaotem God: “God, bifoa long taem wea yu wakem disfala wol an yu no mekem olketa maonten yet, yu bin stap olowe finis. Yu nao yu God, an bae yu gohed fo stap olowe nao.” (Sams 90:2) So, God no garem start. Gogo, hem start for wakem disfala universe.—Revelation 4:11.