Waswe, Dae Bae Finis?

NOMATA first parents blo iumi, Adam and Eve, disobey and pasim sin and dae lo evri man, diswan no changem plan blo God for iumi olketa man. God talem tu-thri taem insaed Bible hao plan blo hem nating change.

• “Olketa stretfala pipol i onam lan wea [Jehovah] hemi bin promisim fo olketa, an bae olketa stap long hem olowe.”—Sams 37:29.

• “Lod [Jehovah] nao bae hemi finisim dae, an draemap tias blong evriwan.”—Aesaea 25:8.

• “Dae nao hem lastfala enemy wea bae hem finisim.”—1 Corinth 15:26.

• “No eniwan bae dae and no enitaem bae pipol sorre or krae or feelim pain tu.”—Revelation 21:4.

Waswe, bae God “finisim dae?” Olsem Bible talem, ‘olketa stretfala pipol bae stap olowe.’ Bat Bible talem tu “no eni stretfala man hemi stap long disfala wol, no eniwan hemi stret fogud.” (Eklesiastes 7:20) So waswe, for finisim dae, God bae forgetim standard blo hem? Barava nomoa nao! Bible sei, “God . . . no savve laea.” (Titus 1:2) Sapos olsem, wanem nao bae God duim for mekem plan blo hem for iumi olketa man kamap tru?

RANSOM FINISIM DAE

Jehovah God givim wanfala ransom for sevem iumi olketa man from dae. From iumi olketa man sin and iumi evriwan bae dae, Bible hem sei: “No eniwan long olketa savve baem bak brata blo hem, or givim wanfala ransom long God for hem, (Price for peim bak laef blo olketa hem hae tumas and no eniwan long olketa bae fit for peim datwan).”—Psalm 49:7, 8, NW.

Taem man wea sin hem dae, hem free from olketa sin blo hemseleva nomoa. Hem no savve sevem hemseleva, and hem no fit for mekem narawan free from sin. (Rome 6:7) Iumi needim man wea perfect and wea no garem sin for hem dae, no for olketa sin blo hemseleva, bat for iumi evriwan.—Hebrew 10:1-4.

Hem nao wanem God hem duim. Hem sendem kam son blo hem, Jesus, for born lo earth, and hem no garem sin. (1 Peter 2:22) Jesus sei hem kam “for givim laef bilong hem, wea datwan hem price for baem bak staka pipol.” (Mark 10:45) Hem dae for olketa sin blo iumi mekem iumi savve laef olowe.—John 3:16.

WAT TAEM NAO BAE DAE FINIS?

Profesi lo Bible hem kamap tru distaem. Iumi stap lo taem wea “evri samting hem hard tumas,” wea showimaot iumi stap lo “olketa last day” blo disfala world. (2 Timothy 3:1) Olketa last day bae finis lo “taem wea God bae judgem and finisim pipol wea no obeyim hem.” (2 Peter 3:3, 7) Bat pipol wea lovem God bae God sevem olketa and bae olketa “laef olowe.”—Matthew 25:46.

Staka million pipol bae garem chance for kasem laef olowe taem olketa laef bak. Taem Jesus go lo taon blo Nain, hem mekem wanfala young boy for laef bak. From boy hia nomoa pikinini blo datfala widow woman, Jesus “barava sorre” lo hem and mekem hem laef bak. (Luke 7:11-15) And tu, aposol Paul sei: “Biliv bilong mi . . . hem for God bae mekem pipol wea raeteous and pipol wea no raeteous for laef bak.” Disfala hope hem showimaot bigfala love wea God garem for iumi olketa man.—Acts 24:15.

Staka billion pipol savve luk forward for kasem laef olowe. Bible hem sei: “Bae olketa stretfala pipol i onam lan . . . , an bae olketa stap long hem olowe.” (Sams 37:29) Lo datfala taem, olketa bae kasem disfala nambawan samting wea aposol Paul storyim samting olsem 2,000 year go finis: “Dae, iu lus nao bikos paoa bilong iu for mekem pipol safa hem finis!” (1 Corinth 15:55) Dae, wea hem main enemy blo iumi olketa man bae finis nao!