Waswe, Iu Savve Finis?
Sinagog Long First-Century: Disfala piksa showimaot samfala samting insaed wanfala sinagog long first century. Olketa faendem building olsem long Gamla (Gamala), wanfala ples wea stap 10 kilometer long northeast long Sea long Galilee. Diswan helpem iumi for garem idea abaotem lukluk bilong wanfala sinagog bifor.
Wanem taem nao olketa Jew start for iusim sinagog?
DISFALA nem “sinagog” hem kam from wanfala Greek word wea minim “hipap” or “wei for hipap tugeta.” Disfala nem hem fitim bikos start kam long bifor, olketa sinagog hem ples wea olketa Jew savve hipap for lane and for worship. Olketa Hebrew Scripture no story abaotem olketa sinagog, bat olketa Christian Greek Scripture showimaot long first century C.E. kaen ples olsem for hipap hem stap finis.
Staka savveman sei olketa Jew start for wakem sinagog taem olketa stap olsem prisoner long Babylon. Wanfala buk wea storyim history sei: “Olketa Jew wea prisoner long Babylon no garem Temple for worship. From olketa stap farawe and needim comfort long hard taem wea olketa kasem, olketa savve hipap tugeta, maet long Sabbath, for readim olketa Holy Raeting.” (Encyclopaedia Judaica) Taem olketa Jew kamap free, luk olsem olketa gohed for meet tugeta for prea and readim olketa Holy Raeting, and olketa wakem olketa sinagog long eni ples wea olketa stap.
Long first century C.E., olketa Jew wea stap raon long Mediterranean Sea, Midol East, and Israel, olketa iusim olketa sinagog olsem main ples for worship and for duim olketa nara samting. Lee Levine wea hem professor bilong The Hebrew University of Jerusalem sei: “[Olketa sinagog] hem ples for study, kaikai tugeta long taem bilong olketa holy celebration, holem olketa kot case, keepim selen bilong community, and ples for holem olketa meeting bilong community and politik tu. Bat main samting nao, sinagog hem ples for worship.” Dastawe Jesus evritaem go long sinagog for worship. (Mark 1:21; 6:2; Luke 4:16) Hem savve teach and encouragem tu olketa wea kam for worship long there. Bihaen Christian kongregeson start, aposol Paul tu preach staka taem insaed sinagog. Paul savve pipol wea interest long olketa spiritual samting nao savve go long olketa sinagog, dastawe taem hem kasem eni taon, staka taem olketa sinagog nao first ples hem go for preach long hem.—Acts 17:1, 2; 18:4.