Hao for Iusim Olketa Example Bilong Hao for Startim Story
1. Hao nao iumi shud ting long olketa example bilong wanem for storyim wea stap long Kingdom Ministry Bilong Iumi?
1 Olketa example bilong wanem for storyim taem iumi offerim olketa magasin and olketa nara pablikeson evritaem stap long Kingdom Ministry Bilong Iumi. Iumi no need for talem barava sem toktok followim olketa example hia taem iumi preach. Olketa hia idea nomoa long wanem for talem. Bae iumi fit for kasem interest bilong pipol sapos iumi talem long toktok bilong iumiseleva. Wei for story olsem iumi duim evriday savve mekem haosholder no fraet and diswan showimaot iumi biliv strong long wanem iumi talem.—2 Cor. 2:17; 1 Thess. 1:5.
2. Why nao iumi need for tingim kastom bilong pipol taem iumi redim wanem for storyim?
2 Changem Hao Iumi Story: Kastom long ples iumi stap savve barava affectim wei wea iumi talemaot gud nius. Waswe, iu savve sei hello fastaem bifor iu storyim wanem iu laek for talem, or waswe, pipol long territory laek herem stret wanem iu bae storyim? Diswan depend long ples man kam from and samfala taem long wanem kaen man nao iu story witim. Man need tu for garem fasin for luksavve long olketa wanem kaen kwestin nao for askem. Olketa kwestin wea olraet nomoa for askem long samfala ples bae no fitim long olketa nara ples. Dastawe, iumi mas garem gudfala tingting and changem story for fitim datfala ples.
3. Why nao hem important for tingim living and tingting bilong pipol iumi story witim?
3 Nara samting, iumi need for tingim living and tingting bilong pipol long territory taem iumi redim wanem for storyim long field service. Olsem example, maet wei wea iu storyim Matthew 6:9,10 witim wanfala strong Catholic bae difren long wei wea iu story long man wea no savve long datfala “Lord’s Prea.” Wei for ting raonem fastaem bae helpem iumi for redim story long wei wea pipol bae barava interest for herem.—1 Cor. 9:20-23.
4. Why nao hem barava important for prepare gud?
4 Nomata iumi ting for iusim olketa example long hao for startim story, wei for prepare gud nao hem barava important. Iumi shud readim gud article or chapter wea iumi ting for storyim and luk aotem olketa point wea bae pullim interest bilong pipol. Then joinim go olketa point hia insaed wanem iumi bae storyim. For mekem iumi barava interest for offerim olketa pablikeson bilong iumi, iumi mas savve gud long nambawan information insaed long olketa.
5. Why nao iumi maet redim wanfala difren wei for startim story, and hao nao iumi savve duim olsem?
5 Olketa Nara Difren Idea: Waswe, iumi mas followim nomoa olketa example bilong hao for startim story? Nomoa. Sapos hem isi for iusim wanfala difren idea or scripture, iusim datwan. Luk aotem chance for storyim nara article wea pipol bae interest long hem, especially witim olketa magasin. Taem Kingdom Ministry givim instruction for duim demonstration long Service Meeting wea iusim olketa idea wea stap insaed, hem gud for iusim idea wea fitim territory bilong kongregeson. For duim olsem bae helpem evriwan for talemaot gud nius long gudfala wei.