Iusim Gud Taem Bilong Iu
1 Wei wea iumi laek mekem Jehovah hapi hem muvim iumi for mekem olketa spiritual samting olsem first samting long laef bilong iumi. Word bilong hem talem iumi for ‘gohed lukaotem firstaem kingdom’ and for “mek sure long olketa samting wea moa important.” (Matt. 6:33; Phil. 1:10) Hao nao iumi savve baem taem from olketa samting wea no important mekem iumi garem taem for duim olketa samting for kingdom, and mek sure olketa samting wea no important hem no kamap main samting long laef?—Eph. 5:15-17.
2 Olketa Samting Bilong Kingdom Kamap First: Markem taem, mekem iu no westem taem long olketa samting wea no important. Samfala markem olketa taem for duim field ministry long kalenda bilong olketa for each month. Then olketa mek sure no eni nara samting spoelem olketa plan hia. Iumi tu savve duim olsem long wei for baem taem from olketa nara samting for attendim olketa meeting, convention, and for duim study seleva. Staka garem schedule for readim Bible evriday long morning or long naet. Markem taem for each important samting, and no letem eni nara samting spoelem datwan.—Eccl. 3:1; 1 Cor. 14:40.
3 No Busy Tumas Witim Samting Bilong World: Long samfala kantri hem isi tumas for busy witim sports, hapitaem, olketa samting wea man seleva interest for duim, and samfala nara samting moa. Staka iusim tumas taem for lukluk television or lukluk video, visitim and story witim olketa relative. Bat wei for iusim tumas taem long hapitaem and olketa nara samting bae lead go nomoa long wei for sorre. (1 John 2:15-17) Dastawe Bible encouragem iumi for no mekius evribit long world. (1 Cor. 7:31) Sapos iu obeyim datfala wise kaonsel, iu showim long Jehovah hao worship bilong hem nao first samting long laef bilong iu.—Matt. 6:19-21.
4 Disfala world hem klosap for finis. Olketa wea duim olketa samting bilong Kingdom firstaem bae hapi and God bae acceptim olketa. (Prov. 8:32-35; Jas. 1:25) So iumi laek for iusim gud taem bilong iumi from hem wanfala barava important samting.