Wanem Samting Nao Important Long Laef Bilong Iu?
1 Hao nao iu bae ansarem datfala kwestin? Hem tru, iumi evriwan laek for aftarem olketa samting long saed bilong Kingdom firstaem. (Matt. 6:33) Bat maet iumi askem iumiseleva, ‘Waswe, olketa samting wea mi chusim long laef bilong mi hem showimaot datwan?’ Bible encouragem iumi olsem: “Gohed lukluk long wanem kaen man nao iufala.” (2 Cor. 13:5) Hao nao iumi savve pruvim long iumiseleva hao iumi aftarem Kingdom firstaem?
2 Hao Iumi Iusim Taem Bilong Iumi: Firstaem hem gud for chekim hao nao iumi iusim taem bilong iumi. (Eph. 5:15, 16) Haomas taem long week nao iumi iusim for kaban witim olketa fren, lukluk long television, sidaon for story nating long haos and wakabaot nating nomoa, or aftarem hapitaem? Maet iumi sapraes sapos iumi raetem daon haomas taem iumi spendem long olketa samting hia, and markem witim haomas taem iumi iusim long olketa spiritual samting. Waswe, iumi waka ovataem for kasem staka material samting bat iumi no duim holy service long God? Haomas taem nao iumi missim olketa meeting or ministry from iumi go lukluk long wanfala plei or iumi go long garden?
3 Markem Olketa Samting wea Important: Staka long iumi no garem taem for duim evri samting wea iumi laek for duim. Dastawe for aftarem olketa samting bilong Kingdom firstaem, iumi need for luksavve long “olketa samting wea moa important,” then iumi markem taem for olketa samting hia. (Phil. 1:10) Samfala long olketa samting hia hem wei for studyim Word bilong God, tekpart long ministry, lukaftarem famili, and go long olketa Christian meeting. (Ps. 1:1, 2; Rom. 10:13, 14; 1 Tim. 5:8; Heb. 10:24, 25) Olketa nara samting olsem for go exercise and gudfala hapitaem hem helpem iumi tu. (Mark 6:31; 1 Tim. 4:8) Bat olketa samting olsem wea no important tumas, olketa mas no stopem iumi for aftarem olketa samting bilong Kingdom.
4 Wanfala young brata hem aftarem olketa samting bilong Kingdom firstaem, taem hem startim full-taem ministry winim wei for kasem hae education for faendem wanfala waka long world. Hem lanem wanfala difren languis and hem muv go for serve long ples wea garem bigfala need. Hem sei: “Mi barava enjoyim assignment bilong mi long hia. Ministry long hia hem barava naes tumas! Bae hem gud tumas sapos evri young wan duim sem samting wea mi duim and kasem hapi olsem wea mi kasem. No eni samting hem winim wei for iusim evri samting iumi garem for servem Jehovah.” Tru nao, iumi savve kasem plande blessing taem iumi aftarem Kingdom firstaem, bat samting wea moa important, datwan mekem Father bilong iumi long heven, Jehovah, hem hapi.—Heb. 6:10.