Branch Leta
Dear Olketa Kingdom Pablisa:
From iumi waka hard, iumi kasem blessing from Jehovah long last service year. Evriwan long 42 kongregeson and 9 isolated grup busy for invaetem olketa interest wan long Memorial. Iumi hapi for celebratem Memorial witim 7,411 wea attend. Hem showimaot iumi garem “staka samting for duim long waka bilong Lord.” (1 Cor. 15:58) Iumi mas gohed for helpem olketa interest wan for kam long klinfala worship bilong Jehovah!
For preachim gud nius bilong Kingdom and teachim olketa niu wan for kamap disaepol bilong Jesus, 45 spesol pioneer and 217 regular pioneer stap front long iumi olsem example. Klosap 100 pioneer attendim Pioneer Service Skul long August. Taem mifala kasem niu textbuk for disfala pioneer skul, olketa pioneer wea serve for longfala taem finis bae attendim disfala skul moa.
Niu service year wea start long September 2005 bae kamap spesol year for Solomon Islands branch. Taem iu kasem disfala Kingdom Ministry Bilong Iumi, samfala brata wea serve olsem international servant arrive finis for buildim niu branch. Iumi thankiu long olketa brata wea kam for helpem waka bilong iumi.
Long semtaem iumi mas gohed for buildim olketa Kingdom Hall evriwea long Solomon Islands. Iumi kasem 11 Kingdom Hall finis. Sapos hem will bilong Jehovah, long niu service year iumi bae buildim nara faevfala Kingdom Hall.
Diswan minim bigfala need stap for garem olketa construction volunteer for niu branch building, and for help long olketa niu Kingdom Hall. Waswe, iumi ‘willing for givim iumiseleva olsem olketa dew drop?’ (Ps. 110:3) Mifala hapi for kasem plande construction application. And tu, iumi wanwan savve markem goal for kasem olketa nara privilege. Waswe, iu tingim Bethel Service, Ministerial Training Skul, and Regular Pioneer Service? Sapos iu tingim olketa privilege hia and prea abaotem olketa, iu savve askem wanfala application pepa from olketa elder.
Samfala parents tekem kam olketa pikinini long branch office for tour. Olketa parents encouragem young wan for markem goal for kamap Bethelite and sei, “Bae iu waka long hia, haos bilong God.” Olketa Bible student and interest wan visitim branch and sapraes for lukim wanfala part bilong organization bilong Jehovah. Waswe, iu visitim branch office finis? Mifala bae hapi for welkamim iufala sapos iu kam.
Evri hard waka hia for saed bilong Kingdom hem gud tumas! Mifala barava thankiu long wei wea iufala sapotim waka hia witim olketa contribution bilong iufala. (Prov. 3:9, 10) Mifala prea for Jehovah blessim wei wea iumi waka tugeta ‘for mekem hem kasem praise and glory.’ (Eph. 1:12) Mifala luk forward for lukim iufala long olketa “Obeyim God” Distrik Convention.
Olketa brata bilong iufala,
Solomon Islands Branch Office