Branch Leta

Dear Olketa Kingdom Pablisa:

Mifala hapi for lukim wei wea waka hem muv ahed long Solomon Islands branch territory long 2007 service year! Total bilong 152 regular and spesol pioneer attendim 8-fala Pioneer Service Skul wea kamap long kantri, and olketa barava helpem preaching waka for gohed gud. Niu branch construction bilong iumi wea gohed distaem hem givim gudfala witness long pipol. Wanfala bisnisman hem sei: “Waka bilong iufala hem barava hae standard, and wei wea olketa white man and blak man wan mind for waka tugeta and kaikai tugeta hem barava nambawan.”

Klosap 38,000 copy bilong Kingdom Nius No. 37, wea garem title: “Klosap Nao False Religion Bae Finis!” iumi givimaot evriwea long Solomon Islands branch territory. Bihaen wanfala inactive sista long America kasem copy bilong datfala Kingdom Nius, hem no savve sleep gud. Long next Sunday bihaen hem kasem datwan, hem attendim meeting and ask for wanfala Bible study. From iumi givimaot olketa Memorial invitation pepa long March, 8,326 attendim Memorial long April 2, 2007. Namba bilong olketa wea attend hem hae winim olketa year bifor.

Main goal for duim olketa spesol waka olsem hem for helpem olketa wea garem honest heart lanem really samting wea Bible teachim. (Matt. 28:19, 20) Taem iu preach, no forgetim olketa wea iu kasem wea interest, and duim return visit witim goal for startim Bible study. Mifala hapi for waka tugeta witim iufala long disfala important waka, and mifala sendem kam Christian love.

Olketa brata bilong iufala,

Solomon Islands Branch Office