Hao Nao Mifala Savve Help?
1 Taem Olketa Jehovah’s Witness herem disaster kasem wanfala ples long world, plande taem olketa askem disfala kwestin, “Hao nao mifala savve help?” Olsem datfala story long Acts 11:27-30 showimaot, taem bigfala wei for hangre kamap long Judea, olketa Christian long first century givim help.
2 Long taem bilong iumi, olketa legal samting saed long organization bilong iumi mekem organization fit for iusim selen for helpem olketa wea safa from natural disaster or disaster wea kamap from samting wea man duim, and tu, for eni narataem wea need kamap.
3 Olsem example, last year plande brata and sista givim selen for helpem olketa long South Asia wea datfala tsunami disaster affectim olketa. Olketa brata and sista barava tinghae long disfala wei for givim donation long organization. Bat, for fitim law long samfala kantri olketa mas iusim datfala selen only for samting wea man wea givim datwan hem markem for hem nomoa and for iusim insaed taem wea olketa markem tu, nomata olketa brata kasem help finis or nomoa.
4 Dastawe, taem iumi givim olketa donation for helpem olketa brata olsem hem moabeta for givim for waka raonem full world. Datfala selen hem for helpem olketa wea needim help and for sapotim spiritual need bilong olketa Christian brata. Bat, sapos wanfala man laek for givim donation separate from olketa contribution for waka raonem world, hem bae olraet tu and datfala selen hem stap for iusim taem eni need kamap. Bat, hem bae gud sapos man wea givim donation no markem firstaem hao for iusim datfala selen, or markem wanem disaster nao for iusim datfala selen for hem.
5 Disfala direction for givim olketa donation for waka raonem world bae mekem selen stap redi for evri part bilong Kingdom waka, winim wei for holem selen hia go kasem taem disaster kamap. Diswan fitim samting wea Ephesians 4:16 talem, hao iumi waka tugeta for givim samting wea ‘body needim for mekem hem grow long love.’