Hao for Help Bihaen Wanfala Disaster

Distaem, olketa natural disaster savve happen staka taem. Taem disaster kamap, evriwan mas waka gud tugeta for provaedem relief and disfala waka mas organize gud. For duim datwan, Governing Body arrangem for evri branch office for setimap wanfala Disaster Relief Department.

Taem disaster happen, olketa brata lo datfala department kwiktaem faendaot from olketa elder lo kongregeson wat kaen help nao bae olketa pablisa needim. If damage hem big winim wat olketa pablisa savve deal witim, branch office bae assignim olketa brata wea qualify for leadim datfala relief waka. Olketa brata maet ask for samfala kam volunteer or for donatem samfala samting wea olketa needim, or maet olketa peim and distributim olketa relief supply lo olketa kongregeson.

Taem iumi followim disfala arrangement, staka gud samting savve kamaot. Bae hem stopem wei for dabolem olketa waka, wei for konfius, and wei for weistim selen and material. Diswan savve happen if olketa brata duim samting followim own tingting blo olketa.

Olketa brata hia wea branch appointim savve disaedem haomas selen and haomas volunteer nao bae olketa needim for duim relief waka. Olketa savve contactim tu olketa wea waka lo gavman, wea diswan savve helpem relief waka blo iumi for kwiktaem kasem olketa brata wea needim help. So each wan shud no trae for kolektem selen, sendem relief supply, or travel go lo ples wea disaster happen sapos olketa no askem datwan.

Nomata olsem, taem disaster happen, iumi laek for help. (Heb 13:16) Iumi lovem olketa brata and sista blo iumi! Wat nao iumi savve duim? Samting wea barava important for duim, hem for prea for olketa wea disaster affectim olketa and for olketa wea duim relief waka. Iumi savve givim tu olketa donation for waka blo iumi evriwea lo world. Anda lo direction blo Governing Body, olketa branch office nao luksavve lo best wei for iusim olketa selen hia for help. And sapos iumi laek for volunteer for help, iumi savve fillimap disfala form Local Design/Construction Volunteer Application (DC-50).

WATCHIM VIDEO BIGFALA FLOOD WEA KASEM BRAZIL, AND THEN ANSAREM KWESTIN HIA:

Wat nao iu tinghae lo hem abaotem relief waka blo Olketa Jehovah’s Witness bihaen flood wea kasem Brazil lo 2020?