Help wea Isi for Faendem
1. Wanem nao savve mekem man wikdaon long spiritual wei?
1 Anna, wanfala sista wea hasband no wanfala Witness, and wea waka bilong hem for selen iusim plande taem bilong hem, faendem hem hard for evritaem attendim olketa Christian meeting, tekpart long ministry and for studyim Word bilong God. Nomata hem still lovem Jehovah hem kamap inactive. Bat hem hapi from hem kasem spiritual help from olketa elder wea tingim hem.
2. Long wanem wei nao evri Christian savve kamap help wea isi for faendem?
2 Man showimaot hem depend long Jehovah taem hem acceptim spiritual help from Christian kongregeson. Olketa elder long kongregeson showimaot sem loving kea olsem Jesus taem olketa lukaotem olketa chance for givim encouragement and help wea fitim long olketa wea faendem hard for aftarem olketa spiritual samting. (1 Thess. 5:14) Plande taem wanem man needim nomoa hem kaenfala toktok from Bible for encouragem hem. Wei for helpem olketa wea wik long spiritual wei hem samting evri Christian savve duim, no olketa elder nomoa. For sure, iumi evriwan kasem naesfala “toktok . . . long barava taem” from samwan, and datwan hem barava encouragem iumi.—Prov. 25:11; Isa. 35:3, 4.
3, 4. Wanem nao iumi need for duim for helpem olketa narawan, and hao nao for duim datwan?
3 No Weit for Man Askem Help: For showimaot loving interest long olketa wea needim help minim iumi mas firstwan for duim samting, showimaot feeling, and showimaot iumi really kea. Taem Jonathan savve David kasem problem, hem “getap and go long David long Horesh, mekem hem savve strongim hand bilong [David].” (1 Sam. 23:15, 16) Helpem olketa narawan long kaenfala wei. Toktok wea iu talem from iu barava kea savve barava duim gud samting for narawan. And tu, olsem Jesus showimaot, for strongim bak wanfala spiritual brata or sista, iumi need for willing and gohed traem best bilong iumi. (Luke 15:4) Wei for barava laek helpem narawan bae muvim iumi for gohed for help nomata maet hem luk olsem hem bae tek longtaem lelebet for man hia gud bak.
4 Hem barava encouragem man taem iumi invaetem olketa narawan, maet olketa long buk study bilong iumi, for go witim iumi long ministry! Taem iumi helpem servant bilong Jehovah for tekpart long ministry, iumi savve iusim taem hia for encouragem hem for duim moa samting long service bilong God. Olketa naesfala taem tugeta long ministry olsem savve barava encouragem olketa wea trae for kamap strong moa long spiritual wei.
5. Samfala taem, wanem help nao olketa elder savve provaedem?
5 Wanfala Loving Arrangement: Olketa wea no preach or no kam long olketa meeting for longfala taem needim extra help for strongim faith bilong olketa. Maet best samting for helpem olketa nao hem for samwan studyim Worshipim Datfala Only Tru God or Kam Klos Long Jehovah buk witim olketa. From hem baptaes finis, maet no eni need for datfala study gohed for longfala taem. Kongregeson Service Komiti bae lukluk for hu nao fit for kasem gud samting from diswan.—Lukim Kwestin Box bilong November 1998 and November 2000 Kingdom Ministry Bilong Iumi.
6. Hao nao wanfala sista kasem bak strong long spiritual wei?
6 Anna, wea iumi storyim finis, tinghae long wei wea olketa elder arrange for wanfala sista wea mature long spiritual wei for study witim hem. Insaed fofala taem for study nomoa hem kasem bak wei for fren witim Jehovah. Hem start moa for attendim olketa kongregeson meeting and kasem bak feeling for laek praisem Jehovah God long pablik. Datfala mature sista helpem hem long ministry tu long wei for tekem hem long olketa Bible study go kasem taem hem fit moa for preach long haos tu haos. Hem needim nomoa kaenfala help mekem hem start moa for duim olketa spiritual samting!
7. Olketa wanem gud samting nao kamaot from wei for strongim olketa narawan long spiritual wei?
7 For strongim olketa wea garem diskaen need hem mekem evriwan kasem olketa blessing. Datwan wea kasem help hapi from hem fren moa witim Jehovah and duim olketa waka insaed organization bilong Hem. Spiritual wei for muv ahed olsem hem barava mekem olketa elder hapi. (Luke 15:5, 6) Evriwan insaed kongregeson fren gud witim each other and wan mind from olketa showimaot love long each other. (Col. 3:12-14) Iumi garem olketa gudfala reason for followim example bilong Jehovah, wea hem wanfala help wea isi for faendem!—Eph. 5:1.