Iumi Kasem Wanfala Rich Samting
1 Aposol Paul tinghae long assignment God givim hem for preach and hem storyim datwan olsem wanfala ‘rich samting.’ (2 Cor. 4:7) Hem gohed strong long datfala assignment and no givap nomata hem kasem olketa hard taem and persecution. Hem barava waka hard for preach long eniwan wea hem meetim. Long plande gogo bilong hem, hem mas baeleg go or go insaed ship, and olketa gogo hia no isi and hem danger tumas. Hao nao iumi savve followim example bilong Paul and showimaot iumi tinghae long ministry bilong iumi? (Rom. 11:13) Hao nao ministry bilong iumi hem olsem wanfala rich samting wea winim eni nara samting?
2 Wanfala Rich Samting wea Winim Olketa Nara Riches: Plande taem riches wea pipol garem barava no mekem olketa hapi, and gud samting wea olketa kasem from datwan hem smol nomoa and no gohed for olowe. Bat long narasaed, ministry bilong iumi mekem iumi and olketa narawan kasem gud samting for olowe. (1 Tim. 4:16) Hem helpem pipol wea garem honest heart for savve long Jehovah, changem olketa samting long laef bilong olketa wea need for change, and for garem trufala hope for laef olowe. (Rom. 10:13-15) Taem iumi ting long ministry bilong iumi olsem samting wea garem hae price, datwan mekem iumi feel satisfae. Iumi feel olsem iumi duim gud samting and iumi garem wanfala nambawan hope for future.—1 Cor. 15:58.
3 Showimaot Iu Tinghae Long Rich Samting Bilong Iu: Sapos samting hem important long iumi, hem bae showaot long haomas taem nao iumi willing for iusim for datwan. Hem barava spesol privilege for iusim taem and strong bilong iumi for praisem Jehovah! (Eph. 5:16, 17) Wei wea iumi iusim taem bilong iumi shud showimaot olketa spiritual samting hem moa important long iumi winim olketa material samting. From iumi garem samting wea spesol tumas for sharem witim narawan, iumi bae laek for strong for preach and redi evritaem for talemaot gud nius long evri chance iumi garem.
4 Pipol no haedem rich samting wea olketa garem, bat olketa showimaot for olketa narawan lukim and enjoyim. Sapos iumi ting long ministry bilong iumi olsem wanfala rich samting, hem bae kamap main samting long laef bilong iumi. (Matt. 5:14-16) From iumi barava tinghae long privilege wea iumi garem, iumi mas evritaem followim example bilong aposol Paul and iusim evri chance for showimaot iumi barava tinghae long ministry bilong iumi, and ting long hem olsem wanfala rich samting.