Tinghae Long Privilege for Duim Preaching Waka
1. Wanem nao tingting bilong staka pipol long world abaotem preaching waka?
1 Staka pipol long world ting long preaching waka wea iumi duim olsem “krangge samting.” (1 Cor. 1:18-21) Sapos iumi no keakea, datkaen tingting wea no stret savve mekem iumi wikdaon and mekem iumi isisi nomoa for duim preaching waka. (Prov. 24:10; Isa. 5:20) Why nao iumi tinghae long privilege for preach abaotem Jehovah?—Isa. 43:10.
2. Why nao iumi savve sei ministry hem wanfala “holy waka”?
2 “Holy Waka”: Aposol Paul story abaotem ministry bilong iumi olsem wanfala “holy waka.” (Rom. 15:15, 16) Long wanem wei nao hem wanfala “holy waka”? Taem iumi duim ministry, iumi “waka tugeta” witim “datfala Holy God,” Jehovah. Iumi mekem tu nem bilong hem for holy. (1 Cor. 3:9; 1 Pet. 1:15) Long tingting bilong Jehovah, preaching waka hem “wanfala sakrifaes wea iumi givim long [hem],” so ministry hem barava important samting wea iumi duim for worshipim God.—Heb. 13:15.
3. Why nao hem nambawan privilege for preach abaotem gud nius?
3 No staka pipol nao garem privilege for preach abaotem gud nius. Sapos olketa angel duim datfala waka, olketa bae hapi tumas and duim gud tu. (1 Pet. 1:12) Bat Jehovah chusim iumi olketa man wea sin wea olsem “olketa clay pot,” for duim disfala spesol waka!—2 Cor. 4:7.
4. Wanem nao iumi savve duim for showimaot iumi tinghae long ministry?
4 Important Samting: From iumi barava tinghae long privilege wea iumi garem, iumi ting long ministry olsem “samting wea barava important” long laef bilong iumi. (Phil. 1:10) Dastawe iumi markem taem evri week for duim preaching waka. Wanfala man wea plei soccer for national team bae tinghae long datfala privilege. Hem bae practice gud firstaem bifor team hem plei and gohed for kamap gud evritaem. Long sem wei tu, iumi laek for prepare gud firstaem bifor iumi duim ministry mekem iumi savve “iusim long stretfala wei datfala toktok bilong God wea tru” and traem best for “teach long gudfala wei.”—2 Tim. 2:15; 4:2.
5. Hu nao tinghae long ministry bilong iumi?
5 Iumi mas no letem nogud tingting bilong pipol abaotem preaching waka for mekem iumi wikdaon. Tingim hao staka pipol long territory tinghae long preaching waka. Iumi no preach for pipol hapi long iumi. Bat, iumi preach bikos iumi savve datwan mekem Jehovah hapi and hem tinghae long wanem iumi duim.—Isa. 52:7.