“Gohed for Duim Diswan” Memorial Bae Kamap Long April 5
1. Why nao hem important for kam long Memorial?
1 “Gohed for duim diswan for showimaot iufala rememberim mi.” (Luke 22:19) Jesus talem datfala toktok for olketa disaepol for olketa mas celebratem dae bilong hem. Day wea Jesus hem dae hem barava important and spesol long olketa Christian bikos long evri samting wea kamaot from datwan. Disfala year Memorial bae kamap long April 5. Taem datfala day hem kakam klosap, wanem nao iumi savve duim for showimaot iumi thankiu long Jehovah?—Col. 3:15.
2. Hao nao taem iumi study and ting raonem wanem iumi studyim hem showimaot iumi tinghae long Memorial?
2 Redi: Sapos man ting long samting wea bae happen hem important, hem savve redi for datwan. Iumi evriwan long famili savve redyim heart bilong iumi taem iumi studyim tugeta and ting raonem olketa samting wea happen long Jesus long olketa day bifor hem dae. (Ezra 7:10) Samfala scripture for readim hem stap long kalenda and Lukluk Long Olketa Scripture Evriday. Bat full list bilong olketa scripture and olketa chapter bilong Nambawan Man buk wea storyim olketa scripture hia, hem stap long Wastaoa bilong April-June 2011, page 17-18.
3. Wanem moa iumi savve duim for showimaot iumi tinghae long Memorial?
3 Preach: Taem iumi traem best long ministry, datwan tu showimaot iumi tinghae long dae bilong Jesus. (Luke 6:45) Start long Saturday, March 17, iumi bae duim wanfala spesol waka for invaetem pipol for kam long Memorial. Datfala waka bae kamap evriwea long world. Waswe, iu savve changem samfala samting long schedule bilong iu mekem iu savve duim moa samting long ministry or plan for auxiliary pioneer? Hem gud for storyim diswan witim famili long next Famili Worship.
4. Olketa wanem gud samting nao iumi savve kasem taem iumi kam long Memorial?
4 Iumi savve kasem gud samting taem iumi kam long Memorial evri year! Taem iumi ting raonem wei wea Jehovah hem kaen tumas and givim kam spesol Son bilong hem for dae for iumi, datwan mekem iumi hapi and barava lovem hem. (John 3:16; 1 John 4:9, 10) Datwan mekem iumi for no duim nomoa wanem iumiseleva laekem. (2 Cor. 5:14, 15) Hem encouragem iumi tu for laek praisem Jehovah long ministry. (Ps. 102:19-21) Tru nao, pipol bilong Jehovah barava luk forward for kam long Memorial long April 5 for ‘talemaot Lord hem dae.’—1 Cor. 11:26.