Worshipim Jehovah Olsem Wanfala Famili
1 Long taem bifor, olketa member long famili duim tugeta plande samting. Olketa duim waka tugeta long haos and barava important samting nao olketa worshipim Jehovah olsem wanfala famili. (Lev. 10:12-14; Deut. 31:12) Long plande kantri distaem, olketa member long famili no duim plande samting tugeta. Bat olketa Christian luksavve wei wea hem important for famili duim samting tugeta, especially saed long worship. For sure Man wea startim famili hem hapi for lukim olketa famili wan mind for worshipim hem!
2 Preach Tugeta: Wei for waka tugeta for preachim gud nius hem savve strongim famili. Dastawe, elder savve preach witim olketa narawan long kongregeson, bat hem bae evritaem preach witim waef and olketa pikinini bilong hem tu. (1 Tim. 3:4, 5) Nomata olketa traveling overseer garem busy schedule, olketa tu arrangem taem for preach witim waef bilong olketa long ministry.
3 Olketa dadi and mami wea preach witim olketa pikinini bilong olketa fit for helpem olketa muv ahed olsem olketa wea talemaot gud nius. Olketa pikinini bae no just lukim hapi and wei for satisfae wea dadi and mami bilong olketa garem long ministry, bat bae olketa lukim tu wei wea olketa showimaot love bilong olketa for Jehovah and nara pipol. (Deut. 6:5-7) Hem important for parents gohed preach witim olketa pikinini nomata taem olketa start for kamap big. Wanfala hasband and waef evritaem go long ministry witim thrifala pikinini bilong tufala wea age bilong olketa midolwan long 15 and 21. Dadi hem sei: “Mitufala teachim olketa evritaem. And mitufala mek sure preaching waka hem samting for enjoyim, wea savve encouragem olketa.”
4 Prepare Tugeta: Olketa famili kasem gud samting long wei for prepare tugeta for ministry. Plande taem olketa pikinini enjoyim wei wea olketa member long famili practice witim olketa long wei for wanfala act olsem pablisa wea preach and for narawan act olsem haosholder. Samfala iusim tu-thri minute for duim diswan bihaen long famili study.
5 Hapi bilong iumi savve kamap moa big taem iumi share witim famili bilong iumi long olketa important waka wea mekem man satisfae. Hem wanfala hapi samting for olketa famili member for waka tugeta long field ministry from haos tu haos and for duim olketa return visit and conductim olketa Bible study! Taem iu worshipim Jehovah witim famili bilong iu long wei olsem, iu savve hapi for talemaot: “Mi and famili bilong mi, mifala bae servem Jehovah.”—Josh. 24:15.