Nambawan Goal for Niu Service Year
1. Wanem goal nao maet hem gud for iumi tingim for niu service year?
1 Iumi mas markem olketa goal sapos iumi laek for muv ahed long spiritual wei. Olketa wanem goal nao iu markem for iuseleva for niu service year? Wanfala nambawan goal hem for duim auxiliary pioneer maet for wan or tufala month. From man mas plan gud for duim disfala hapi waka, distaem nao hem gud taem for start for ting raonem datwan. Why nao hem gud for tingim auxiliary pioneer olsem wanfala goal?
2. Why nao hem gud for markem auxiliary pioneer olsem wanfala goal?
2 Olketa Reason for Auxiliary Pioneer: Wei for duim auxiliary pioneer hem helpem iumi for mekem Dadi bilong iumi long heven hapi “long bigfala wei moa” long wei for iusim moa taem long ministry. (1 Thess. 4:1) Taem iumi tingim evri samting wea Jehovah duim for iumi, heart bilong iumi hem muvim iumi for helpem olketa narawan for savve long hem. (Ps. 34:1, 2) Jehovah lukim and hem tinghae long olketa sakrifaes bilong iumi for duim moa samting long ministry. (Heb. 6:10) Wei for savve hao hard waka bilong iumi hem mekem Jehovah hapi, hem mekem iumi tu for kasem bigfala hapi.—1 Chron. 29:9.
3, 4. Wanem gud samting nao iumi kasem from wei for auxiliary pioneer?
3 Plande taem, taem iu duim wanfala samting evritaem hem mekem hem moa isi and iu start for enjoyim datwan. Wei for iusim moa taem long ministry bae helpem iu for barava story gud taem iu preach from haos tu haos. Bae iu savve go moa long wei for startim story and wei for iusim Bible. Wei wea iu storyim strongfala biliv wea iu garem long God, hem strongim go moa datwan. Plande wea no conductim yet wanfala Bible study fit for startim wanfala taem olketa duim auxiliary pioneer.
4 And tu, maet wei for auxiliary pioneer hem encouragem iumi for strong moa for followim spiritual schedule bilong iumi. Wanfala brata wea hem regular pioneer bifor, hem luksavve hao hem iusim plande taem tumas long waka bilong hem. Hem disaed for duim auxiliary pioneer for wanfala month. Hem sei: “Mi barava sapraes tumas hao wanfala month wea mi auxiliary pioneer hem barava strongim mi long spiritual wei! Mi disaed nao for gohed auxiliary pioneer, wea diswan lead go for mi kamap moa wanfala regular pioneer.”
5. Wanem nao iumi savve duim for winim feeling for tingse iumi no fit?
5 Winim Olketa Hardfala Samting: Maet samfala hol bak for markem goal for auxiliary pioneer bikos olketa tingse olketa no garem inaf savve for preach. Sapos diswan nao mekem iu for hol bak, Jehovah savve helpem iu olsem wei wea hem helpem Jeremiah. (Jer. 1:6-10) Nomata Moses hem “no savve toktok gud,” Jehovah iusim hem for duim will bilong Hem. (Ex. 4:10-12) Sapos iu tingse iu no fit, askem Jehovah for strongim iu.
6. Wanem nao iumi savve duim mekem iumi fit for auxiliary pioneer nomata iumi garem problem saed long health or busy schedule?
6 Waswe, iu hol bak for auxiliary pioneer bikos iu garem olketa problem saed long health or busy schedule? Sapos iu no strong tumas, wei for duim samting wea fitim maet mekem iu fit for auxiliary pioneer. Sapos iu garem busy schedule, maet iu savve muvim olketa samting wea no important for narafala month bihaen. Samfala wea garem full-taem waka fit for baem taem for auxiliary pioneer taem olketa markem wan or tufala holiday for duim datwan.—Col. 4:5.
7. Why nao hem gud for prea abaotem auxiliary pioneer?
7 Hao for Duim: Prea abaotem wei wea iu laek for auxiliary pioneer. Askem Jehovah for blessim wei wea iu waka hard for duim moa samting long ministry bilong iu. (Rom. 12:11, 12) Hem savve helpem iu for mekem olketa wise disison abaotem wei for changem schedule bilong iu. (Jas. 1:5) Sapos heart bilong iu no muvim iu for laek duim auxiliary pioneer, askem Jehovah for helpem iu kasem hapi long preaching waka.—Luke 10:1, 17.
8. Long wanem wei nao maet wei for followim samting wea Proverbs 15:22 hem mekem iu fit for auxiliary pioneer?
8 Story abaotem goal for auxiliary pioneer olsem wanfala famili. (Prov. 15:22) Maet olketa member long famili savve sapotim wanfala member wea duim auxiliary pioneer. Storyim wei wea iu laek for pioneer witim olketa insaed kongregeson, especially olketa wea garem sem living olsem iu. Diswan savve muvim olketa narawan for laek auxiliary pioneer.
9. Wanem nao olketa month wea maet iu chusim for auxiliary pioneer?
9 Taem iu reviewim theocratic schedule bilong iu for niu service year, wanem taem nao maet hem fitim iu for auxiliary pioneer? Sapos iu waka full taem or go long skul, maet iu laek for tingim olketa month wea garem holiday or wea garem faevfala Saturday or faevfala Sunday. Olsem example, September, December, March, and August garem faevfala Saturday and faevfala Sunday. Month bilong May garem faevfala Saturday, and month bilong June garem faevfala Sunday. Sapos iu garem problem saed long health, hem gud for tingim olketa month wea garem gudfala weather. Maet iu tingim tu for pioneer long month wea circuit overseer visit kam long kongregeson bilong iu. Insaed long visit bilong hem, bae iu garem chance for joinim first haf bilong meeting witim olketa regular pioneer. From Memorial bae kamap long March 22 next year, March, April, and May hem gudfala taem for auxiliary pioneer. Taem iu chusim wanfala month or winim wea iu laek for auxiliary pioneer, start for raetem wanfala schedule wea bae mekem iu fit for kasem hour bilong iu.
10. Wanem nao iu savve duim sapos hem no fitim for iu auxiliary pioneer?
10 Nomata sapos iu tingse iu no fit for auxiliary pioneer long niu service year, iu savve gohed for strong long ministry. Gohed for duim evri samting wea iu savve duim long ministry, and feel sure hao Jehovah hem hapi long wei wea iu waka hard witim full soul bilong iu. (Gal. 6:4) Sapotim and encouragem olketa wea fit for auxiliary pioneer. Maet iu savve changem schedule bilong iu for share long ministry long eni extra day wea fitim iu witim olketa wea duim pioneer waka.
11. Why nao iumi shud barava tingim wei wea end hem klosap?
11 Pipol bilong Jehovah barava tingim wei wea end hem klosap. Wanfala waka nao iumi need for duim wea hem nao wei for preachim gud nius. Laef bilong pipol hem stap long danger, and taem wea stap yet hem short. (1 Cor. 7:29-31) Love for God and neiba bae muvim iumi for duim best bilong iumi long ministry. Sapos iumi waka hard and plan gud, maet iumi fit for auxiliary pioneer for wanfala month or winim insaed niu service year—wanfala nambawan goal for iumi kasem!