Plan Distaem for Duim Moa Samting Long Preaching Waka
1. Long taem bilong Memorial, hem chance for iumi duim wanem, and hao nao iumi savve redi?
1 Long March, April, and May, wea hem taem bilong Memorial, hem chance for “praisem Jehovah long bigfala wei.” (Ps. 109:30) Waswe, iu laek duim moa samting long preaching waka long March, for showimaot iu tinghae long God wea givim ransom? Hem gud for plan distaem.—Prov. 21:5.
2. Wanem nao iu and olketa narawan duim long April last year, taem olketa announcem olketa auxiliary pioneer savve duim 30 hour?
2 Duim Auxiliary Pioneer: Last year olketa kongregeson hapi tumas for herem hao long April olketa auxiliary pioneer savve duim 30 hour nomoa. Wanfala brata hem sei: “Mi still skul yet and mi no savve regular pioneer. Bat bae mi apply for auxiliary pioneer long April for duim 30 hour and trae for kasem 50 hour.” Wanfala sista wea waka full-taem hem sei: “Mi savve kasem 30 hour!” Taem olketa announcem datwan, wanfala sista wea pioneer bifor wea winim 80 year distaem hem sei: “Diswan hem chance bilong mi for pioneer moa! Jehovah savve taem mi pioneer bifor mi barava hapi!” Olketa narawan wea no savve duim auxiliary pioneer waka, olketa markem samfala goal for duim moa samting long preaching waka.
3. Why nao hem gud for duim auxiliary pioneer long March, April, and May?
3 Long March hem gudfala taem for duim auxiliary pioneer waka, bikos iumi garem chance moa for duim 30 or 50 hour. And tu, start long Saturday March 17, iumi bae duim wanfala spesol waka for askem pipol wea interest for kam long Memorial long April 5. From staka enjoyim auxiliary pioneer waka long March, maet olketa bae hapi for gohed auxiliary pioneer long April and May for duim 50 hour.
4. Wanem nao bae helpem iumi for duim moa samting long preaching waka, and wanem nao bae kamaot from datwan?
4 Long next Famili Worship, maet hem gud for famili storyim hao each wan savve duim moa samting long preaching waka long taem bilong Memorial. (Prov. 15:22) Prea long Jehovah for blessim waka bilong iufala. (1 John 3:22) Taem iu duim moa samting long preaching waka, iu bae praisem Jehovah and iu bae hapi tumas.—2 Cor. 9:6.