Comfortim Olketa wea Feel Sorre
1 Iumi need for givim comfort distaem winim enitaem bifor. Taem iumi followim lead bilong King bilong iumi, Christ Jesus, iumi tu waka for “bandagem olketa pipol wea feel sorre.”—Isa. 61:1.
2 Hao for Givim Comfort: For comfortim pipol, story bilong iumi long ministry shud barava encouragem man. Taem iumi no storyim tumas olketa false teaching and olketa nogud fasin bilong disfala world iumi mekhae long olketa trufala samting from Bible and olketa nambawan promis bilong God wea givim iumi hope. Diswan no minim iumi no story abaotem Armageddon. Waka bilong iumi hem for talemaot “year for Jehovah showimaot hem hapi and day bilong God bilong iumi for pei bak,” and for “talem [man] for lusim wicked wei bilong hem.” Bat warning abaotem Armageddon and for storyim wei for distroe hem shud no spoelem story bilong disfala gud nius bilong kingdom bilong God.—Isa. 61:2; Ezek. 3:18; Matt. 24:14.
3 From Haos tu Haos: Evritaem iumi savve faendem pipol wea feel sorre bikos long sik, samwan wea olketa lovem hem dae, samting wea no followim justice, or problem saed long selen. Olsem pipol wea followim Christ, “feeling for sorre” hem muvim iumi for showimaot fasin for feel sorre long olketa wea iumi meetim long ministry. (Luke 7:13; Rom. 12:15) Nomata iumi readim wan or tufala scripture wea storyim datfala problem, iumi mas “kwiktaem for lisin” tu taem man talemaot tingting bilong hem. (Jas. 1:19) Sapos iumi lisin firstaem, bae iumi fit nao for givim comfort.
4 Taem iumi gohed for story, maet iumi sei, “Mi laek for sharem naesfala toktok from Bible wea bae encouragem iu.” Iumi shud iusim gudfala tingting mekem iumi no againstim evri samting wea datfala man hem talem. Goal bilong iumi hem for givim encouragement and comfort long wei for iusim Bible for strongim heart bilong hem. Saed long diswan, maet iu luk long Reasoning From the Scriptures page 117-121 anda long heding “Encouragement.” Or maet iu givim long haosholder disfala tract Comfort for Pipol wea Feel Sorry and storyim samting insaed wea encouragem hem.
5 Lukaotem Chance for Comfortim Narawan: Waswe, iu savve long wanfala neiba, man wea iu waka witim, pikinini wea iu skul witim, or famili member wea needim comfort? Hem gud for visitim olketa pipol hia long haos bilong olketa witim goal for sharem comfort from Bible. Iu savve redi for givim comfort from iu savve finis long need bilong olketa. Samfala raetem leta or story long telephone for comfortim olketa. Trufala love for nara man bae muvim iumi for showimaot feeling and for givim comfort wea hem needim from Bible.—Luke 10:25-37.
6 Tru tumas, iumi garem waka for comfortim olketa wea feel sorre and for storyim hope abaotem gudfala future. Diswan nao hem comfort wea pipol evriwea long world needim. Taem iumi hapi for story abaotem staka gudfala samting wea God promisim, diswan bae mekem olketa wea garem honest heart for kasem comfort and hope. Iumi laek for evritaem rememberim need for bandagem olketa pipol wea feel sorre.