Helpem Olketa wea Feel Sorre for Feel Gudfala Moa
1. Why nao olketa wea feel sorre laek for feel gud?
1 Iumi barava feel nogud tumas taem samwan wea iumi lovem hem dae. Diswan hem barava tru for olketa wea no garem Kingdom hope. (1 Thess. 4:13) Staka pipol garem tingting olsem: ‘Why nao pipol savve dae? Wea nao olketa go? Enitaem bae mi lukim hem moa?’ Distaem bae iumi storyim samfala samting wea iumi savve duim for mekem olketa wea feel nogud long dae bilong wanfala relative or wanfala fren bilong olketa for feel gud.—Isa. 61:2.
2. Sapos samwan hem talem hao hem feel sorre, waswe, fitim iumi for story longtaem tumas?
2 From Haos tu Haos: Maet samwan talem long iumi hao samwan long famili bilong hem dae no longtaem go nomoa. Waswe, hem barava luk sorre? Waswe, staka relative wea luk sorre tumas stap long haos? Long olketa taem olsem, maet hem gud for no story longtaem tumas. (Eccl. 3:1, 7) Maet iumi savve talem hao iumi feel sorre for herem datwan, givim hem wanfala tract, magasin, or brochure wea fitim, and go nao. Iumi savve kam bak long taem wea fitim hem for iusim Bible for helpem hem for feel gud.
3. Long taem wea fitim, olketa wanem scripture nao iumi savve storyim long man wea feel sorre?
3 Samfala taem, maet iumi luksavve hao hem fitim iumi for story longtaem lelebet long man olsem. Long datfala taem, hem no stret for tok daonem olketa, maet iumi savve readim samting wea Bible promisim abaotem hao pipol bae laef bak. (John 5:28, 29) Or iumi savve showim long hem samting wea Bible talem abaotem olketa wea dae finis. (Eccl. 9:5, 10) For mekem olketa feel gud, maet iumi storyim wanfala story long Bible abaotem wanfala man wea laef bak. (John 11:39-44) Narafala wei, hem for ting raonem toktok bilong datfala faithful man Job wea barava trustim Jehovah. (Job 14:14, 15) Bifor iumi go maet iumi givim long olketa wanfala buk olsem, Wanem Nao Happen Long Iumi Taem Iumi Dae?, Taem Samwan wea Iu Lovem Hem Dae, eni nara brochure or eni tract wea fitim. Or maet iumi givim Wanem Bible Teachim buk and talem olketa for readim chapter 6, and markem taem for iumi go bak for gohed long datfala story.
4. Wanem nao olketa nara taem wea iumi savve mekem man feel gud?
4 Olketa Nara Taem: Sapos wanfala funeral tok hem kamap long Kingdom Hall, waswe, samfala wea no Witness bae kam tu? Putim olketa buk wea savve helpem olketa for feel gud long ples wea hem isi for olketa lukim mekem olketa savve tekem. Samfala taem, announcement long niuspepa abaotem wanfala funeral hem gudfala taem for raetem wanfala shortfala leta for mekem samfala famili wea feel sorre for feel gud. Wanfala leta olsem wea garem samfala tract long hem kasem wanfala man wea waef bilong hem dae. Disfala man and gele bilong hem tufala go long haos bilong datfala pablisa and askem hem olsem: “Waswe, iufala nao sendem kam disfala leta hia? Iu savve, mi laek for savve moa abaotem Bible!” Datfala man and gele bilong hem talem hao tufala laek for studyim Bible and tufala start for kakam tu long olketa kongregeson meeting.