Kwestin Box

◼ Waswe, dadi and mami evriwan savve kaontem hour for famili study?

Dadi nao garem main waka for lukaftarem olketa pikinini “for stretem olketa and lanem olketa long tingting bilong Jehovah,” bat dadi and mami waka tugeta for lanem pikinini bilong tufala. (Eph. 6:4) Bible talem olketa pikinini: “Lisin, son bilong mi, long discipline bilong dadi bilong iu, and no lusim law bilong mami bilong iu.” (Prov. 1:8) Famili Bible study nao nambawan wei wea olketa mami and dadi savve lanem pikinini bilong olketa.

Long bifor, dadi or mami wea conductim study nomoa savve kaontem hour wea hem duim famili study witim pikinini wea no baptaes, nomata tufala evriwan nao share long datfala study. Bat distaem hem change lelebet. Sapos dadi and mami share tugeta long study for lanem pikinini, tufala evriwan savve reportim hour, bat no savve reportim winim wanfala hour. Plande mami and dadi iusim winim wanfala hour evri week for lanem pikinini bilong olketa. For lanem pikinini, mami and dadi tugeta mas waka hard evritaem. (Deut. 6:​6-9) Bat wanem iumi reportim evri month shud showim wanem iumi duim long preaching waka. Dastawe, hem fitim for reportim wanfala hour nomoa, nomata sapos study hem winim wanfala hour, or nomata sapos study kamap tu-thri taem long week, or sapos olketa pikinini wanwan garem study. Dadi or mami nomoa bae reportim datfala famili study and wanfala return visit for evri week wea olketa duim study.