“Gohed Kasem Gud Samting From Love Bilong God”
1. Wanem nao disfala buk “Gohed Kasem Gud Samting From Love Bilong God” helpem iumi for duim?
1 Iumi barava luk forward for studyim disfala niu buk “Gohed Kasem Gud Samting From Love Bilong God” long Kongregeson Bible Study start long week bilong April 9, 2012! Datfala leta wea Governing Body raetem for evri brata and sista wea lovem Jehovah, hem finis witim disfala toktok: “Mifala barava hope disfala buk bae helpem iu for followim wanem iu lanem long Bible mekem iu ‘gohed kasem gud samting from love bilong God, and garem hope for laef olowe.’—Jude 21.”
2. Hao nao disfala niu buk bae helpem iumi long evri samting iumi duim?
2 Wanem Iumi Bae Studyim: Olketa wanem Bible principle nao savve helpem iumi saed long hu nao for fren witim, hapitaem, wei for respectim olketa wea garem paoa, wei bilong iumi, marit, toktok, and olketa kastom and celebration? Iumi bae trainim konsens bilong iumi followim samting wea Bible sei hem stret. (Ps. 19:7, 8) Taem iumi barava savve long tingting bilong Jehovah, iumi bae obeyim hem long evri samting iumi duim from iumi laek for mekem hem hapi.—Prov. 27:11; 1 John 5:3.
3. Why nao iumi mas traem best for tekpart long study evri week?
3 Disaed Strong for Tekpart: Taem iu prepare, goal bilong iu hem for praisem Jehovah witim pipol bilong hem wea hipap tugeta long olketa meeting. (Heb. 13:15) Evriwan long kongregeson bae studyim tugeta disfala niu buk. From iumi bae garem tu-thri paragraf nomoa for studyim, iumi evriwan savve barava prepare gud, and datwan bae mekem iumi no fraet for givim koment. Olketa short koment wea iumi redyim gud bae encouragem olketa narawan for showimaot love and duim olketa gudfala samting, wea datwan savve mekem iumi enjoyim study. (Heb. 10:24) And tu, iumi bae barava hapi taem iumi talemaot faith bilong iumi.
4. Why nao hem barava important for obeyim olketa law bilong Jehovah?
4 Long naet bifor Jesus hem dae, hem storyim wei for obeyim olketa law bilong Jehovah savve mekem man kasem gud samting from love bilong God. (John 15:10) Datfala buk “Love Bilong God” bae helpem iumi for followim olketa Bible principle long evri samting iumi duim and for ‘iumi kasem gud samting from love bilong God.’—Jude 21.