Gohed for Duim Samting Mekem God Lovem Iu
“Gohed for duim olketa samting wea bae mekem God lovem iufala, and garem hope for laef olowe taem iufala weitim Lord bilong iumi Jesus Christ for sorre long iumi.”—JUDE 21.
1, 2. Wanem nao Jehovah duim wea showimaot hem lovem iumi? Why nao iumi savve God bae no gohed for lovem iumi sapos iumi duim eni samting nomoa?
JEHOVAH GOD showimaot hem lovem iumi long plande difren wei. Nambawan wei wea Jehovah showimaot hem barava lovem olketa man hem taem hem sendem Son bilong hem long earth for hem nao dae for iumi. (John 3:16) Jehovah duim diswan bikos hem laekem iumi for laef olowe, and hem laekem iumi tu for kasem gud samting olowe from love bilong hem!
2 Bat waswe, bae Jehovah gohed for lovem iumi sapos iumi duim eni samting nomoa? Nomoa. Jude verse 21 hem sei: “Gohed for duim olketa samting wea bae mekem God lovem iufala, and garem hope for laef olowe taem iufala weitim Lord bilong iumi Jesus Christ for sorre long iumi.” Datfala toktok “gohed for duim olketa samting wea bae mekem God lovem iufala” hem showimaot iumi nao mas duim samfala samting. So wanem nao iumi mas duim mekem God lovem iumi?
Wanem Nao Iumi Mas Gohed Duim Mekem God Lovem Iumi?
3. Wanem nao Jesus mas duim sapos hem laekem Dadi bilong hem for lovem hem?
3 Samting wea Jesus talem long lastfala naet wea hem stap long earth ansarem datfala kwestin. Hem sei: “Sapos iufala obeyim olketa law bilong mi, iufala bae gohed kasem gud samting from love bilong mi, olsem mi tu obeyim olketa law bilong Dadi long heven and gohed kasem gud samting from love bilong hem.” (John 15:10) Jesus luksavve hem mas obeyim olketa law bilong Jehovah sapos hem laekem Dadi bilong hem for lovem hem. Sapos perfect Son bilong God ting olsem, iumi tu mas ting olsem!
4, 5. (a) Wanem big samting nao iumi savve duim for showimaot iumi lovem Jehovah? (b) Why nao iumi mas no tingse hem wanfala hevi for iumi obeyim olketa law bilong Jehovah?
4 Big samting wea iumi duim for showimaot iumi lovem Jehovah hem taem iumi obeyim hem. Aposol John hem sei: “Sapos iumi lovem God, diswan hem minim iumi obeyim olketa law bilong hem, from olketa law bilong hem no wanfala hevi.” (1 John 5:3) Hem tru, staka pipol distaem no laek for obeyim olketa nara man. Bat tingim datfala toktok: “Olketa law bilong hem no wanfala hevi.” Jehovah no askem iumi for duim samting wea hard for iumi duim.
5 Tingim diswan: Waswe, bae iu askem fren bilong iu for karem samting wea hevi tumas and iu savve hem no fit for karem? Nomoa! Jehovah hem kaen winim iumi and hem savve wanem iumi fit for duim and wanem iumi no fit for duim. Bible hem sei Jehovah “no forgetim iumi dust nomoa.” (Ps. 103:14) Hem bae no askem iumi for duim samting wea iumi no fit for duim. So iumi mas no tingse hem wanfala hevi for iumi obeyim olketa law bilong Jehovah. Bat iumi obeyim Jehovah bikos iumi laek showim long Dadi bilong iumi long heven iumi barava lovem hem and iumi laekem hem for lovem iumi tu.
Spesol Present From Jehovah
6, 7. (a) Wanem nao conscience? (b) Storyim tokpiksa wea showimaot conscience savve helpem iumi duim olketa samting mekem God lovem iumi.
6 From laef distaem hem no isi, iumi mas disaedem staka samting for showimaot iumi obeyim God. Wanem nao bae helpem iumi for savve olketa samting wea iumi disaedem hem followim tingting bilong God? Jehovah givim iumi wanfala present wea savve helpem iumi for obey. Hem nao conscience. Wanem nao datwan? Conscience hem spesol samting wea mekem iumi lukluk gud long wanem iumi duim, tingting bilong iumi, and wanem iumi laek for duim. Hem olsem samting insaed long iumi wea judgem iumi. Hem helpem iumi for luksavve sapos samting wea iumi laek duim or samting wea iumi duim finis hem gud or nogud, hem stret or no stret.—Readim Romans 2:14, 15.
7 Wanem nao samfala wei wea conscience bilong iumi savve helpem iumi? Tingim sapos iu laek go long wanfala ples wea iu no savve. Iu no go seleva bat iu go witim man wea kasem finis datfala ples. Sapos man hia savve gud long road for kasem datfala ples, hem bae leadim iu. Sapos iu go followim hem, bae iu no lus. Long sem wei tu, man wea leadim iu hem olsem conscience bilong iu. Sapos iumi no garem conscience for leadim iumi, iumi hard for disaedem stret samting.
8, 9. (a) Wanem nao samfala samting wea savve mekem conscience bilong iumi no waka gud? (b) Wanem nao iumi savve duim mekem conscience bilong iumi helpem iumi?
8 Bat samfala taem conscience bilong iumi no savve waka gud tu. Why nao olsem? Tingim tokpiksa wea iumi storyim finis. Sapos man wea leadim iu hem konfius, maet hem leadim iu go long difren ples. Long sem wei tu, sapos iumi disaedem samting followim wanem heart bilong iumi laekem, wanem nao bae happen? Conscience bilong iumi bae leadim iumi go rong sapos iumi tingim nomoa wanem iumiseleva laekem. Bible warnim iumi olsem: “Heart hem savve trikim man winim eni nara samting and hem duim nomoa eni samting wea hem laekem.” (Jer. 17:9; Prov. 4:23) Nara samting tu, sapos iu no laek followim wanem man wea leadim iu hem talem and iu laek go followim nara road wea iu tingse hem nao stret wan, maet iu no kasem ples wea iu laek go long hem. Long sem wei tu, sapos iumi no laek followim wanem Bible talem wea leadim iumi long stretfala wei, maet conscience bilong iumi no savve helpem iumi. (Ps. 119:105) Plande pipol long world laek kasem olketa samting wea heart bilong olketa laekem and no tingim stretfala samting wea God talem long Bible. (Readim Ephesians 4:17-19.) Dastawe nomata staka pipol garem conscience, olketa duim olketa rabis samting.—1 Tim. 4:2.
9 Iumi mas no olsem pipol hia! Bat iumi mas gohed for studyim Bible mekem conscience bilong iumi savve helpem iumi. Iumi mas followim wanem conscience bilong iumi talem wea followim Bible, and no duim nomoa samting wea iumiseleva laekem. Iumi mas trae hard tu for respectim conscience bilong olketa brata and sista long kongregeson bikos tingting bilong iumi evriwan no semsem. Iumi trae hard for no duim eni samting wea bae mekem olketa stambol, from iumi luksavve samting wea wanfala brata disaedem maet hem no semsem witim iumi.—1 Cor. 8:12; 2 Cor. 4:2; 1 Pet. 3:16.
10. Wanem thrifala samting nao bae iumi storyim?
10 Bae iumi storyim thrifala samting wea iumi savve duim for showimaot iumi lovem Jehovah and obeyim hem. Long thrifala samting hia, iumi mas iusim conscience bilong iumi, bat conscience bilong iumi mas followim olketa toktok long Bible mekem hem leadim iumi for duim stret samting. Thrifala samting nao hem: (1) Iumi lovem pipol wea Jehovah lovem, (2) iumi respectim olketa wea God markem for leadim iumi, and (3) iumi trae hard for stap klin.
Lovem Pipol wea Jehovah Lovem
11. Why nao iumi mas lovem pipol wea Jehovah lovem?
11 First wan, iumi mas lovem pipol wea Jehovah lovem. Tingim disfala tokpiksa. Sapos iumi putim wanfala smol pis matres insaed long wata, hem bae fulap witim wata. Iumi olsem tu taem iumi kaban witim pipol. Hem isi tumas for iumi followim wanem olketa narawan duim. Jehovah hem savve olketa wea iumi fren witim savve spoelem iumi or helpem iumi. Dastawe hem sei: “Man wea fren witim pipol wea wise bae hem wise, bat man wea fren witim pipol wea krangge bae hem kasem trabol.” (Prov. 13:20; 1 Cor. 15:33) No eniwan long iumi laek for “kasem trabol” bat iumi laek for “wise.” From Jehovah barava wise finis hem no savve wise go moa. No eniwan savve spoelem olketa gudfala wei bilong hem. Hem showimaot nambawan example long hao for chusim olketa fren. Tingim diswan. Wanem kaen man nao Jehovah chusim for kamap fren bilong hem?
12. Wanem kaen man nao Jehovah laekem for kamap fren bilong hem?
12 Jehovah sei Abraham hem ‘fren bilong hem.’ (Isa. 41:8) Abraham barava faithful long God, hem duim stret samting, and hem obeyim God. Evri samting wea hem duim showimaot hem garem faith long God. (Jas. 2:21-23) Kaen man olsem nao Jehovah laekem for kamap fren bilong hem. Hem laekem semkaen pipol distaem tu for kamap fren bilong hem. Sapos Jehovah chusim olketa kaen fren olsem, iumi tu mas chusim olketa fren wea wise mekem iumi kamap wise!
13. Wanem nao bae helpem iumi chusim olketa gudfala fren?
13 Wanem nao savve helpem iu for chusim olketa gudfala fren? Hem gud for study abaotem olketa wea Bible storyim. Tingim olketa hia wea fren gud tugeta, olsem Ruth and mami-in-law bilong hem Naomi, David and Jonathan, and Timothy and Paul. (Ruth 1:16, 17; 1 Sam. 23:16-18; Phil. 2:19-22) Wanfala samting nao mekem evriwan hia fren gud tugeta. Olketa barava lovem Jehovah. Waswe, iu savve garem olketa fren wea lovem Jehovah olsem iu? Iu savve faendem staka gudfala fren olsem long kongregeson. Olketa hia bae no mekem iu duim eni samting wea bae mekem Jehovah no hapi. Bat olketa bae helpem iu for obeyim Jehovah, fren gud witim hem, and duim olketa samting wea followim wei bilong holy spirit. (Readim Galatians 6:7, 8.) Olketa bae helpem iu gohed for duim olketa samting wea bae mekem God lovem iu.
Respectim Olketa Man wea God Markem for Leadim Iumi
14. Why nao hem no isi for iumi respectim olketa wea leadim iumi?
14 Mek-tu samting wea iumi savve duim for showimaot iumi lovem Jehovah hem for respectim olketa man wea God markem for leadim iumi. Why nao samfala taem hem no isi for iumi duim datwan? Wanfala samting nao, olketa man hia no perfect. Nara samting, iumiseleva tu no perfect and hem wei bilong iumi man for no laek followim wanem nara man talem.
15, 16. (a) Why nao iumi mas respectim olketa wea Jehovah markem for lukaftarem pipol bilong hem? (b) Wanem nao iumi lanem from tingting bilong Jehovah abaotem wanem olketa Israelite duim for againstim Moses?
15 Maet iu tingting olsem, ‘Sapos hem no isi for iumi respectim olketa wea leadim iumi, why nao iumi mas duim datwan?’ For ansarem datfala kwestin, iumi mas tingim hu nao fit for rulim evri samting. Hu nao bae iu chusim for rulim iu? Sapos iumi laekem Jehovah nao for rulim iumi, iumi mas respectim hem. Sapos iumi no respectim hem, hard for iumi sei hem nao rulim iumi! Nara samting tu, Jehovah iusim olketa man wea no perfect for lukaftarem pipol bilong hem. Sapos iumi no laek followim samting wea olketa man hia talem, wanem nao tingting bilong Jehovah long wanem iumi duim?—Readim 1 Thessalonians 5:12, 13.
16 Tingim taem olketa Israelite komplen and againstim Moses. Taem olketa duim nogud samting long Moses, Jehovah tingim datwan olsem olketa duim nogud samting long hem. (Num. 14:26, 27) Tingting bilong God nating change. Sapos iumi no laek followim olketa wea hem markem for leadim iumi, iumi againstim hem nao!
17. Wanem stretfala tingting nao iumi mas garem long olketa wea leadim iumi long kongregeson?
17 Samting wea aposol Paul talem showimaot stretfala tingting wea iumi mas garem long olketa wea leadim iumi long kongregeson. Hem sei: “Obeyim olketa wea leadim iufala and stap anda long olketa, from olketa mas ansa long hao olketa lukaftarem iufala, mekem olketa hapi for duim diswan and no sorre, from datwan bae spoelem iufala.” (Heb. 13:17) Hem tru, iumi mas waka hard for obeyim olketa and stap anda long olketa. Bat tingim hao iumi duim diswan from iumi laekem God for gohed lovem iumi. Iumi bae kasem staka gud samting sapos iumi waka hard for duim datwan!
Jehovah Laekem Iumi Stap Klin
18. Why nao Jehovah laekem iumi for stap klin?
18 Mek-thri samting wea iumi savve duim for showimaot iumi lovem Jehovah hem for stap klin. Olketa mami and dadi waka hard for helpem pikinini stap klin. Why nao olsem? Hem bikos datwan bae helpem pikinini for healthy and hapi. Nara samting tu, sapos pikinini hem klin, pipol bae tinghae long famili bilong hem. Hem bae showimaot mami and dadi lovem and tingim pikinini bilong hem. Jehovah tu tingim olketa samting hia and hem laekem iumi for klin. Hem savve sapos iumi klin datwan bae helpem iumi for healthy. Jehovah savve datwan bae mekem pipol mekhae long hem tu. Datwan nao important tumas. Taem pipol lukim iumi klin and iumi difren from pipol long disfala nogud world, maet datwan mekem olketa for laek worshipim God.
19. Hao nao iumi savve iumi mas klin?
19 Long olketa wanem samting nao iumi mas klin long hem? Long evri samting wea iumi duim. Long Israel bifor, Jehovah talem stret long pipol bilong hem hao olketa mas klin. (Lev. 15:31) Law bilong Moses talem taem olketa go toilet olketa mas berem datwan, olketa mas klinim olketa dish, and wasim hand, leg, and kaleko bilong olketa. (Ex. 30:17-21; Lev. 11:32; Num. 19:17-20; Deut. 23:13, 14) Jehovah talem olketa Israelite hao hem holy, wea minim hem “klin.” Olketa wea worshipim God mas holy tu olsem hem.—Readim Leviticus 11:44, 45.
20. Long olketa wanem samting nao iumi mas klin long hem?
20 So iumi mas klin long body bat wei bilong iumi tu mas stret. Iumi mas waka hard for tingim olketa gudfala samting nomoa. Nomata staka pipol long world olketa durong, iumi mas followim olketa gudfala wei wea Jehovah talem. Barava important samting nao, worship bilong iumi mas stret and iumi mas no followim eni laea teaching. Iumi tingim evritaem disfala toktok long Isaiah 52:11: “Kamaot, kamaot from hem. Iufala mas no tasim eni samting wea no klin. . . . Iufala mas kamaot from datfala ples and iufala mas klin.” Iumi worshipim God long stretfala wei taem iumi no duim eni samting wea join witim false worship. Dastawe iumi no join insaed olketa celebration bilong religion and olketa holiday bilong world. Hem tru, hem no isi for duim stret samting. Bat pipol bilong Jehovah mas waka hard for duim datwan bikos datwan nao bae mekem God gohed lovem olketa.
21. Wanem nao bae helpem iumi for gohed duim olketa samting wea bae mekem God lovem iumi?
21 Jehovah laekem iumi for gohed duim olketa samting wea bae mekem hem lovem iumi for olowe. Bat iumi wanwan mas waka hard for duim datwan. Iumi savve duim olsem taem iumi followim wei bilong Jesus and showimaot iumi lovem Jehovah taem iumi obeyim olketa law bilong Hem. Sapos iumi duim olsem, iumi savve no eni samting “bae spoelem wei wea God lovem iumi wea Lord bilong iumi Christ Jesus showimaot finis.”—Rom. 8:38, 39.
Waswe, Iu Tingim Yet?
• Long wanem wei nao conscience savve helpem iumi duim olketa samting mekem God lovem iumi?
• Why nao iumi mas lovem pipol wea Jehovah lovem?
• Why nao iumi mas respectim olketa wea God markem for leadim iumi?
• Why nao pipol bilong God luksavve hem important for klin?
[Box/Piksa long page 20]
Buk wea Helpem Man Garem Gudfala Wei
Long 2008 distrik convention iumi kasem disfala niu buk “Keep Yourselves in God’s Love.” Disfala buk hem for helpem iumi long wanem wei? Hem helpem olketa Christian for savve long olketa samting wea Jehovah laekem iumi for duim and for tinghae long datwan, bat main samting wea hem storyim hem olketa gudfala wei wea olketa Christian mas garem. Taem iumi studyim gud disfala buk, iumi bae luksavve taem iumi garem olketa gudfala wei wea Jehovah laekem, datwan bae barava helpem iumi distaem and bae mekem iumi laef olowe long future.
Disfala buk tu hem helpem iumi luksavve hem no wanfala hevi for obeyim Jehovah. Bat taem iumi obeyim Jehovah, iumi showimaot iumi lovem hem. Dastawe disfala buk bae helpem iumi for tingim diswan, ‘Why nao mi obeyim Jehovah?’
Taem pipol lusim Jehovah, staka taem datwan hem bikos olketa duim nogud samting and no from olketa no minim gud wanfala teaching. Dastawe hem important for iumi mas barava lovem and tinghae long olketa law and toktok bilong Jehovah! Mifala savve disfala niu buk bae helpem pipol bilong Jehovah long full world for gohed duim stret samting, for showimaot Satan hem man for laea, and for gohed duim olketa samting wea bae mekem God lovem olketa!—Jude 21.
[Piksa long page 18]
“Sapos iufala obeyim olketa law bilong mi, iufala bae gohed kasem gud samting from love bilong mi, olsem mi tu obeyim olketa law bilong Dadi long heven and gohed kasem gud samting from love bilong hem”