Hao for Iusim “Love Bilong God” Buk for Conductim Bible Study
1. Disfala buk “Love Bilong God” hem for wanem?
1 Long 2008 “Holy Spirit Leadim Iumi” Distrik Convention, iumi hapi for kasem disfala buk “Gohed Kasem Gud Samting From Love Bilong God.” Disfala buk hem helpem iumi for savve long olketa samting wea Jehovah laekem iumi for duim and for tinghae long datwan, and hem no for iumi lanem olketa main teaching long Bible. Iumi bae no iusim disfala buk long preaching waka.
2. Hu nao iumi iusim disfala buk for study witim, and hao nao for iusim?
2 Iusim disfala buk for study witim Bible student, bihaen iutufala finisim Wanem Bible Teachim buk. Hem gud for tingim, evri Bible student olketa no semsem. Samfala olketa kwiktaem for lanem truth winim narawan, so conductim study for fitim savve bilong each student. Mek sure student hem minim gud wanem hem lanem. No iusim disfala buk for study witim olketa wea studyim staka buk finis wea no go long olketa meeting and wea no laek for duim samting followim wanem olketa lanem from Bible.
3. Wanem nao iumi shud duim, sapos distaem iumi iusim Worshipim God buk for conductim study?
3 Sapos distaem iu iusim Worshipim God buk for conductim study and iu klosap finisim, maet iu disaed for gohed study for finisim datfala buk and encouragem student for readim seleva “Love Bilong God” buk. Bat sapos nomoa, hem gud for startim disfala “Love Bilong God” buk. Iu savve disaed sapos iu laek for storyim olketa topic long appendix long “Love Bilong God” buk, olsem iu savve duim long Wanem Bible Teachim buk.
4. Wanem nao iumi shud duim sapos student hem baptaes bifor hem finisim tufala buk hia, Wanem Bible Teachim and “Love Bilong God” buk?
4 Sapos student hem baptaes bifor hem finisim tufala buk hia, study shud gohed go kasem taem iutufala finisim “Love Bilong God” buk. Nomata bihaen hem baptaes, iu savve gohed for reportim haomas hour, haomas taem iu duim return visit, and haomas taem iu study witim hem. Sapos wanfala pablisa hem kam joinim study and tekpart, hem savve reportim tu haomas hour long study.
5. Hao nao iumi savve iusim disfala buk “Love Bilong God” for helpem olketa pablisa wea inactive long preaching waka?
5 Sapos wanfala elder long Kongregeson Service Komiti askem iu for study witim samwan wea inactive long preaching waka, maet hem askem iu for studyim tu-thri chapter long “Love Bilong God” buk wea fitim need bilong datfala pablisa. Maet iu no need for study longfala taem witim hem. Disfala buk bae helpem iumi for “gohed kasem gud samting from love bilong God.”—Jude 21.