Preaching Savve Strongim Iumi for Fren Gud Witim Jehovah
1. Hao nao preaching waka savve helpem iumi?
1 Wei for gohed preach savve strongim iumi for fren gud witim Jehovah and mekem iumi for gohed hapi. Hem tru, iumi duim preaching waka bikos iumi laek for mekem Jehovah hapi. Bat wei for obey taem iumi “preach,” savve mekem iumi kasem blessing from Jehovah and helpem iumi tu long samfala wei. (2 Tim. 4:2; Isa. 48:17, 18) So hao nao wei for preach savve strongim iumi and mekem iumi hapi?
2. Hao nao preaching waka savve strongim iumi?
2 Iumi Savve Kasem Strong and Olketa Blessing: Wei for preach savve strongim iumi for tingim evritaem olketa blessing from datfala Kingdom, winim olketa problem wea iumi kasem distaem. (2 Cor. 4:18) Wei for storyim olketa Bible teaching savve strongim faith bilong iumi long olketa promis bilong Jehovah and mekem iumi for gohed tinghae long trufala teaching. (Isa. 65:13, 14) Taem iumi helpem olketa narawan for fren gud witim Jehovah and helpem olketa for “no part long disfala world,” datwan savve strongim iumiseleva tu for no part long disfala world.—John 17:14, 16; Rom. 12:2.
3. Hao nao preaching waka savve helpem iumi for kamap gud go moa long olketa Christian wei?
3 Wei for duim preaching waka savve helpem iumi for kamap gud go moa long olketa Christian wei. Tingim, wei for trae for “kamap evri samting long evrikaen pipol” savve mekem iumi kamap moa hambol. (1 Cor. 9:19-23) Taem iumi story witim olketa wea “garekil and stap olobaot olsem olketa sheepsheep wea no garem eni man for lukaftarem olketa,” mekem iumi feel sorre and tingim olketa. (Matt. 9:36) Iumi savve gohed strong taem iumi no givap nomata pipol no interest or wea againstim iumi. Iumi bae hapi narawe taem iumi gohed for helpem olketa narawan.—Acts 20:35.
4. Hao nao tingting bilong iu abaotem preaching waka wea iu duim?
4 Hem wanfala blessing for iumi duim preaching waka wea praisem Datwan wea fit for kasem worship from iumi! Preaching waka savve strongim iumi. Hem mekem iumi wanwan wea barava ‘duim gud disfala waka for preachim gud nius’ for kasem staka gudfala samting.—Acts 20:24.