Spesol Assembly Day Program for 2010
1. (a) Wanem nao samfala Bible theme bilong olketa spesol assembly day wea go finis? (b) Wanem nao samfala main point from olketa spesol assembly day wea go finis wea helpem iu long ministry?
1 Samfala theme bilong olketa spesol assembly wea go finis hem, “Mek Sure Long Olketa Samting wea Moa Important,” “Gohed Strong for Waka Tugeta,” “Go Ahed for Witness Abaotem Truth,” and “Jehovah Hem Man for Wakem Clay Pot and Iumi Nao Datfala Clay.” (Phil. 1:9, 10, 27; John 18:37; Isa. 64:8) Waswe, iu barava luk forward for attendim spesol assembly day for 2010 service year? Theme nao hem: “Lelebet Taem Nomoa Hem Stap,” wea kam from 1 Corinthians 7:29.
2. Hao nao iumi savve helpem famili for hapi for luk forward long disfala assembly?
2 Bihaen iu herem announcement abaotem spesol assembly day, start for story raonem and helpem famili for hapi for luk forward long hem. Samfala parents helpem pikinini for luk forward long spesol assembly day, long wei for markem date long kalenda, raetem olketa samting wea olketa need for tekem, and for start kaont daon for assembly day. Taem iufala duim Famili Worship, maet iufala savve storyim samfala point from olketa spesol assembly day wea go finis wea iufala raetem long note buk. For helpem iu and famili for redyim heart bilong iufala and for “herehere gud,” lukluk tu long buk Kasem Gud Samting From Theocratic Ministry Skul Education long page 13-16.—Luke 8:18.
3. Wanem nao iumi savve duim for helpem iumi kasem gud samting from wanem iumi bae lanem?
3 Duim Samting wea Iu Lanem: Bihaen long assembly, samting wea evritaem olketa savve talem nao hem, “Ei, naes program ia!” Hem tru, bikos diswan hem wanfala long olketa nambawan samting wea Jehovah hem givim. (Prov. 10:22) Bat for iu kasem gud samting from wanem iu lanem, iu mas rememberim and ting raonem. (Luke 8:15) Taem iu go bak long haos, storyim wanem iu herem long assembly witim famili or witim olketa wea iufala go bak tugeta. Storyim olketa goal wea man wanwan markem and olketa gudfala point wea savve helpem iu long ministry. Taem iu duim olsem, gud samting wea iu herem from assembly bae helpem iu for longfala taem bihaen.—Jas. 1:25.
4. Long wanem wei nao disfala assembly hem spesol long iumi?
4 Hem spesol samting taem iumi kasem present wea iumi barava needim. Iumi barava luk forward for herem wanem Jehovah redyim for iumi long spesol assembly day wea bae kamap. Iumi savve datfala assembly bae barava helpem iumi. Dadi bilong iumi long heven, Jehovah, givim present wea iumi barava needim taem hem encouragem and trainim iumi for duim waka wea hem assignim iumi for duim.—2 Tim. 4:2; Jas. 1:17.