Bible Hem Garem Paoa
1. Wanem nao theme bilong spesol assembly day for 2014?
1 Bible hem winim eni buk wea olketa man raetem, bikos hem garem paoa for changem tingting and wei bilong iumi mekem iumi savve duim wanem Jehovah laekem. From Bible hem garem bigfala paoa, hao nao iumi savve iusim Bible for helpem iumi long laef? And tu hao nao iumi savve iusim gud Bible for helpem olketa narawan? Mifala sure taem evriwan herem olketa point hia long spesol assembly day program for 2014 service year, datwan bae strongim olketa long spiritual wei. Theme bilong datfala program hem “Bible Hem Garem Paoa,” wea kam from Hebrew 4:12.
2. Olketa wanem kwestin nao bae iumi herem ansa bilong olketa?
2 Lisin for Olketa Ansa for Olketa Kwestin Hia: Taem iu lisin long datfala program, raetem ansa for olketa kwestin hia.
• Why nao iumi mas trustim toktok bilong Jehovah? (Ps. 29:4)
• Wanem nao iumi savve duim for letem Bible helpem iumi long laef? (Ps. 34:8)
• Hao nao iumi savve iusim Bible long ministry? (2 Tim. 3:16, 17)
• Wanem nao iumi savve duim for no letem world bilong Satan trikim iumi? (1 John 5:19)
• Wanem nao iufala olketa young wan savve duim for gohed faithful for worshipim Jehovah? (Jer. 17:7)
• Hao nao iumi savve kamap strong nomata long taem wea iumi wik? (2 Cor. 12:10)
• Wanem nao iumi need for duim for gohed changem olketa wei bilong iumi, nomata olketa nogud wei wea maet iumi garem for longtaem finis? (Eph. 4:23)
3. Witim wei for lisin, wanem moa iumi savve duim for kasem gud samting long datfala spesol assembly day program?
3 Olketa important information hia bae barava helpem iumi! And tu, olsem circuit assembly and distrik convention, datfala spesol assembly day bae givim iumi chance for meetim olketa brata and sista from olketa nara kongregeson wea iumi no savve gud long olketa. (Ps. 133:1-3; 2 Cor. 6:11-13) So hem gud for kam early and stap lelebet taem bihaen long program mekem iumi savve meetim olketa brata and sista wea iumi savve gud long olketa and olketa wea iumi no meetim bifor. Sapos wanfala brata hem kam from Bethel or distrik overseer kam for givim tok long datfala spesol assembly day, hem gud for iumi go meetim hem and waef bilong hem. Iumi garem staka reason for luk forward for datfala spesol assembly day program wea bae kamap!