Wanem Taem Nao for Duim Return Visit Long Olketa wea Interest?
1. Wanem nao iumi mas duim for mekem pipol kamap disaepol?
1 For mekem pipol kamap disaepol hem minim for iumi go bak long eniwan wea showimaot hem willing for lane abaotem Kingdom bilong Jehovah. (Matt. 28:19, 20) Gud taem for duim return visit hem depend long schedule bilong iumi and man wea interest. Why nao iumi shud go bak kwiktaem bihaen iumi meetim datfala man?
2, 3. Why nao iumi shud trae for go bak kwiktaem?
2 Why Nao Iumi Mas Go Bak Kwiktaem? Waka for preachim “disfala gud nius abaotem kingdom” hem barava klosap for finis, and world tu hem gogo for finis. (Matt. 24:14; 1 Pet. 4:7) From ‘taem for sev’ hem stap yet for olketa wea interest, iumi mas followim disfala kaonsel for ‘preachim word bilong God and no isisi for duim datwan.’ And iumi mas go bak kwiktaem for mekem datfala man gohed for interest.—2 Cor. 6:1, 2; 2 Tim. 4:2.
3 Satan hem barava laek for aotem seed bilong Kingdom wea maet iumi plantim long heart bilong man wea interest. (Mark 4:14, 15) Samfala taem olketa insaed famili, pipol long ples for waka, and olketa narawan tok spoelem olketa wea interest. Bat sapos iumi go bak kwiktaem, datwan bae mekem iumi gohed for storyim samfala samting moa bifor olketa narawan spoelem wei wea datfala man interest.
4. For iumi redi for duim return visit, wanem nao iumi savve duim long firstaem iumi meetim man?
4 Markem Taem for Go Bak: Bifor iu lusim datfala man, hem gud for iu markem taem for kam bak long hem. Askem wanfala kwestin wea iu bae ansarem taem iu kam bak. Hem important for raetem wanem iutufala storyim, and taem wea iu markem for go bak. Sapos fitim, maet iu savve askem datfala man for iu kam bak nextfala day or no longtaem bihaen. Sapos iu meetim datfala man long weekend, and hem waka from Monday go kasem Friday, maet hem laekem iu for kam bak long nextfala weekend. Sapos iu markem taem for go bak, iu mas go bak nao.—Matt. 5:37.
5. Why nao wei for go bak kwiktaem bae helpem iumi for duim assignment wea Jesus talem for mekem pipol kamap disaepol?
5 Iumi garem olketa gudfala reason for go bak kwiktaem long olketa wea interest. So markem taem and go bak kwiktaem, bikos “lelebet taem nomoa hem stap.” (1 Cor. 7:29) Taem iumi kwiktaem go bak, diswan helpem olketa wea interest long Kingdom message for gohed.