Kamap Gud Long Ministry —Duim Olketa Samting wea Bae Lead Go Long Return Visit

Why Hem Important: Taem iumi preach long man wea interest, iumi laek for go bak for watarem datfala seed bilong truth wea iumi plantim long taem wea datfala man bae stap long haos. (1 Cor. 3:6) For duim datwan, hem gud for iumi storyim wanem taem nao hem fitim haosholder for iumi go bak long hem. And tu, hem gud for iumi askem wanfala kwestin wea iumi bae ansarem taem iumi go bak. Datwan bae mekem hem laekem iumi for kam bak, and sapos ansa bilong datfala kwestin stap long pablikeson wea iumi givim long hem, maet bae hem readim datwan. Taem iumi duim evri samting hia, bae iumi laek for go bak bikos iumi savve finis wanem iutufala bae storyim, and haosholder tu savve long datwan. Taem iumi duim return visit, iumi savve talem hem iumi kam for ansarem datfala kwestin wea iumi askem long firstaem iumi meetim hem, and then iumi gohed for story nao.

Wanem for Duim:

Taem iumi redyim wanem iumi bae storyim long preaching waka, hem gud for redyim tu wanfala kwestin wea iumi bae ansarem taem iumi duim return visit. Iumi savve iusim kwestin wea join witim samting iumi storyim long wanfala pablikeson iumi offerim long datfala day. Or iumi savve iusim kwestin wea ansa bilong hem stap long wanfala buk wea iumi iusim for studyim Bible, and iumi savve showim hem datfala buk taem iumi go bak.
Taem iumi luksavve samwan hem interest long story bilong iumi, iumi savve talem hem iumi laek for kam bak moa and then askem kwestin wea iumi redyim finis. Long samfala territory, pipol savve busy tumas and maet no laek for markem taem for iumi go bak for lukim olketa. Sapos olsem, iu savve sei: “Waswe, semtaem olsem next week, bae iu stap nomoa long haos? [Weit for hem ansa.] Mi laek for kam bak long datfala taem for iumi storyim disfala kwestin for lelebet taem . . . ”
Sapos iumi markem taem for go bak long haosholder, iumi shud duim datwan. (Matt. 5:37) Long end bilong datfala return visit, askem nara kwestin and arrangem taem for go bak.

Samting for Duim Disfala Month:

Taem iu redyim wanem iu bae storyim long preaching waka, redyim tu wanfala kwestin wea iu bae ansarem long next taem iu go bak. Talem olketa nara pablisa wea iu waka witim wanem kwestin iu bae iusim.