Waswe, Mi Fit for Preach?
1. Why nao iumi shud no tingse iumi no fit for preach?
1 Iu no wari tumas sapos iu tu wanfala wea garem kaen kwestin olsem. For kamap fit for preach, hem no minim iumi mas skul gud or hem samting wea iumi born kam witim. Pipol ting long olketa firstfala disaepol olsem olketa man wea “no skul gud and man nating.” Nomata olsem, olketa savve tumas for preach abaotem gud nius bikos olketa barava followim example bilong Jesus.—Acts 4:13; 1 Pet. 2:21.
2. Wanem nao samfala wei bilong Jesus for teach?
2 Wei Bilong Jesus for Teach: Teaching bilong Jesus hem simpol, hem klia gud and isi for pipol minim. Olketa kwestin wea hem askem, olketa tokpiksa wea hem iusim, and wei bilong hem for startim story wea simpol, datwan nao pullim tingting bilong pipol wea lisin long hem. (Matt. 6:26) Hem barava interest long pipol. (Matt. 14:14) Nara samting tu, Jesus barava savve and bilivim samting wea hem teachim bikos hem savve Jehovah nao askem hem and givim hem paoa for duim disfala waka.—Luke 4:18.
3. Wanem nao Jehovah givim wea helpem iumi for preach long gudfala wei?
3 Jehovah Helpem Iumi: Nambawan Teacher bilong iumi hem iusim Bible and organization bilong hem for trainim iumi, mekem iumi savve gud hao for preach abaotem gud nius. (Isa. 54:13) From Jehovah talem insaed long Bible olketa wei bilong Jesus for teach, datwan mekem iumi fit for studyim and followim olketa wei hia. Jehovah givim iumi holy spirit and olketa meeting long kongregeson for lanem iumi. (John 14:26) Nara samting tu, Jehovah mekem olketa nara pablisa wea garem savve, for lanem iumi olketa gudfala wei for preach.
4. Why nao iumi shud no tingse iumi no fit for talemaot gud nius long nara pipol?
4 From “God nao mekem iumi kamap fit for duim disfala waka,” iumi shud no tingse iumi no fit. (2 Cor. 3:5) Taem iumi trustim Jehovah and gohed for iusim gud olketa samting wea hem givim for helpem iumi, bae iumi ‘barava redi for duim olketa gudfala waka.’—2 Tim. 3:17.