Kwestin Box
◼ Waswe, hem stret for Olketa Jehovah’s Witness for givimaot recording or copy bilong olketa tok?
Olketa Bible tok savve strongim and encouragem iumi. (Acts 15:32) Dastawe, iumi laek for sharem olketa samting olsem witim olketa wea no kam long olketa meeting. From staka difren samting for record hem kamap distaem, hem isi tumas for recordim and kwiktaem givimaot eni tok. Samfala garem yet olketa tok wea stap long CD, DVD or kaset, samfala long olketa tok hia olketa recordim longtaem go finis, and olketa givimaot bikos olketa laek helpem olketa fren bilong olketa. Olketa narawan wakem samfala Web site long Internet for eniwan savve daon-lodem olketa tok.
For tok stret, hem no rong for iumi recordim olketa tok for iumiseleva and famili bilong iumi. And tu, olketa elder savve arrange for recordim samfala tok for olketa long kongregeson wea sik wea no fit for kam long olketa meeting. Bat samfala gud reason stap why iumi shud no givimaot olketa tok wea olketa recordim or copy bilong olketa tok.
Hem isi for iumi no minim gud samfala point from olketa tok hia, bikos staka taem olketa tok hia hem fitim need bilong kongregeson wea herem datfala tok, and iumi no savve why olketa needim datfala tok. And tu, hem hard lelebet for savve hu nao givim datfala tok and long wanem taem, for mekem iumi savve trustim samting wea iumi herem hem stret and fitim savve wea iumi garem distaem. (Luke 1:1-4) Nara samting tu, wei for givimaot copy bilong olketa tok or recordim maet mekem samfala for givim or for kasem praise wea olketa no fit for kasem.—1 Cor. 3:5-7.
Datfala wakaman wea faithful and wise waka hard for provaedem spiritual kaikai wea barava ‘fitim,’ and long “barava taem.” (Luke 12:42) Diswan minim tu olketa tok wea kamap long olketa kongregeson bilong Olketa Jehovah’s Witness, and olketa tok wea olketa recordim wea iumi savve daon-lodem from jw.org Web site. Iumi trustim datfala wakaman wea faithful and wise and Governing Body bilong hem, bae provaedem wanem iumi needim for strongim faith bilong iumi.—Acts 16:4, 5.