Waswe, Iu Lukluk Long Wanfala Samting Nomoa?
1. Wanem nao hem minim for “lukluk long wanfala samting nomoa”?
1 Wanem iumi lukluk strong long hem savve affectim samting wea iumi duim. Samting wea Jesus talem hem barava fitim. Hem sei: “Sapos eye bilong iu hem lukluk long wanfala samting nomoa full body bilong iu bae garem laet tu”! (Matt. 6:22) Taem iumi “lukluk long wanfala samting nomoa” olsem Jesus talem, and tingting strong long hem, datwan bae mekem iumi for duim wanem God laekem. Iumi mekem olketa samting bilong Kingdom first samting long laef bilong iumi, and iumi no letem eni material samting or eni nara samting spoelem wei for duim ministry.
2. Wanem nao savve mekem iumi for tingse iumi needim staka samting, bat wanem nao savve helpem iumi?
2 Lukluk Gud Long Iumiseleva: TV, radio, niuspepa, and olketa samting wea narawan garem savve mekem iumi tingse iumi needim staka samting. Bifor iumi laekem or peim wanfala samting wea bae tekem staka taem, selen, or strong bilong iumi, hem gud for iumi “ting raonem” datwan. Hem gud for iumi askem iumiseleva, ‘Waswe, disfala samting savve helpem mi for duim moa samting for worshipim Jehovah or nomoa?’ (Luke 14:28; Phil. 1:9-11) Hem gud tu for samfala taem ting raonem wanem nao iumi savve duim mekem iumi duim moa samting long ministry.—2 Cor. 13:5; Eph. 5:10.
3. Wanem nao iumi lanem from wanfala sista wea disaed for lukluk long wanfala samting nomoa?
3 Taem wanfala sista start for duim regular pioneer, hem disaed for gohed duim full-taem waka for selen, nomata part-taem waka savve helpem hem kasem olketa samting hem needim. Gogo hem luksavve: “No eniwan savve waka for tufala boss. Mi mas no tingim olketa samting mi laekem, bat tingim olketa samting mi needim. Mi luksavve hao olketa material samting savve nogud kwiktaem and bae mi hard waka nating nomoa for kasem.” From hem disaed for lukluk long wanfala samting nomoa, datwan helpem hem for changem samfala samting and changem waka bilong hem for mekem hem fit for gohed long pioneer waka.
4. Why nao hem barava important distaem for lukluk long wanfala samting nomoa?
4 From iumi barava klosap long end, hem barava important for iumi lukluk long wanfala samting nomoa. Evriday wea go pas hem mekem end bilong disfala rabis world and start bilong niu world bilong God for kam klosap. (1 Cor. 7:29, 31) Taem iumi barava duim gud disfala preaching waka, diswan bae sevem iumi and olketa wea lisin long iumi.—1 Tim. 4:16.