Olketa Planteison Redi Nao for Harvestim
1. Wanem important waka nao gohed distaem?
1 Bihaen Jesus witness long wanfala Samaritan woman, hem sei olsem long olketa disaepol bilong hem: “Lukim go olketa planteison hia. Olketa redi nao for harvestim.” (John 4:35, 36) Spiritual harvest hem gohed distaem, and Jesus hem savve datfala waka bae kasem evriwea long world. Nomata distaem Jesus stap long heven, hem tu gohed join long disfala waka. (Matt. 28:19, 20) Wanem nao showimaot disfala waka hem gohed kamap big taem waka hia gogo for finis?
2. Olketa wanem samting nao showimaot harvest waka gohed kamap big?
2 Harvest Waka Evriwea Long World: Long 2009 service year, namba bilong olketa pablisa evriwea long world hem go ap 3.2 percent. Olketa kantri wea gavman tambuim preaching waka, namba bilong olketa pablisa hem go ap 14 percent. Namba bilong olketa Bible study evri month hem winim 7,619,000, wea datwan hem winim namba bilong olketa pablisa. And hem klosap 500,000 moa winim namba bilong olketa Bible study long last service year. From waka hem kamap moa big long staka kantri, staka branch office ask for samfala missionary moa wea kasem training from Gilead. Olketa kantri hia garem staka wea interest tumas long message wea iumi talemaot. Diswan showimaot Jehovah hem mekem disfala waka kamap big long olketa lastfala day bilong disfala harvest waka. (Isa. 60:22) Waswe, iu garem stretfala tingting abaotem “olketa territory” bilong iu?
3. Wanem nao tingting bilong samfala abaotem territory bilong olketa?
3 Harvest Waka Long Territory Bilong Iu: Maet samfala sei, “Territory bilong mi, pipol nating interest nomoa.” Hem tru, samfala territory pipol no interest olsem olketa nara territory or olketa interest olsem long bifor. Maet samfala Witness tingse disfala harvest waka long olketa ples olsem hem finis nao and distaem waka bilong olketa hem for preach long tu-thri nomoa wea stap yet. Waswe, hem nao wanem hem happen distaem?
4. Iumi shud garem wanem tingting abaotem ministry bilong iumi, and why?
4 Disfala harvest waka hem gohed kamap big from start go kasem end. Tingim toktok bilong Jesus abaotem wei wea disfala waka bae kamap big: “Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” (Matt. 9:37, 38) Jehovah, Man wea ownim planteison, hem nao savve wanem taem and long wea nao olketa seed bae grow. (John 6:44; 1 Cor. 3:6-8) Wanem nao assignment bilong iumi? Bible givim ansa: “Iu mas plantim olketa seed start long morning go kasem evening.” (Eccl. 11:4-6) Tru nao, taem harvest waka gogo for finis hem no taem for iumi rest!
5. Why nao iumi shud gohed preach witim strong long olketa territory wea luk olsem pipol no interest?
5 Gohed Long Harvest Waka: Nomata iumi evritaem preach long territory bilong iumi and luk olsem pipol no interest, iumi garem gudfala reason for waka strong and luksavve iumi klosap long end. (2 Tim. 4:2) Staka samting wea gohed for happen distaem, savve mekem pipol changem tingting bilong olketa and tingting strong abaotem future. Taem olketa young pipol kamap big, maet olketa laek for stap sef and stap gud. Olketa nara pipol maet tinghae and interest long waka bilong iumi from iumi go preach evritaem. Tru tumas, olketa wea no interest bifor maet bae lisin enitaem. Nomata olketa wea barava les long message bilong iumi, olketa need for kasem warning.—Ezek. 2:4, 5; 3:19.
6. Sapos territory bilong iumi hem no isi, wanem nao bae helpem iumi for gohed strong?
6 Sapos territory bilong iumi hem no isi, wanem nao bae helpem iumi for gohed strong? Iumi savve preach long haos tu haos, bat maet iumi savve duim bisnis territory or telephone witnessing. Or iumi savve changem story bilong iumi mekem hem interesting. Maet iumi savve changem schedule and preach long olketa evening or long olketa narafala taem wea pipol stap long haos. Maet iumi savve lanem nara languis mekem iumi savve preachim gud nius long staka pipol. Maet iumi savve mekem big ministry bilong iumi taem iumi duim regular pioneer. Or iumi savve muv go long ples wea garem tu-thri pablisa nomoa. Sapos iumi garem stretfala tingting abaotem disfala harvest waka, iumi bae barava duim gud disfala important waka.
7. Disfala waka for hipimap pipol bae finis wanem taem?
7 Olketa farmer garem lelebet taem nomoa for hipimap kaikai long garden, so olketa no relax or isisi, bat olketa gohed for waka go kasem taem waka hem finis. Diswan hem semsem tu witim disfala spiritual harvest. Disfala waka for hipimap pipol bae finis wanem taem? Hem bae gohed long “taem wea world hem gogo for finis” go kasem taem wea “world bae finis.” (Matt. 24:14; 28:20) Olsem nambawan wakaman bilong Jehovah, Jesus, iumi laek finisim disfala waka wea iumi kasem. (John 4:34; 17:4) Hem gud for iumi gohed for duim ministry bilong iumi witim strong, hapi, and witim stretfala tingting go kasem end. (Matt. 24:13) Disfala harvest waka no finis yet!
[Piksa long page 2]
Disfala harvest waka hem gohed kamap big from start go kasem end