Patient Taem Iumi Duim Ministry
1. Hao nao Jehovah showimaot hem patient long olketa man?
1 God barava patient long olketa man. (Ex. 34:6; Ps. 106:41-45; 2 Pet. 3:9) Waka for preach abaotem Kingdom evriwea long world hem nambawan example wea showimaot Jehovah lovem and patient long pipol. Nomata Jehovah patient witim olketa man for samting olsem 2,000 year, hem gohed yet for leadim kam long hemseleva pipol wea laek fren gud witim hem. (John 6:44) Hao nao iumi savve followim example bilong Jehovah for patient taem iumi duim ministry?
2. Hao nao iumi savve showimaot iumi patient taem iumi preach long territory?
2 Preach Long Haos tu Haos: Iumi followim example bilong Jehovah for patient taem iumi “gohed” preach long territory wea pipol no showimaot interest yet. (Acts 5:42) Iumi patient for no givap nomata pipol no interest, mek-fani, and againstim ministry bilong iumi. (Mark 13:12, 13) Iumi showimaot iumi patient tu taem iumi gohed waka hard for watarem olketa seed bilong truth nomata datwan hem no isi bikos staka taem pipol no stap long haos.
3. Why nao iumi mas patient for duim olketa return visit and Bible study?
3 Olketa Bible Study: Taem iumi plantim eni samting, iumi mas patient. Iumi savve lukaftarem wanem iumi plantim, bat iumi no savve forcem hem for grow kwiktaem. (Jas. 5:7) Long sem wei tu, man bae grow long isisi wei for fren witim Jehovah. (Mark 4:28) Maet hem no isi for olketa wea iumi study witim for lusim olketa teaching bilong false religion or olketa kastom wea againstim Bible. Iumi shud no trae for mekem olketa Bible study for grow kwiktaem long wei for forcem olketa for change. Iumi mas patient for letem holy spirit bilong God isisi mekem truth kasem heart bilong Bible study.—1 Cor. 3:6, 7.
4. Hao nao wei for patient savve helpem iumi for givim gudfala witness long olketa relative wea no biliv?
4 Olketa Relative wea No Biliv: Nomata iumi laekem tumas for olketa relative wea no biliv for lanem truth, iumi showimaot iumi patient long wei for weitim gudfala taem for witness long olketa, and no ova tumas for talem staka samting long wantaem. (Eccl. 3:1, 7) Taem iumi weit, gudfala wei bilong iumi savve givim witness, bat iumi redi evritaem for preach long olketa long wei wea iumi hambol and showimaot bigfala respect. (1 Pet. 3:1, 15) Tru tumas, wei for patient savve helpem iumi for duim gud ministry bilong iumi and datwan bae mekem Dadi bilong iumi long heven hem hapi.