Lane From Example Bilong Jehovah and Jesus wea Patient
“From Lord bilong iumi hem patient, datwan nao mekem iumi garem chance for sev.”—2 PET. 3:15.
1. Wanem kwestin nao samfala wea faithful olketa garem?
WANFALA sista wea faithful for worshipim Jehovah for longtaem finis and winim staka hard samting ask olsem: “Waswe, bae end hem kam bifor mi dae tu?” Samfala wea worshipim Jehovah for staka year finis garem sem tingting. Iumi barava laek for lukim taem wea God bae finisim olketa problem wea kasem iumi distaem and taem hem wakem evri niu samting. (Rev. 21:5) Iumi savve world bilong Satan barava klosap for finis. Nomata olsem, hem no isi for patient taem iumi weitim datwan for happen.
2. Olketa wanem kwestin abaotem wei for patient nao bae iumi ansarem long disfala study?
2 Bible sei iumi mas patient. Olsem olketa wea worshipim God bifor, iumi bae kasem wanem God promisim sapos faith bilong iumi hem strong, and iumi patient for weitim taem wea hem bae duim wanem hem promisim. (Readim Hebrew 6:11, 12.) Jehovah hem patient. Hem fit for finisim nogud pipol long enitaem wea hem laekem bat hem weitim best taem for duim datwan. (Rom. 9:20-24) Why nao Jehovah barava patient olsem? Hao nao Jesus followim example bilong Dadi bilong hem for patient, and wanem nao iumi lanem from example bilong Jesus? Wanem gud samting nao bae iumi kasem sapos iumi lane for patient olsem Jehovah? Ansa bilong olketa kwestin hia savve helpem iumi for patient and garem strongfala faith, nomata maet iumi tingse Jehovah tek longtaem tumas for duim samting.
WHY NAO JEHOVAH HEM PATIENT?
3, 4. (a) Why nao Jehovah hem patient? (b) Taem Adam and Eve no obeyim Jehovah, wanem nao hem duim?
3 Jehovah garem moa paoa winim eniwan long full universe, and hem no need for weit for finisim evri problem. Nomata olsem, Jehovah garem gudfala reason for patient. From olketa long Eden no obeyim hem, hem mas ansarem samfala important kwestin wea affectim evriwan long heven and earth. Jehovah hem patient bikos hem savve bae hem tek taem for givim kliafala ansa for olketa kwestin hia. Iumi sure wanem hem duim hem best wei for deal witim datwan, bikos hem savve gud long wanem evriwan long heven and earth tingim and duim.—Heb. 4:13.
4 Plan bilong Jehovah hem for olketa pikinini bilong Adam and Eve stap long evri ples long earth. Taem Satan trikim Eve, and then Adam hem no obey, God no seknomoa duim samting, and hem no givap long olketa man tu. Bat hem disaedem wanem hem bae duim for mekem plan bilong hem for olketa man and for disfala earth kamap tru. (Isa. 55:11) From Jehovah barava kontrolem hemseleva and hem patient, hem savve mekem plan bilong hem kam tru and pruvim hem nomoa fit for rul. Hem weit for plande thousand year finis for mekem samfala part long plan bilong hem for kam tru long best wei.
5. Wanem nao narafala gud samting wea kamaot from wei wea Jehovah hem patient?
5 Narafala reason why Jehovah hem patient hem bikos hem laekem staka moa pipol for kasem laef olowe. Distaem, hem redyim “wanfala big crowd” mekem olketa fit for sev. (Rev. 7:9, 14; 14:6) Jehovah iusim preaching waka wea iumi duim for invaetem pipol for lane abaotem Kingdom and wanem hem laekem olketa for duim. Datfala message abaotem Kingdom hem “gud nius” for pipol. Hem best nius wea pipol savve herem! (Matt. 24:14) Evriwan wea Jehovah leadim kam long organization bilong hem kamap part long wanfala famili bilong olketa trufala fren evriwea long world, wea laekem tumas stret samting. (John 6:44-47) Jehovah duim evri samting hia for helpem olketa for duim wanem hem laekem. Hem chusim tu samfala from earth for rul insaed gavman bilong hem long heven. Taem olketa hia long heven, bae olketa helpem olketa man long earth wea obey for kamap perfect and for kasem laef olowe. So nomata taem Jehovah patient for weit, hem gohed duim samting for mekem olketa promis bilong hem kam tru. And Jehovah duim evri samting hia for mekem iumi kasem gud samting.
6. (a) Long wanem wei nao Jehovah hem patient long taem bilong Noah? (b) Long wanem wei nao Jehovah hem patient long taem bilong iumi?
6 Jehovah hem patient nomata pipol duim olketa barava nogud samting. Olsem example, tingim wanem Jehovah duim taem pipol duim barava nogud samting bifor long Flood. Long datfala taem heart bilong Jehovah hem “feel sorre” bikos staka pipol durong and raf tumas, and olketa laek for duim nomoa olketa nogud samting. (Gen. 6:2-8) Bat hem no letem nogud samting for gohed olowe. So hem disaed for iusim wanfala flood for finisim olketa man wea no obey. Taem “God hem patient and hem weit,” hem gohed duim samting for redyim Noah and famili bilong hem for sev. (1 Pet. 3:20) Long stret taem, Jehovah talem Noah abaotem Flood and hem talem Noah for wakem wanfala ark. (Gen. 6:14-22) Jehovah laekem tu for Noah mas warnim pipol abaotem Flood wea bae kam. Bible sei Noah hem man for “preach abaotem samting wea raeteous.” (2 Pet. 2:5) Jesus sei taem bilong iumi hem olsem taem bilong Noah. Jehovah disaedem finis taem wea hem bae finisim disfala nogud world, bat no eni man savve “wanem day and taem nao datwan bae happen.” (Matt. 24:36) Distaem, God givim iumi waka for warnim pipol and talem olketa wanem olketa mas duim for sev.
7. Waswe, Jehovah hem delay for duim samting wea hem promisim? Minim kam.
7 So Jehovah hem patient, bat iumi shud no tingse hem no duim eni samting taem hem weit. And iumi shud no tingse from hem patient hem no tingim iumi or hem no kea for iumi! Nomata olsem, maet hem isi for iumi garem kaen tingting olsem sapos iumi gogo for olo or iumi safa long wanfala nogud samting distaem. Maet datwan mekem iumi feel wikdaon or tingse God hem slow tumas for duim wanem hem promisim. (Heb. 10:36) Iumi mas no forget God garem olketa gudfala reason for patient, and taem hem gohed for weit hem duim samting wea helpem olketa wea worshipim hem. (2 Pet. 2:3; 3:9) Distaem bae iumi story abaotem wei wea Jesus followim example bilong Dadi bilong hem for patient.
JESUS SHOWIMAOT GUDFALA EXAMPLE FOR PATIENT
8. Wanem nao samfala wei wea Jesus showimaot hem patient?
8 Jesus duim wanem God laekem and hem hapi for duim datwan for staka thousand year finis. Taem Satan againstim Jehovah, Jehovah disaed for Son bilong hem kam long earth and kamap datfala Messiah. Jesus mas patient for weit for plande thousand year for datfala taem wea hem bae kam long earth. (Readim Galatia 4:4.) Long taem wea Jesus weit, hem no stap nating nomoa bat hem barava busy for duim waka wea Dadi bilong hem givim long hem. And taem hem kam long earth hem savve Satan bae bihaenem wei for killim hem dae, olsem profesi talem finis. (Gen. 3:15; Matt. 16:21) Hem patient and willing for duim wanem God laekem nomata hem mas safa and kasem bigfala pain. Jesus hem barava faithful long God. Hem no tingim hemseleva and hae position bilong hem. Iumi shud followim example bilong hem.—Heb. 5:8, 9.
9, 10. (a) Wanem nao Jesus duim taem hem weit for Jehovah duim samting? (b) Hao nao iumi savve followim example bilong Jesus?
9 Bihaen Jesus laef bak, hem kasem paoa ovarem evri samting long heven and earth. (Matt. 28:18) Hem evritaem iusim datfala paoa for mekem plan bilong Jehovah kam tru long barava taem wea Jehovah markem. Dastawe Jesus patient for weit long raet saed bilong God go kasem 1914, taem God givim paoa long hem for winim olketa enemy bilong hem. (Ps. 110:1, 2; Heb. 10:12, 13) Klosap nao Jesus bae finisim disfala nogud world bilong Satan. Taem Jesus weit for duim datwan, hem patient for helpem pipol for fren witim God and leadim olketa go long “olketa springwata wea savve mekem man laef.”—Rev. 7:17.
10 Hao nao iumi savve followim example bilong Jesus? Jesus savve Jehovah markem finis taem for duim samting followim plan bilong hem. Hem tru, Jesus laekem tumas for duim wanem Jehovah askem hem for duim, bat hem willing for weitim taem wea God markem for hem duim olketa samting hia. Taem iumi weit for disfala nogud world bilong Satan for finis, iumi evriwan mas patient. Iumi no duim samting firstaem bifor God talem iumi for duim datwan, and no givap tu taem iumi feel wikdaon. Wanem nao iumi savve duim wea bae helpem iumi for patient olsem?
LANE FOR PATIENT OLSEM GOD
11. (a) Hao nao wei for patient hem join witim faith? (b) Why nao iumi fit for garem strongfala faith distaem?
11 Example bilong olketa profet and olketa narawan wea worshipim Jehovah, wea laef bifor Jesus kam long earth, hem pruvim olketa man wea no perfect tu savve patient. Olketa hia patient bikos olketa garem faith. (Readim James 5:10, 11.) Sapos olketa no garem faith and no barava bilivim olketa promis bilong Jehovah, hard for olketa patient for weitim olketa promis hia for kam tru. From olketa barava sure God bae duim wanem hem promisim, staka taem olketa winim samting wea testim faith bilong olketa and wea mekem man fraet. (Heb. 11:13, 35-40) Distaem iumi garem staka moa reason for garem strongfala faith. Bible sei Jesus nao “mekem faith bilong iumi perfect.” (Heb. 12:2) Hem mekem staka profesi kam tru and helpem iumi for minim gud olketa plan bilong God.
12. Wanem nao iumi savve duim for strongim faith bilong iumi?
12 Wanem nao iumi savve duim for strongim faith bilong iumi, wea datwan bae mekem iumi moa patient? Wanfala important samting wea iumi mas duim hem for followim wanem God talem. Olsem example, tingim why nao Kingdom hem shud first samting long laef bilong iu. Waswe, iu savve duim moa samting for obeyim datfala komand long Matthew 6:33? For duim datwan, maet iu savve duim moa samting long ministry or changem samfala samting long laef bilong iu. Jehovah blessim olketa samting wea iu duim finis for obeyim datfala komand. Maet hem mekem wei for iu garem wanfala niu Bible study, or helpem iu for kasem “peace bilong God wea winim nao wanem man savve minim.” (Readim Philippi 4:7.) Taem iu ting raonem olketa blessing wea iu kasem finis from iu followim wanem God talem, bae iu luksavve hem gud for iu patient.—Ps. 34:8.
13. Wanem tokpiksa nao savve helpem iumi for minim wei wea faith bilong iumi savve mekem iumi moa patient?
13 Wanfala tokpiksa savve helpem iumi for minim wei wea faith bilong iumi savve mekem iumi moa patient. Wanfala farmer hem plantim seed long garden, hem lukaftarem, then gogo hem harvestim datfala kaikai. Sapos hem harvestim staka kaikai from datfala garden, datwan bae mekem hem laek for plant moa long datfala garden. Maet hem laek for plantim kaikai long nara area tu. Hem bae plantim moa olketa seed nomata hem savve hem mas patient for weitim taem bilong harvest. Hem barava sure hem bae harvestim kaikai wea hem plantim. Olsem tu, taem iumi lanem wanem Jehovah laekem iumi for duim, followim wanem iumi lanem, and then iumi kasem gud samting, datwan mekem iumi trustim Jehovah and strongim faith bilong iumi. Datwan helpem iumi for patient and for weitim olketa blessing wea Jehovah promisim.—Readim James 5:7, 8.
14, 15. Hao nao iumi shud ting long olketa nogud samting wea happen long world?
14 Nara samting wea savve helpem iumi for moa patient hem for trae garem sem tingting olsem Jehovah abaotem olketa samting wea happen long world and long laef bilong iumi. Olsem example, tingim feeling bilong Jehovah abaotem wei wea olketa man safa. For longtaem nao Jehovah lukim olketa man safa, and diswan mekem hem barava feel sorre. Bat hem no letem datwan mekem hem for no duim gudfala samting. Hem sendem Son bilong hem for “finisim evri samting wea Devil hem duim,” wea spoelem olketa man and mekem olketa safa. (1 John 3:8) Klosap nao God bae finisim for olowe evri wei for safa. So iumi mas no letem olketa nogud samting wea happen long world mekem iumi wikdaon, or no patient for weitim Jehovah for stretem datwan. Iumi mas garem faith long olketa promis bilong God. Jehovah markem finis taem wea hem bae finisim nogud samting, and hem bae duim datwan long barava taem wea hem markem.—Isa. 46:13; Nah. 1:9.
15 Long olketa last day distaem maet iumi kasem samfala barava hard samting wea testim faith bilong iumi. Maet pipol wea raf spoelem iumi, or maet olketa wea iumi lovem kasem nogud samting tu. Iumi shud no kros long datwan bat iumi mas barava trustim Jehovah. From iumi no perfect, hem no isi for duim datwan. Bat tingim wanem Jesus duim wea iumi lukim long Matthew 26:39.—Readim.
16. Taem iumi weitim end for kam, iumi mas stap klia long wanem samting?
16 Man wea daotem and tingse end hem no klosap maet start for garem rong tingting. Maet hem tingse hem need for planim samfala samting for hemseleva nogud Jehovah no duim wanem hem promisim. Hem bae no isi for man wea garem diskaen rong tingting for patient. From hem garem kaen tingting olsem, maet hem trae for garem bignem long world or start for trustim selen, and Kingdom bae no first samting long laef bilong hem. Or maet hem disaed for go long university mekem hem fit for garem waka wea bae helpem hem for garem gudfala living distaem. Bat man wea duim olketa samting hia showimaot hem no garem faith. Iumi shud no forgetim samting wea Paul talem. Hem encouragem iumi for followim example bilong olketa wea kasem olketa promis from God “bikos olketa garem faith and olketa patient.” (Heb. 6:12) Jehovah disaed finis for distroem disfala nogud world, and bae hem no leit for duim datwan. (Hab. 2:3) Go kasem datfala taem, iumi mas stap klia long wei for duim lelebet samting nomoa long waka bilong Jehovah. Bat iumi mas no forget iumi stap long olketa last day and iumi mas waka hard long preaching waka. Datfala waka savve mekem iumi barava hapi and satisfae distaem.—Luke 21:36.
GUD SAMTING IUMI KASEM SAPOS IUMI PATIENT
17, 18. (a) Wanem chance nao Jehovah givim long iumi distaem? (b) Olketa wanem gud samting nao bae iumi kasem sapos iumi patient?
17 Nomata iumi worshipim God for tu-thri month nomoa or for staka year finis, iumi laek worshipim hem for olowe. Wei for patient bae helpem iumi no givap and gohed faithful go kasem end bilong disfala world, nomata wanem taem nao datwan bae kam. Distaem Jehovah givim chance long iumi for pruvim iumi barava trustim hem and bae iumi faithful long hem nomata iumi mas safa. (1 Pet. 4:13, 14) God givim training long iumi tu wea savve helpem iumi for patient go kasem taem wea hem bae sevem iumi.—1 Pet. 5:10.
18 Jesus garem paoa ovarem evri samting long heven and earth, and no eni samting savve stopem hem for protectim iu sapos iu gohed faithful. (John 10:28, 29) Iumi shud no fraetem eni samting wea bae happen long future or fraetem dae tu. Olketa wea bae sev nao hem olketa wea patient and no givap. So iumi mas no letem tingting bilong pipol long world spoelem tingting bilong iumi and mekem iumi for no trustim Jehovah. Bat long disfala taem wea God hem patient, iumi mas gohed strongim faith bilong iumi and iusim taem bilong iumi long wisefala wei.—Matt. 24:13; readim 2 Peter 3:17, 18.