Hapi Long March, April, and May!
1. Wanem nao iu savve duim long March, April, and May wea savve mekem iu barava hapi?
1 Wanem nao savve mekem iu barava hapi long March, April, and May? Iu savve duim moa samting long ministry, and sapos hem fitim, iu savve auxiliary pioneer. Long wanem wei nao diswan bae mekem iu hapi?
2. Taem iumi duim moa samting long ministry, hao nao datwan mekem iumi hapi?
2 Iu Savve Barava Hapi: Jehovah wakem iumi long wei wea iumi savve hapi and satisfae taem iumi worshipim hem. (Matt. 5:3) Iumi savve hapi tu taem iumi duim samting for olketa narawan. (Acts 20:35) Iumi worshipim God and helpem pipol taem iumi duim ministry. So sapos iumi duim moa samting long ministry, iumi bae barava hapi and kamap gud long hao for preach. Taem iumi savve gud hao for preach, datwan bae helpem iumi for no fraet. Bae iumi garem staka chance for preach long pipol and startim olketa Bible study. Wei for duim olketa samting hia bae mekem iumi barava hapi for duim ministry.
3. Why nao month bilong March and April hem gudfala taem for auxiliary pioneer?
3 Month bilong March and April hem gudfala taem for auxiliary pioneer bikos iumi savve duim 30 or 50 hour. Nara samting tu, start long Saturday, March 22, go kasem Monday, April 14, iumi bae duim campaign for invaetem pipol for kam long Memorial. Olketa brata and sista long kongregeson bae hapi and enjoyim chance for “waka tugeta” for duim datfala campaign long full territory bilong kongregeson insaed datfala taem.—Zeph. 3:9.
4. Wanem nao iumi savve duim sapos iumi laek auxiliary pioneer?
4 Plan Distaem: Sapos iu no plan yet, hem gud for ting raonem schedule bilong iu and tingim sapos iu savve changem samfala samting mekem iu savve duim moa samting long ministry insaed wanfala month or winim datwan. Prea abaotem diswan. (Jas. 1:5) Storyim diswan long famili and witim olketa narawan long kongregeson. (Prov. 15:22) Nomata iu garem health problem or waka full taem, sapos iu plan distaem, maet iu tu savve auxiliary pioneer.
5. Sapos iumi duim moa samting long ministry long March, April, and May, iumi bae hao?
5 Jehovah laekem pipol bilong hem for hapi. (Ps. 32:11) Sapos iumi duim moa samting long ministry long March, April, and May, datwan bae mekem iumi hapi and Jehovah tu bae hapi.—Prov. 23:24; 27:11.