Thrifala Idea for Helpem Iu Kamap Gudfala Teacher
1. Why nao iumi laek for kamap gudfala teacher?
1 Evri Witness bilong Jehovah, olketa pipol for teach. Nomata iumi preach long pipol, duim return visit or conductim Bible study, iumi teachim pipol. And wanem iumi teachim long pipol hem spesol. Iumi helpem pipol for minim “olketa Holy Raeting” wea savve mekem pipol “wise and wea savve sevem” olketa. (2 Tim. 3:15) Datwan hem wanfala spesol privilege! Thrifala idea hia savve helpem iumi for kamap gudfala teacher.
2. Wanem nao iumi savve duim, mekem teaching bilong iumi hem isi for pipol minim?
2 Isi for minim: Taem iumi savve gud long wanfala Bible subject, iumi savve forget hao maet hem no isi for narawan for minim kwiktaem datfala subject. So taem iu conductim wanfala Bible study no storyim evri sismol samting wea no important. Hem gud for storyim nomoa olketa main point. Iu no need for story tumas for iu kamap wanfala gud teacher. (Prov. 10:19) Staka taem hem gud for readim nomoa olketa main scripture. Bihaen iutufala readim scripture, mekhae long toktok insaed datfala scripture wea fitim subject wea iutufala storyim. Datfala Sermon long Maunten wea stap long Matthew chapter 5 go kasem 7, hem fulap witim olketa important teaching, bat Jesus storyim olketa teaching hia long wei wea pipol isi for minim and hem no story tumas.
3. Why nao hem gud for iusim olketa tokpiksa, and olketa wanem kaen tokpiksa nao hem gud?
3 Olketa tokpiksa: Olketa tokpiksa helpem man for ting raonem samting, affectim feeling bilong man, and helpem man for rememberim wanem hem lanem. No tingse iu mas man for story bifor iu savve iusim olketa gudfala tokpiksa. Staka taem Jesus iusim olketa tokpiksa wea short nomoa and pipol isi for minim. (Matt. 7:3-5; 18:2-4) Hem gud tu for drawim olketa piksa wea pipol isi for minim. Sapos iu prepare firstaem iu savve tingim olketa tokpiksa wea savve helpem man.
4. Hao nao iumi savve iusim olketa kwestin for helpem narawan?
4 Olketa kwestin: Olketa kwestin savve helpem student for ting raonem samting. Dastawe, bihaen iu askem kwestin weit lelebet. Sapos iuseleva kwiktaem talem ansa, iu bae no barava savve wanem nao long tingting bilong datfala student. Sapos ansa wea hem talem hem no stret, no talem ansa long hem bat askem samfala nara kwestin wea bae helpem hem for savve long stret ansa. (Matt. 17:24-27) Tru tumas, no eniwan long iumi hem wanfala perfect teacher. Dastawe, Bible encouragem iumi for lukluk gud evritaem long samting wea iumi teachim. Taem iumi duim olsem, datwan bae helpem iumi and olketa wea lisin long iumi for kasem laef olowe.—1 Tim. 4:16.