Tufala Coin Nomoa

Wanfala important wei for sapotim Kingdom, hem nao for givim donation for sapotim preaching waka raon long world. Waswe sapos iumi no garem staka selen?

Wantaem Jesus lukim wanfala widow woman hem putim tufala coin nomoa long contribution box long temple. Nomata hem poor, love wea hem garem for Jehovah nao mekem hem for “givim evri selen wea hem garem.” (Mark 12:41-44) Wei wea Jesus storyim samting wea hem lukim showimaot God hem tinghae long contribution wea datfala widow woman givim. Olsem datfala widow woman duim, olketa Christian long first century wea rich and olketa wea poor, olketa luksavve hem important tu for givim contribution for sapotim preaching waka. Aposol Paul storyim example bilong olketa brata long Macedonia, “nomata olketa poor tumas . . . olketa nao gohed askem mifala for letem olketa givim samting.”—2 Cor. 8:1-4.

So nomata sapos iumi putim “tufala coin nomoa” long contribution box, no tingse datwan hem smol samting bikos taem iumi joinim datwan witim olketa nara contribution, iumi garem staka contribution nao. From iumi willing for givim contribution, Dadi bilong iumi long heven bae hapi tumas, from “hem lovem man wea hapi for givim samting.”—2 Cor. 9:7.