Bigfala Wei for Give Bringim Hapi
OLSEM wanfala loving Christian overseer, aposol Paul kea evribit from heart for olketa wea sem biliv olsem hem. (2 Corinthians 11:28) So, taem hem organizem wanfala kolekson bilong selen for need bilong olketa Christian long Judea insaed olketa year from 50 C.E., hem iusim datfala chance for teachim wanfala important leson abaotem wei for give. Paul mekhae long wei wea Jehovah barava tinghae long hapi wei for give: “Letem each wan duim wanem hem disaedem long heart bilong hem, no from eniwan pushim or forcem hem, from God lovem man wea hapi for give.”—2 Corinthians 9:7.
Barava Poor, Bat Willing for Give
Planti long olketa Christian long first century no garem bignem. Paul sei hao ‘no planti long olketa garem paoa.’ Olketa hia “wik samting bilong world,” “olketa samting nating bilong world.” (1 Corinthians 1:26-28) Olsem example, olketa Christian long Macedonia “poor tumas” and “safa.” Nomata olsem, olketa hambol wan hia from Macedonia wea biliv ask strong for privilege for givim selen long “ministry bilong olketa holy wan”; and Paul hem sei samting olketa givim hem “winim wanem olketa seleva garem”!—2 Corinthians 8:1-4.
Nomata olsem, bigfala wei for give hia no showaot long haomas nao olketa givim. Bat, samting wea muvim man, wei wea hem willing for share, and feeling bilong heart nao important. Paul showim long olketa Christian long Corinth hao mind and heart evriwan mas insaed wei for givim contribution. Hem sei: “Mi savve hao iufala willing dastawe mi talem olketa long Macedonia abaotem iufala, . . . and strong bilong iufala muvim planti long olketa.” Olketa ‘disaedem long heart bilong olketa’ for give long bigfala wei.—2 Corinthians 9:2, 7.
‘Feeling Bilong Olketa Muvim Olketa’
Aposol Paul maet tingim wanfala example bilong wei for give long bigfala wei, wea kamap long wilderness winim 15 handred year bifor taem bilong hem. Datfala 12-fala tribe bilong Israel kamap free from wei for slave long Egypt. Olketa stap long botom bilong Maunt Sinai, and Jehovah komandim olketa for buildim wanfala tabernacle for worship and for putim olketa samting for worship insaed. Diswan bae needim staka material, and olketa askem datfala nation for mekem contribution.
Wanem nao olketa Israelite duim? “Olketa kam, evriwan wea heart bilong hem muvim hem, and olketa tekem kam samting, evriwan wea feeling bilong hem muvim hem, contribution bilong Jehovah for datfala waka long tent bilong meeting.” (Exodus 35:21) Waswe, datfala nation willing for give? Barava nao! Moses kasem disfala report: “Olketa pipol bringim kam staka moa samting winim need wea stap for waka wea Jehovah hem komandim for duim.”—Exodus 36:5.
Long datfala taem, olketa Israelite hao saed long selen? No longtaem bifor diswan, olketa stap olsem iusles slave, ‘anda long bigfala hevi,’ wea kasem ‘hardfala laef,’ wanfala laef bilong “safa.” (Exodus 1:11, 14; 3:7; 5:10-18) So luk olsem olketa no garem staka material samting. Hem tru, olketa Israelite tekem olketa animal taem olketa lusim datfala land wea olketa slave long hem. (Exodus 12:32) Bat maet olketa hia no staka, from no longtaem bihaen olketa lusim Egypt, olketa komplen olketa no garem meat or bred for kaikaim.—Exodus 16:3.
So wea nao olketa Israelite kasem olketa riches wea olketa donatem long building waka bilong tabernacle? From olketa masta bilong olketa bifor, olketa bilong Egypt. Bible hem sei: “Olketa son bilong Israel . . . go and askem olketa long Egypt for evri samting bilong silver and evri samting bilong gold and olketa kaleko. . . . [Olketa bilong Egypt] givim samting wea olketa askem.” Willing wei for give bilong olketa bilong Egypt hem wanfala blessing from Jehovah, no from Pharaoh. Bible hem sei: “Jehovah mekem olketa pipol luk gud long eye bilong olketa long Egypt, so olketa hia givim samting wea olketa askem.”—Exodus 12:35, 36.
Tingim feeling bilong olketa Israelite. Olketa bin safa nogud olsem slave and stap poor for staka year. Distaem olketa free and garem staka material samting. Hao nao bae olketa feel abaotem wei for givim samfala samting hia? Olketa maet feel olsem olketa fit for kasem and hem stret for olketa keepim. Bat, taem olketa askem them for givim selen for saportim klin worship, olketa obey—and no long wei for hol bak lelebet or long selfish wei! Olketa no forgetim wei wea Jehovah nao mekem olketa fit for kasem olketa material samting hia. And so olketa givim staka silver and gold and olketa animal bilong olketa. Olketa “willing long heart.” ‘Heart bilong olketa muvim olketa.’ ‘Feeling bilong olketa muvim olketa.’ Hem barava wanfala “donation wea olketa willing for givim long Jehovah.”—Exodus 25:1-9; 35:4-9, 20-29; 36:3-7.
Redy for Give
Big bilong wanfala contribution hem no showimaot really reason for give bilong wanfala man. Wantaem Jesus Christ lukluk taem pipol go ahed for putim selen insaed box selen bilong temple. Olketa rich pipol putim staka selen insaed, bat hem barava muvim feeling bilong Jesus for lukim wanfala poor widow woman hem putim tufala smolfala selen wea nating garem hae price. Hem sei: “Disfala widow woman, nomata hem poor, hem putim moa samting winim evriwan hia. . . . [Hem] wea no garem eni samting putim evri samting wea hem garem for living bilong hem.”—Luke 21:1-4; Mark 12:41-44.
Samting wea Paul talem long olketa long Corinth hem wan mind witim disfala tingting bilong Jesus. Long saed for mekem contribution for olketa wea garem sem biliv wea poor, Paul hem sei: “Sapos willing fasin hem stap firstaem, hem barava fitim wanem man hem garem, and no wanem hem no garem.” (2 Corinthians 8:12) Yes, wei for givim contribution hem no for winim narawan or for markem witim narawan. Each wan give followim wanem hem garem, and Jehovah hem hapi long willing spirit for give.
Nomata no eniwan savve mekem Jehovah moa rich, wea hem ownim evriting, contribution hem wanfala privilege wea letem olketa worshiper showimaot olketa lovem hem. (1 Chronicles 29:14-17) Olketa contribution wea man givim, no for pipol lukim or for selfish reason, bat witim stretfala tingting and for saportim tru worship, hem givim man hapi and witim diswan, blessing bilong God. (Matthew 6:1-4) Jesus hem sei: “Moa hapi kamaot from wei for give winim wei for kasem.” (Acts 20:35) Iumi tu savve kasem disfala hapi thru long wei for givim strong bilong iumi long service bilong Jehovah and long wei for markem samfala material samting bilong iumi for saportim tru worship and for helpem olketa wea fit for iumi helpem.—1 Corinthians 16:1, 2.
Redy for Give Distaem
Distaem, Olketa Jehovah’s Witness hapi tumas for lukim wei wea waka for preachim “disfala gud nius bilong kingdom” evriwea long world hem muv ahed. (Matthew 24:14) Insaed last tenfala year bilong mek-20 century, winim 3,000,000 olketa baptaes for showimaot wei wea olketa dedicate long Jehovah God, and samting olsem 30,000 niu kongregeson start. Tru nao, wanfala long evri thrifala kongregeson bilong Olketa Jehovah’s Witness wea stap distaem olketa kamap insaed tenfala year wea go pas! Staka long olketa increase hia hem kamaot from hard waka bilong olketa honest Christian man and woman wea givim taem and strong bilong olketa for visitim neiba bilong olketa and for talem olketa abaotem olketa purpose bilong Jehovah. Samfala increase hia kamaot from waka bilong olketa missionary, wea lusim homples bilong olketa and go long olketa farawe kantri for help long there witim waka for preachim Kingdom. Disfala increase mekem olketa niu circuit kamap, wea mekem need for appointim olketa niu circuit overseer kamap. And tu, olketa needim moa Bible for preaching and for man study seleva. Need for moa literature kamap. And long staka kantri, olketa branch building need for big moa or niu and big moa. Olketa fit for provaedem evri need hia thru long help bilong willing contribution bilong pipol bilong Jehovah.
Need for Olketa Kingdom Hall
Wanfala spesol need wea showaot klia witim increase long namba bilong Olketa Jehovah’s Witness hem need for olketa Kingdom Hall. Olketa survey wea olketa duim early long year 2000 showimaot need hem stap for 11,000 Kingdom Hall long olketa poor kantri, wea selen hem short. Tingim Angola. Nomata disfala kantri divaed long war for staka year, hem kasem average increase bilong samting olsem 10 percent evri year long namba bilong Kingdom pablisa. Nomata olsem, big haf long olketa 675 kongregeson bilong disfala big kantri long Africa olketa meet long open ples. Disfala kantri garem 22 Kingdom Hall nomoa, and 12-fala long olketa hia nomoa garem ruf.
Democratic Republic of Congo tu olsem. Nomata kapitol taon bilong hem, Kinshasa, garem klosap 300 kongregeson, hem garem tenfala Kingdom Hall nomoa. Long disfala kantri, bigfala need stap for garem winim 1,500 Kingdom Hall. Bikos long grow wea kwiktaem tumas long olketa kantri bilong Eastern Europe, Russia and Ukraine reportim need for planti handred Kingdom Hall. Maeti increase wea kamap long Latin America hem showaot klia long Brazil, wea hem garem winim haf million Witness and bigfala need for moa Kingdom Hall.
For provaed for need bilong olketa kantri hia, Olketa Jehovah’s Witness speedim-ap program for buildim olketa Kingdom Hall. Disfala program kasem selen thru long willing wei for give bilong olketa brata evriwea long world, mekem nomata olketa barava poor kongregeson savve garem gudfala ples for worship.
Olsem long taem bilong Israel bifor, olketa duim staka samting bikos olketa honest Christian ‘honorim Jehovah witim evri richfala samting bilong olketa.’ (Proverbs 3:9, 10) Governing Body bilong Olketa Jehovah’s Witness laek for tekem disfala chance for talemaot bigfala thankiu bilong olketa for evriwan wea heart bilong olketa muvim olketa for share long disfala willing wei for give. And iumi savve feel sure spirit bilong Jehovah bae go ahed for muvim heart bilong pipol bilong hem for saportim need bilong Kingdom waka wea go ahed for grow.
Taem wei for grow evriwea long world go ahed, letem iumi go ahed for lukaotem olketa chance for showimaot hapi and willing wei bilong iumi for givim strong, taem, and material samting bilong iumi. And letem iumi kasem trufala hapi wea diskaen wei for give savve givim.
[Box long page 29]
“IUSIM LONG WISEFALA WEI!”
“Mi ten year. Mi sendem iu disfala selen mekem iu savve baem pepa or eniting moa for wakem olketa buk.”—Cindy.
“Mi laek tumas for sendem iu disfala selen for wakem moa buk for iumi. Mi sevem selen hia wea kam from mi helpem dadi bilong mi. So iusim long wisefala wei!”—Pam, seven year.
“Mi sorre abaotem datfala hurricane. Mi hope iu sef. Disfala [$2, U.S.] hem evri selen long money box bilong mi.”—Allison, foa year.
“Nem bilong mi Rudy, and mi 11 year. Brata bilong mi Ralph hem six year. And sista bilong mi Judith hem tu and haf year. Mifala bin sevem selen wea mifala kasem insaed thrifala month for helpem olketa brata bilong iumi long [olketa area wea war spoelem]. Mifala fit for sevem 20 dollar wea mifala sendem distaem.”
“Mi feel sorre for olketa brata [wea hurricane kasem]. Mi kasem 17 dollar from mi waka witim dadi bilong mi. Mi no talem eniting for disfala selen, so mi letem iufala nao disaed.”—Maclean, eit year.