Web Site Bilong Iumi—Hem for Helpem Iumi and Nara Pipol
Jesus talem iumi for preachim gud nius abaotem Kingdom “long evri ples long world mekem pipol long evri kantri mas herem.” (Matt. 24:14) For helpem iumi ‘barava duim gud ministry bilong iumi,’ evri information wea stap bifor long watchtower.org, jw-media.org, and jw.org, distaem hem stap nao long jw.org Web site.—2 Tim. 4:5.
“Long Evri Ples Long World”: Distaem staka pipol iusim Internet for kasem information, especially olketa young pipol. Pipol savve iusim Web site bilong iumi for faendem stretfala ansa for olketa Bible kwestin wea olketa garem. Hem helpem pipol for savve long samfala samting abaotem organization bilong Jehovah and hem isi for pipol iusim for kasem free Bible study. From diswan, iumi savve sharem gud nius witim pipol long samfala ples long earth wea no garem chance for herem message abaotem Kingdom.
“Pipol Long Evri Kantri”: For “pipol long evri kantri” herem gud nius, datfala gud nius mas stap long languis bilong olketa. Olketa wea go long jw.org savve kasem olketa information wea stap long samting olsem 400 languis, wea winim eni nara Web site.
Iusim Datfala Web Site: Datfala jw.org Web site hem no for iumi sharem gud nius witim pipol wea no biliv nomoa, bat hem for Olketa Jehovah’s Witness iusim tu. Sapos iu savve accessim Internet, mifala encouragem iu for iusim jw.org. Long daon bae iu lukim hao for iusim datfala Web site.
[Diagram long page 3]
(For ful formatted text, lukim pablikeson)
Traem
1 Typem www.jw.org long address field long Internet browser long computer bilong iu. Then go long “Site Language” and chusim languis bilong iu.
2 For kasem information long datfala Web site, clickim olketa heding, menu option, and olketa link.
3 Trae iusim jw.org long tablet or mobile phone bilong iu wea connect long Internet. Page layout bae change for fitim datfala smol screen, bat olketa information bae semsem nomoa.