“Barava Duim Gud Ministry Bilong Iu”
1. Hao nao aposol Paul showimaot gudfala example long wei for duim ministry?
1 Paul talem Timothy for ‘barava duim gud ministry bilong hem.’ (2 Tim. 4:5) Paul savve talem datwan long hem, bikos Paul gudfala example long diswan. Tingim, thrifala taem Paul gogo long olketa difren ples for duim missionary waka, start from 47 C.E. go kasem 56 C.E. Staka taem Bible buk bilong Acts talem wei wea Paul “barava storyim gud” Kingdom bilong God. (Acts 23:11; 28:23) Distaem, hao nao iumi tu savve duim gud ministry bilong iumi?
2. Hao nao iumi savve duim gud ministry bilong iumi long haos tu haos waka?
2 Long Haos Tu Haos: Maet iumi need for go long haos bilong pipol long difren taem long day, for faendem olketa wea no garem chance for herem gud nius. Maet iumi savve meetim olketa man taem iumi duim preaching long evening or long olketa weekend. Iumi bae laek for go bak long evri haos wea pipol no stap for trae story witim eniwan. Hao sapos iumi go bak bat no eniwan stap long haos? Maet iumi savve iusim leta or telephone for story witim olketa.
3. Wanem chance nao iumi garem for preach long pablik and for duim enitaem witnessing?
3 Preach Long Pablik and Enitaem Witnessing: Olketa Jehovah’s Witness talemaot “trufala wisdom” long evriwan wea laek for herem. Samfala taem olketa preach long pipol long saed “road” or long “pablik ples.” (Prov. 1:20, 21) Waswe, iumi redi for preach long pipol wea iumi meetim evriday? Waswe, iumi ‘barava busy for preachim message bilong God’? (Acts 18:5) Sapos iumi duim olsem, datwan showimaot iumi “barava duim gud ministry bilong iumi.”—Acts 10:42; 17:17; 20:20, 21, 24.
4. Hao nao prea and wei for ting raonem samting helpem iumi for barava duim gud ministry bilong iumi?
4 Samfala taem from iumi fraet or shame, datwan mekem iumi hol bak for preach long pipol. Iumi savve Jehovah hem minim feeling bilong iumi. (Ps. 103:14) Nomata olsem, taem iumi fraet or shame iumi savve prea long Jehovah for givim iumi strong for preach. (Acts 4:29, 31) And tu, taem iumi study seleva and ting raonem toktok bilong God, iumi bae tinghae long datfala gud nius. (Phil. 3:8) From diswan, iumi bae no fraet for story long pipol!
5. Olsem datfala profesi bilong Joel talem, hao nao iumi savve gohed for preach?
5 Profesi wea Joel talem showimaot bifor datfala bigfala day bilong Jehovah hem kam, pipol bilong Hem bae “gohed nomoa” for preach and no eni samting savve stopem olketa. (Joel 2:2, 7-9) Iumi laek for busy long disfala waka wea bae no kamap moa enitaem!