Followim Example Bilong Profet Jonah
1. Wanem nao samfala gudfala wei bilong Jonah?
1 Taem samfala tingim profet Jonah maet olketa tingse hem man for fraet or hem no savve tingim narawan. Nomata olsem, Jonah hem hambol, no fraet and willing for duim wanem God laekem. Wanem nao iumi savve duim for followim gudfala example bilong Jonah?—Jas. 5:10.
2. Wanem nao iumi savve duim for hambol olsem Jonah?
2 Hambol: Firstaem Jonah ranawe from assignment bilong hem. Iumi no sapraes long diswan bikos pipol long Assyria raf tumas, and pipol kolem Nineveh “taon for killkill.” (Nah. 3:1-3) Bat Jonah showimaot hem hambol taem hem willing for go long Nineveh long mek-tu taem Jehovah askem hem, nomata Jehovah disciplinem hem. (Prov. 24:32; Jonah 3:1-3) Nomata Jonah ranawe firstaem, bihaen hem duim wanem Jehovah laekem. (Matt. 21:28-31) Waswe, iumi tu strong for preachim gud nius, nomata iumi kasem discipline or territory bilong iumi no isi?
3. Hao nao iumi savve showimaot iumi no fraet and willing for duim wanem God laekem taem iumi duim ministry?
3 No Fraet and Willing for Duim Wanem God Laekem: From Jonah luksavve disison bilong hem mekem laef bilong olketa crew long ship stap long danger, Jonah willing for olketa torowem hem long sea. (Jonah 1:3, 4, 12) Bihaen, taem hem duim assignment bilong hem long Nineveh, hem go barava midol long datfala taon, maet for lukaotem gudfala ples for talemaot judgment message bilong Jehovah. Samting wea Jonah duim showimaot hem wanfala profet wea no fraet! (Jonah 3:3, 4) Waswe long iumi distaem? Iumi mas no fraet and depend long holy spirit bilong God for strongim iumi for preach taem pipol againstim iumi. (Acts 4:29, 31) Taem iumi willing for duim wanem God laekem iumi bae iusim taem bilong iumi and wanem iumi garem for duim ministry.—Acts 20:24.
4. Why nao iumi shud ting raonem gudfala example wea olketa profet showimaot?
4 Taem iu readim story bilong wanfala profet bilong Jehovah long Bible, iu bae kasem gud samting sapos iu tingim tufala kwestin hia: ‘Sapos samting wea happen long datfala profet kasem iu, wanem nao bae iu duim? Wanem nao iu savve duim for followim olketa gudfala wei bilong hem?’ (Heb. 6:11, 12) Samfala article moa long Kingdom Ministry Bilong Iumi bae storyim olketa nara faithful profet and wanem iumi savve lanem from olketa.