Kwestin Box

◼ Wanem nao samfala Bible principle wea savve helpem iumi for disaed sapos hem fitim for iusim mobile phone long meeting and long ministry?

“Taem Hem Stap for Evri Samting.” (Eccl. 3:1): Mobile phone mekem hem isi for iumi textim or story witim narawan long enitaem. Bat samfala taem iumi olketa Christian no laekem phone bilong iumi for disturbim iumi, olsem long taem bilong olketa meeting. Long datfala taem, iumi worshipim Jehovah, hem teachim iumi, and iumi encouragem narawan. (Deut. 31:12; Ps. 22:22; Rom. 1:11, 12) Hem gud sapos iumi offem phone bilong iumi taem iumi arrive long meeting and iumi savve chekim olketa message bihaen iumi lusim Kingdom Hall. Sapos iumi mas keepim mobile bilong iumi on from samting hem happen, iumi shud putim long setting wea bae no disturbim narawan.

‘Evri Samting wea Iumi Duim Hem for Mekem Iumi Savve Sharem Gud Nius.’ (1 Cor. 9:23): Samfala taem iumi garem gudfala reason for iusim mobile phone long ministry. Olsem example, brata wea leadim grup maet iusim phone for chekim olketa nara brata and sista long territory. Olketa pablisa savve iusim mobile for ringim return visit or Bible study bifor olketa go lukim hem, especially sapos hem stap farawe lelebet. Sapos iumi tekem mobile phone long preaching, iumi shud offem or putim long setting wea bae no disturbim iumi taem iumi story witim haosholder. (2 Cor. 6:3) Hem gud sapos taem iumi weitim olketa nara pablisa insaed long territory iumi no ringim or textim olketa fren bilong iumi, bat iumi tingim ministry firstaem and story witim olketa pablisa wea iumi waka tugeta.

Tingim Narawan. (1 Cor. 10:24; Phil. 2:4): Iumi mas no tingse hem olraet nomoa for leit long field service grup bikos iumi savve ringim or textim narawan for savve long territory. Taem iumi kam leit, plande taem datwan mekem brata wea leadim grup mas organizem grup moa. Hem tru, samfala taem maet samting wea iumi no expectim hem happen wea mekem iumi for leit. Nomata olsem, sapos hem wei bilong iumi for kam early long grup, iumi showimaot iumi no tingim iumiseleva bat iumi tinghae long arrangement bilong Jehovah, brata wea leadim grup, and olketa nara brata and sista.