Go Bak Long Eniwan wea Lelebet Interest
1 Plande long iumi distaem worshipim Jehovah bikos wanfala brata or sista hem luksavve iumi interest long datfala Kingdom message and hem willing for kam bak for visitim iumi. Maet hem duim diswan plande taem for mekem interest bilong iumi hem grow. So iumi tu shud trae hard for go bak long eniwan wea showimaot hem lelebet interest. Tru nao, wei for duim return visit hem part long komand wea iumi kasem for ‘mekem pipol kamap disaepol.’—Matt. 28:19, 20.
2 Luksavve Man Hem Interest: Nomata sapos man no tekem literature, feis, toktok, or word hem iusim savve showimaot sapos hem lelebet interest long Kingdom message. Taem olsem iumi fit for duim return visit. Wanfala brata hem go bak long wanfala man for faevfala week bat man hia nating tekem eni literature. Mek-six taem wea hem go bak man hia hem tekem literature, and gogo, hem start for studyim Bible.
3 Sapos iu luksavve wanfala man hem interest, go bak kwiktaem. Nomata sapos hem tu-thri day bihaen nomoa. No givim chance for “datfala man wea wicked” for aotem seed wea iu plantim finis long heart bilong datfala man. (Matt. 13:19) Sapos iu promis for go bak, iu mas duim datwan long taem wea iutufala markem.—Matt. 5:37.
4 Street Waka: Waswe, iu trae for go bak long man wea iu meetim long street waka or enitaem witnessing? Taem iutufala story finis, maet hem gud for sei olsem: “Mi hapi tumas long story bilong iumi tuday. Wea nao bae mi savve meetim iu mekem iumi story moa?” Sapos pablisa hem tingse hem fitim, maet bae hem talem go telephone namba bilong hem or askem datfala man for telephone namba. Sapos pipol lukim iu street olowe long wanfala ples maet bae olketa willing for talem iu telephone namba or address bilong olketa. Nomata sapos olketa les for talem iu, bae iu savve mekem interest bilong olketa kamap moa big next taem iu meetim olketa long street.
5 Taem iumi lukim olketa plant wea iumi watarem and lukaftarem hem grow gud, iumi hapi tumas. Diswan semsem tu taem iumi duim return visit and helpem olketa narawan for grow long spiritual wei. (1 Cor. 3:6) Markem diswan olsem goal bilong iu for go bak and lukim eniwan wea showimaot olketa lelebet interest.