Disfala Magasin Bae Fitim Hu?
1. Wanem nao iumi shud tingim taem iumi readim olketa magasin, and why nao olsem?
1 Wastaoa and Awake! magasin hem for pipol evriwea long world. So olketa article insaed hem storyim olketa difren subject. Taem iumi readim each article, iumi shud tingim hu nao bae article hia fitim hem. Then mek sure iumi givim magasin hia long man wea iumi tingim.
2. Wanem nao samfala subject wea olketa magasin bilong iumi storyim, and olketa subject hia bae fitim hu?
2 Sapos iu and waka fren bilong iu storyim finis wanfala Bible Subject, hem gud for lukaotem eni niu Wastaoa wea storyim datfala subject. Iu savve lukaotem eni article insaed magasin wea storyim famili wea bae helpem wanfala relative bilong iu. Taem iu readim wanfala article long Awake! magasin abaotem nara kantri, iu savve tingim eniwan wea iu savve hem plan for go long datfala kantri. Iu savve tingim sapos olketa magasin hem fitim eni bisnis or eniwan wea waka for gavman long territory bilong iu. Olsem example, wanfala magasin wea storyim wei for steal long olketa stoa bae fitim olketa man wea ownim bisnis. Or wanfala magasin wea storyim olketa criminal maet fitim olketa police.
3. Storyim experience wea showimaot gud samting wea kamaot from wei for offerim magasin wea iumi savve bae hem fitim man.
3 Gud Samting wea Kamaot From Datwan: Wanfala hasband and waef long South Africa kasem October 2011 Awake! magasin wea storyim “How to Raise Responsible Children.” Bihaen datwan, tufala ringim 25-fala skul wea stap long territory bilong kongregeson for offerim datfala magasin long olketa. Twenti-tu skul tekem olketa copy long magasin hia and givimaot long olketa student. Nara hasband and waef long datfala kantri tu givimaot sem magasin long olketa skul long territory bilong olketa. Olketa teacher long wanfala skul iusim datfala magasin for teachim olketa pikinini. Tufala storyim disfala experience long wanfala circuit overseer. Then datfala circuit overseer encouragem olketa kongregeson long circuit bilong hem for traem datfala sem idea long territory bilong olketa. From staka skul laek for kasem olketa magasin hia, branch kasem staka order and olketa mas printim moa disfala magasin.
4. Why nao iumi laek for givimaot olketa magasin long staka pipol?
4 Olketa magasin bilong iumi storyim wanem Bible talem abaotem nogud samting wea happen distaem and showimaot Kingdom bilong God nomoa bae stretem evri samting. Olketa magasin bilong iumi nomoa storyim wanem man savve duim for sev. (Isa. 52:7) From datwan, iumi laek for givimaot olketa magasin long staka pipol. So taem iumi readim olketa magasin, tingim diswan: ‘Disfala magasin bae fitim hu?’